কোনো নিৰ্দিষ্ট কাৰণ অবিহনে আৰক্ষীয়ে এগৰাকী প্ৰাক্তন ছাত্ৰ নেতাক গুলীওৱাৰ পাছত শিৱসাগৰৰ বিধায়ক অখিল গগৈয়ে নগাঁৱৰ আৰক্ষী অধীক্ষক আনন্দ মিশ্ৰক তাৎক্ষণিকভাৱে নিলম্বন কৰাৰ দাবী জনাইছে।
এই সন্দৰ্ভত অখিল গগৈয়ে কয়, ‘’এই ঘটনাটোৱে অৱশেষত আৰক্ষীৰ প্ৰকৃত ছবিখন ৰাজ্যৰ জনসাধাৰণৰ আগত দাঙি ধৰিলে। আমি দীৰ্ঘদিনৰ পৰা আৰক্ষী জড়িত হৈ থকা এনকাউন্টাৰক বিৰোধিতা কৰিছো আৰু গৰিহনা দিছো।‘’
তেওঁ লগতে কয় যে ৰাজ্যখনৰ একাংশ লোকে যদি আৰক্ষীৰ দ্বাৰা ‘গুলীওৱা তথা এনকাউন্টাৰক’ সমৰ্থন নকৰাহেঁতেন যুৱক কীৰ্তি কমল বৰাক এইদৰে গুলীয়াব নোৱাৰিলেহেঁতেন।‘’
‘’অভিযুক্ত ব্যক্তিক আৰক্ষীয়ে যিকোনো সময়তে গুলীওৱাটো এটা ভু ল পদক্ষেপ আৰু এইটো দিনে দিনে বাঢ়ি গৈছে কিয়নো একাংশ লোকে এনকাউন্টাৰক সমৰ্থন কৰিব বিচাৰে,’’-তেওঁ লগতে কয়।
লগতে পঢ়ক: মহানগৰীত গ্ৰেপ্তাৰ হাৰিয়ানাৰ দুজন ATM প্ৰৱঞ্চক
গগৈয়ে দাবী কৰে যে এনে ঘটনাৰ বিৰোধিতা নকৰাৰ বাবে অসমত অৱশেষত ‘জংঘলৰাজ’ আৰু ‘হিটলাৰ ৰাজ’ দেখিবলৈ পোৱা গৈছে।
‘’ আমি চৰকাৰে নগাঁও আৰক্ষী অধীক্ষকক তাৎক্ষণিকভাৱে নিলম্বন কৰাৰ বাবে আৰু নিৰীহ যুৱকজনক গুলীওৱা ঘটনাত জড়িত আৰক্ষী বিষয়াজনক গ্ৰেপ্তাৰ কৰাৰ বাবে দাবী কৰিছো,’’- তেওঁ কয়।
ইপিনে, আৰক্ষী অধীক্ষক আনন্দ মিশ্ৰই কৈছিল যে ড্ৰাগছ বিৰোধী অভিযানৰ সময়ত আৰক্ষীক আক্ৰমণ কৰাৰ পাছত কীৰ্তি কমল বৰাক গুলীওৱা হৈছিল।
