এদিনীয়া ছিৰিজত ৱেষ্ট ইণ্ডিজক বিধ্বস্ত কৰা ৰোহিত শৰ্মা নেতৃত্বাধীন টীম ইণ্ডিয়াই তিনিখন মেচৰ টী-২০ ছিৰিজতো ৩-০ ব্যৱধানত বিজয় সাৱ্যস্ত কৰে। এদিনীয়াৰ দৰেই টী-২০ ছিৰিজতো কেৰিবিয়ান দলক হোৱাইটৱাছ কৰিলে ভাৰতে।
দেওবাৰে তৃতীয়খন তথা ছিৰিজৰ অন্তিমখন টী-২০ত প্ৰথম বেটিং কৰি ভাৰতে ৫ উইকেটৰ বিনিময়ত ১৮৪ৰাণ কৰে।
ইয়াৰ প্ৰত্যুত্তৰত বেটিং কৰিবলৈ নামি ৱেষ্ট ইণ্ডিজে তেওঁলোকৰ নিৰ্দিষ্ট ২০ অভাৰত ৯টা উইকেটৰ বিনিময়ত ১৬৭ৰাণতে স্তব্ধ হৈ পৰে।
মেচখনত ভাৰতে ১৭ৰাণত বিজয় সাৱ্যস্ত কৰে। ভাৰতৰ হৈ দীপক চাহাৰ, ভেংকটেশ আয়াৰ আৰু শাৰ্দুল ঠাকুৰে ২টাকৈ উইকেট দখল কৰাৰ বিপৰীতে হৰ্ষল পেটেলে ৩টা উইকেট হস্তগত কৰে।
ভাৰতৰ বিশাল স্ক’ৰ অনুসৰণ কৰি কেৰিবিয়ান দলটোৱে দ্ৰুতভাৱে উইকেট হেৰুৱায়। কাইল মায়াৰ্ছ ৬ৰাণতে দীপক চাহাৰৰ বলত আউট হয়। তাৰ ক্ষন্তেক পিছতে চাহাৰে ছাই হ’পক ৮ৰাণত পেভলিয়নলৈ ওভতাই পঠিয়ায়।
লগতে পঢ়ক: অপহৰণ! নগাঁৱত আৰক্ষীয়ে উদ্ধাৰ কৰিলে মুম্বাইৰ কিশোৰী
আৰম্ভণিৰ এই পতন ৰোধ কৰাৰ চেষ্টা অব্যাহত ৰাখি ৰ’ভমেন পাৱেল আৰু নিকোলাচ পুৰানে দলৰ বাবে ৪৭ৰাণ যোগ দিয়ে। হৰ্ষল পেটেলৰ বলত পাৱেলে শাৰ্দুল ঠাকুৰৰ হাতত কেচ তুলি দি ২৫ৰাণত বিদায় লয়।
তাৰ পাছতে ৱেষ্ট ইণ্ডিজৰ সেনাপতি কিৰেন পোলাৰ্ডে ৫ৰাণ কৰিয়েই ভেংকটেশ আয়াৰৰ বলত ৰবি বিষ্ণইৰ হাতত কেচ তুলি দিয়ে। অধিনায়ক পোলাৰ্ডৰ পিছতে জেছন হোল্ডাৰো আয়াৰৰ চিকাৰ হয়।
ইপিনে, ৰষ্টন চেজ ১২ৰাণ কৰিয়েই হৰ্ষল পেটেলৰ বলত ক্লিন ব’ল্ড হয়। আনটো দিশত অকলেই যুঁজ দি নিকোলাচ পুৰানে ৬১ৰাণৰ ইনিংছ খেলি বিদায় লয় আৰু ইয়াতেই ৱেষ্ট ইণ্ডিজৰ বিজয়ৰ সকলো সম্ভাৱনাৰ ইতি পৰে।
আনহাতে, টছত জিকি ৱেষ্ট ইণ্ডিজে ভাৰতক বেটিং কৰিবলৈ পঠিয়ায়। দেওবাৰে ঋতুৰাজ গাইকোৱাড আৰু ঈষান কিষানে ভাৰতৰ হৈ ইনিংছ মুকলি কৰে। মাত্ৰ ৪ৰাণ কৰিয়েই আউট হয় ঋতুৰাজ। ঈষানে কৰে ৩৪ৰাণ।
তিনি নম্বৰত বেটিং কৰিবলৈ নামি ব্যৰ্থ হয় শ্ৰেয়াস আয়াৰ। ব্যক্তিগত ২৫ৰাণ কৰি আউট হয় নিৰ্ভৰযোগ্য বেটছমেনগৰাকী। সেইদৰে অধিনায়ক ৰোহিতেও ১৫টা বল খেলি মাত্ৰ ৭ৰাণ কৰিয়েই পেভলিয়নমুখী হয়।
লগতে পঢ়ক: নতুন আতংক ‘লাছা ফীভ্যাৰ’ ৰোগটোনো কি? ইয়াৰ পৰা কেনেকৈ হাত সাৰিব পাৰি?
এই পৰিস্থিতি ভাৰতৰ ইনিংছৰ গুৰিবঠা ধৰে সূৰ্যকুমাৰ যাদব আৰু ভেংকটেশ আয়াৰে। যাদবে ৬৫ৰাণ কৰি ভাৰতৰ ইনিংছৰ অন্তিমটো বলত আউট হয়। তেওঁ মুছতে ৭টা চাৰি আৰু এটা ছয় কোবায়।
ইপিনে, ভেংকটেশ আয়াৰে ১৯টা বলত অপৰাজিত ৩৫ৰাণ কৰে। যাদব আৰু আয়াৰ যুটীয়ে ইনিংছৰ শেষ দুই অভাৰত ভাৰতৰ বাবে ৪২ৰাণ সংগ্ৰহ কৰে।
