নগাঁৱৰ ছাত্ৰ নেতা কীৰ্তিকমল বৰাক গুলিওৱা ঘটনা সন্দৰ্ভত আজি গ্ৰহণ কৰা হৈছে ৰাজহুৱা শুনানি ।
নগাঁৱৰ আৱৰ্ত ভৱনত বিয়লি ৪ বজালৈ এই ৰাজহুৱা শুনানি অনুষ্ঠিত হ’ব।
অসম চৰকাৰৰ অতিৰিক্ত মুখ্য সচিব পৱন কুমাৰ বৰঠাকুৰে এই শুনানি গ্ৰহণ কৰিছে।
অতিৰিক্ত মুখ্য সচিব পৱন কুমাৰ বৰঠাকুৰৰ নেতৃত্বত গঠিত তদন্ত কমিটিয়ে এই ঘটনাৰ তদন্ত অব্যাহত ৰাখিছে।
আজি ঘটনাৰ প্ৰত্যক্ষদৰ্শীৰ পৰা তদন্ত সমিতিয়ে সাক্ষ্য গ্ৰহণ কৰি আছে।
যোৱা ২২ জানুৱাৰীত নগাঁৱৰ কচলুখোৱা তিনিআলিত এই গুলিচালনাৰ ঘটনা সংঘটিত হৈছিল।
অসম আৰক্ষীৰ এন্টি নাৰ্কটিক স্কোৱাডে নগাঁৱৰ ছাত্ৰনেতা কীৰ্তিকমল বৰাক গুলিয়াই আহত কৰিছিল।
আৰক্ষীয়ে এই ঘটনাক এটা এনকাউন্টাৰৰ ৰূপ দিবলৈ চেষ্টা কৰিছিল।
এই ঘটনাৰ পাছতে সমগ্ৰ অসমত প্ৰতিবাদৰ জোৱাৰ উঠিছিল।
বিভিন্ন মহলত এই ঘটনাই প্ৰতিক্ৰিয়াৰ সৃষ্টি কৰিছিল।
ইয়াৰ পাছতেই অসম চৰকাৰে অতিৰিক্ত মুখ্য সচিব পৱন কুমাৰ বৰঠাকুৰৰ নেতৃত্ব সমিতি গঠন কৰি তদন্তৰ নিৰ্দেশ দিছিল।
দহ দিনৰ ভিতৰত তদন্তৰ প্ৰতিবেদন দাখিলৰ নিৰ্দেশ দিয়া হৈছিল।
আৰক্ষীৰ গুলীত ভৰিৰ দুডালকৈ হাড় ভঙা কীৰ্তিকমলৰ জিএমচিএইছত অস্ত্ৰোপচাৰ চলি থকা বুলি জানিব পৰা গৈছে।
কোভিডত আক্ৰান্ত হোৱাৰ তিনি দিনৰ পিছতে কীৰ্তিকমল কোভিড মুক্ত হয় আৰু সেইমৰ্মে গুলী লগাৰ পাঁচ দিনৰ পিছত আজি তেওঁৰ অস্ত্ৰোপচাৰৰ ব্যৱস্থা কৰা হৈছে।
