ভাৰত-ভূটান সীমান্তৰ শুকানজুলি ফায়াৰিং ৰেঞ্জত সেনাৰ বোমা বাৰুদৰ প্ৰশিক্ষণৰ সময়তে সংঘটিত হৈছে এক অস্বাভাৱিক অঘটন৷
ভাৰতীয় সেনাৰ ৩১ নং ফিল্ড ৰেজিমেণ্টৰ প্ৰশিক্ষণ চলি থকাৰ সময়তে দিকভ্ৰষ্ট হৈ এটা বোমা পৰিল স্থানীয় এটি পৰিয়ালৰ ঘৰত।
বোমাটো বিস্ফোৰণৰ লগে লগে পৰমেশ্বৰ হাজদা নামৰ লোকজনৰ বাসগৃহ সম্পূৰ্ণৰূপে ধ্বংসস্তূপত পৰিণত হয়। উল্লেখ্য যে দৰিদ্ৰ পৰিয়ালটিয়ে প্ৰধানমন্ত্ৰী আবাস যোজনাৰ অধীনত এই গৃহটো লাভ কৰিছিল৷
অৱশ্যে ঘটনাৰ সময়ত ঘৰটোত নাছিল কোনো লোক উপস্থিত নথকাৰ বাবে ৰক্ষা পৰে পৰিয়ালটোৰ দুই শিশু সহ মুঠ সাত গৰাকী লোকৰ জীৱন।
পৰমেশ্বৰৰ বাসগৃহৰ পৰা উফৰি যোৱা বোমাৰ অংশ বিশেষ ঘৰৰ কাষতে থকা লুথৰু হাজদাৰ ঘৰতো পৰে যদিও বিশেষ ক্ষয়-ক্ষতিৰ পৰা ৰক্ষা পৰে।
এই অতৰ্কিত বিস্ফোৰণ সংঘটিত হোৱাৰ পিছতে ১ নং পাহাৰপুৰ অঞ্চলটোত হুৱা-দুৱা লাগে৷
অৱশ্যে ঘটনাৰ কিছু সময় পিছতেই ঘটনাস্থলীত উপস্থিত হৈ সেনা বিষয়া সকলে ঘটনা সন্দৰ্ভত গাঁওবাসীৰ ওচৰত ক্ষমা খুজে৷
তদুপৰি ধ্বংসস্তূপত পৰিণত হোৱা পৰিয়ালটোৰ আৱাস গৃহ পুনৰ নিৰ্মাণৰ প্ৰতিশ্ৰুতি দিয়ে সেনা বিষয়া সকলে৷
সেনা বিষয়া সকলৰ লগতে দৰংগামেলা আৰক্ষী বিষয়া সহ আৰক্ষীৰ এটি দলো ঘটনাস্থলীত উপস্থিত হয়। ঘটনা সন্দৰ্ভত অঞ্চলটোত কিছু উত্তেজনাৰ সৃষ্টি হৈছিল যদিও আৰক্ষীয়ে পৰিস্থিতি নিয়ন্ত্ৰণ কৰে৷
