ভাৰত, পাকিস্তানকে ধৰি চাৰি দেশীয় ক্ৰিকেট শৃংখলাৰ প্ৰস্তাৱ পিচিবিৰ অধ্যক্ষ ৰামিজ ৰাজাৰ

সুদীৰ্ঘ দিন ধৰি আন্তঃৰাষ্ট্ৰীয় দ্বিপাক্ষিক ক্ৰিকেট শৃংখলাত ভাগ নোলোৱা ভাৰত আৰু পাকিস্তানৰ মাজত পুনৰ ক্ৰিকেটীয় সম্পৰ্ক স্থাপনৰ প্ৰস্তাৱ আগবঢ়াইছে পাকিস্তান ক্ৰিকেট ব’ৰ্ডৰ অধ্যক্ষ ৰামিজ ৰাজাই।

ৰাজাই এটা টুইট যোগে ভাৰত, পাকিস্তান, অষ্ট্ৰেলিয়া আৰু ইংলেণ্ডক অন্তৰ্ভুক্ত কৰি এক চাৰি দেশীয় ‘চুপাৰ চিৰিজ’ৰ পৰামৰ্শ দিছে।

ৰামিজ ৰাজাই কয় যে তেওঁ ভাৰত আৰু পাকিস্তানসহ চাৰিখন ৰাষ্ট্ৰৰ প্ৰতি বছৰে এক টি-২০ শৃংখলা অনুষ্ঠিত কৰাৰ বিষয়ে আন্তঃৰাষ্ট্ৰীয় ক্ৰিকেট পৰিষদৰ (আইচিচি) ওচৰত এটা প্ৰস্তাৱ দিব।

তেওঁ লগতে কয় যে যদি এই শৃংখলাটো সঁচাকৈয়ে আগবাঢ়ে, তেন্তে লাভাংশ আইচিচিৰ সকলো সদস্যৰ সৈতে শতাংশৰ ভিত্তিত ভাগ-বতৰা কৰা হ’ব।

Hello fans.Will propose to the ICC a Four Nations T20i Super Series involving Pak Ind Aus Eng to be played every year,to be hosted on rotation basis by these four. A separate revenue model with profits to be shared on percentage basis with all ICC members, think we have a winner.

— Ramiz Raja (@iramizraja) January 11, 2022

উল্লেখ্য যে কোনো আন্তঃৰাষ্ট্ৰীয় প্ৰতিযোগিতাত মুখামুখি হোৱাৰ বাদে ভাৰত আৰু পাকিস্তানে প্ৰায় এটা দশক দ্বিপাক্ষিক শৃংখলাত অৱতীৰ্ণ হোৱা নাই।