কলিয়াভোমোৰা সেতুৰ নৱনির্মিত দ্বিতীয় খন দলঙৰ কাম কিমান আগবাঢ়িছে? কেতিয়ালৈ মুকলি হব কলিয়াভোমোৰা সেতুৰ নৱনির্মিত দ্বিতীয় খন দলং? নৰ্থ ইষ্ট নাওৰ এক বিশেষ প্ৰতিবেদন।
মহাবাহু ব্ৰহ্মপুত্ৰৰ ওপৰত শোণিতপুৰ আৰু নগাওঁ জিলা সংযোগ কৰা দ্বিতীয় খন দলঙৰ কাম বৰ্তমানেও অব্যাহত আছে।
যদিও দলংখনৰ বৰ্তমান নামকৰণ কৰা হোৱা নাই, এতিয়াও কলিয়াভোমোৰা নামেৰেই পৰিচিত ।
নৱনির্মিত দ্বিতীয় কলিয়াভোমোৰা সেতুৰ নিৰ্মাণ কাৰ্য্য দ্ৰুত গতিত অব্যাহত আছে।
গেমন ইণ্ডিয়া লিমিটেড আৰু এছ পি শিংলা কনষ্ট্ৰাকচন প্ৰাইভেট লিমিটেড নামৰ প্ৰতিষ্ঠানে নিবিদা লাভ কৰাৰ পাছতে বিগত ২৯ নৱেম্বৰ ২০১৪ তাৰিখে প্ৰতিষ্ঠানটোৱে কাম আৰম্ভ কৰে।
প্ৰায় তিনি কিলোমিটাৰ দৈৰ্ঘ্যৰ এই দলংখনৰ নিৰ্মাণৰ বাবে ছয়শ কোটি টকা আৱণ্টন কৰা হৈছে। দলং খনত মুঠ খুটাৰ সংখ্যা ২৬ টা।
দলংখনৰ দুয়ো দিশে যোৱা ৰাস্তাই ৩৭নং (ক) আৰু ১৫ নং ৰাষ্ট্ৰীয় ঘাইপথত সংযুক্ত কৰিব। এই দলংখনৰ কাম সম্পূৰ্ণ হোৱাৰ পিছত কলিয়াভোমোৰাৰ পুৰণি দলঙত যান -জঁট তথা দুর্ঘটনাৰ সংখ্যা হ্ৰাস পাব বুলি আশা কৰিব পাৰি।
দলংখনৰ নির্মাণত প্ৰায় ৬০০ বনুৱা/ কৰ্মী নিয়োগ কৰা হৈছে। প্ৰতিদিনে দলঙৰ নিৰ্মাণ কাৰ্য্য অব্যাহত আছে যদিও আজিকোপতি দলং খন সম্পূৰ্ণ হৈ উঠা নাই।
গুৰুত্বপূৰ্ণ কথা এয়ে যে নিৰ্মাণৰ দায়িত্ব লাভ কৰা গেমন ইণ্ডিয়া লিমিটেড আৰু এছ পি শিংলা কনষ্ট্ৰাকচন প্ৰাইভেট লিমিটেড নামৰ প্ৰতিষ্ঠানে ২০১৮ বৰ্ষত কাম সম্পূৰ্ণ হব বুলি কৈছিল যদিও ২০২২ বৰ্ষৰ মাৰ্চ মাহলৈও কাম সম্পূৰ্ণ হৈ উঠা নাই। নিৰ্দিষ্ট সময়ৰ চাৰি বছৰৰ পাছতো আজিলৈকে দলঙৰ প্ৰায় ৬০ শতাংশ কামহে সম্পূৰ্ণ হৈ উঠা পৰিলক্ষিত হৈছে।
আনহাতে প্ৰাক্তন মুখ্যমন্ত্ৰী সৰ্বানন্দ সোণোৱালে মুখ্যমন্ত্ৰীৰ দায়িত্ব গ্ৰহণ কৰি থকাৰ সময়ত ১১ মে ২০১৯ তাৰিখে দলঙৰ নিৰ্মাণৰ কাম পৰিদৰ্শন কৰি ২০২০ বৰ্ষৰ ডিচেম্বৰ মাহত কাম সম্পূৰ্ণ হব বুলি ঘোষণা কৰিছিল যদিও সেয়াও আজিকোপতি হৈ নুঠিল। সোণোৱালৰ সেই ঘোষণাৰ আজি এবছৰ পাৰ হল, কিন্তু কাম সম্পূৰ্ণ হৈ নুঠিল।
ৰাইজৰ প্ৰশ্ন,কেতিয়ালৈ সম্পূৰ্ণ হব দলং নিৰ্মাণৰ কাম? নে পুৰণি দলঙতে বহু লোকে দুৰ্ঘটনাত প্ৰাণ দিব লাগিব।
দলং খনত শেহতীয়াকৈ হৈ যোৱা দুটাকৈ ভয়ঙ্কৰ পথ দুর্ঘটনাত সন্ধানহীনহৈ থকা তিনিজনকৈ লোকৰ সন্ধানো আজিলৈকে পোৱা নগ’ল।
যদি কাম তীব্ৰ গতিত কোনো অসুবিধা নোহোৱাকৈ চলি থাকে নিশ্চয় ২০২২ অথবা ২০২৩ বৰ্ষত সম্পূৰ্ণ হোৱাৰ আশা কৰিব পাৰি বুলিও মত প্ৰকাশ কৰে গেমন কোম্পানীৰ কৰ্মচাৰী এগৰাকীয়ে।