অসম চৰকাৰৰ খাদ্য, যোগান আৰু গ্ৰাহক পৰিক্ৰমা বিভাগত ব্যাপক অনিয়ম ঘটি থকাৰ অভিযোগ উত্থাপন কৰিছে সুলভ মূল্যৰ ব্যৱসায়ীসকলে ৷ কেইবা মাহ ধৰি প্ৰাপ্য কমিচনৰ পৰা বঞ্চিত হৈ অহাৰ কথা প্ৰকাশ কৰিছে সুলভ মূল্যৰ ব্যৱসায়ীসকলে ৷ দুধনৈত গোৱালপাৰা জিলা সুলভ মূল্য ব্যৱসায়ী সন্থাৰ সংবাদমেলত চৰকাৰৰ বিৰুদ্ধে তীব্ৰ ক্ষোভ উজাৰে ব্যৱসায়ীসকলে ৷
দুধনৈ পৰিদৰ্শন বঙলাত অনুষ্ঠিত সংবাদমেলত কেইবাটাও অভিযোগ তুলি ক্ষোভ প্ৰকাশ কৰে সংগঠনটোৱে ৷
অসমৰ ২ কোটি ৫২ লাখ হিতাধিকাৰীক খাদ্য সুৰক্ষা আঁচনিৰ যোগেদি অন্ন যোগান ধৰি অহা সুলভ মূল্যৰ ব্যৱসায়ীসকলে বিগত কেইবামাহো ধৰি প্ৰাপ্য কমিচনৰ ধন লাভ নকৰাৰ অভিযোগ উঠিছে ৷
২০২০ বৰ্ষৰ প্ৰধানমন্ত্ৰী গৰীব কল্যাণ অন্ন যোজনাৰ কেন্দ্ৰীয় অংশত তিনি লাখৰো অধিক টকাৰ বৃহৎ কেলেংকাৰী হোৱাৰ অভিযোগো তোলে সংগঠনটোৱে ৷ জিলা প্ৰশাসনে দুৰ্নীতিকাৰীৰ বিৰুদ্ধে শাস্তিমূলক ব্যৱস্থা গ্ৰহণ কৰাৰ পৰিৱৰ্তে আইনৰ সুৰঙাৰে সুৰক্ষা দিয়াৰহে গুৰুতৰ অভিযোগ কৰে সংগঠনটোৰ বিষয়ববীয়াসকলে৷
খাদ্য অসামৰিক যোগান আৰু গ্ৰাহক পৰিক্ৰমা বিভাগৰ গোৱালপাৰা জিলা বিভাগে ২০২০ আৰু ২০২১ বৰ্ষৰ ভিতৰত ৯ মাহে ৰাজ্যিক অংশ দিবলৈ সক্ষম হোৱা নাই ব্যৱসায়ী সকলক ৷ তাৰোপৰি আঠ মাহ ধৰি ব্যৱসায়ী সকলৰ আইএফচি কোড Fin Assam( বিত্ত বিভাগত ) সঠিক কৰিবলৈ জিলা যোগান বিভাগ ব্যৰ্থ হৈছে বুলিও সংবাদমেলত অভিযোগ কৰা হয়।
গোৱালপাৰা জিলাত যোৱা ২০২১ বৰ্ষৰ জানুৱাৰী মাহত কেন্দ্ৰীয় অংশ ৩,৭৩,৮১,১৯৬ টকা আৰু ২০২২ বৰ্ষৰ মাৰ্চ মাহত প্ৰধানমন্ত্ৰী গৰীৱ কল্যাণ যোজনাৰ নামত মচুৰ দাইল আৰু বুটৰ ট্ৰেন্সপোৰ্ট কমিচন প্ৰায় ২৮,৩০,০৪৪ টকা মোকলাই দিয়াৰ পিছতো জিলা খাদ্য আৰু অসামৰিক যোগান বিভাগে ব্যৱসায়ী সকলক সেই ধন মোকলাই দিয়াত ব্যৰ্থ হৈছে ৷ এয়া বিজেপি মিত্ৰজোঁট চৰকাৰৰ এক কলংক বুলি কয় ব্যৱসায়ীসকলে মন্তব্য কৰে ৷
আনহাতে যোগান বিভাগৰ সঞ্চালকৰ দ্বাৰা আৱণ্টিত ২০২০ বৰ্ষৰ জুলাই, আগষ্ট আৰু ছেপ্তেম্বৰ মাহৰ কেন্দ্ৰীয় অংশ ৯০,৯২,১৮৬ টকাৰ কমিচনৰ ধন অন্তৰ্ধান হোৱাৰো গুৰুতৰ অভিযোগ উত্থাপন কৰে গোৱালপাৰা জিলা সুলভ মূল্য ব্যৱসায়ী সন্থাই ৷ সুলভ মূল্যৰ দোকানী সকলে হিতাধিকাৰীক ১০০ গ্ৰাম চাউল কমকৈ দিলে জে’ললৈ পঠিয়াম বুলি সকিয়নি দিয়া মুখ্যমন্ত্ৰী হিমন্ত বিশ্ব শৰ্মাকো তীব্ৰ প্ৰত্যাহ্বান জনায় সংগঠনটোৱে ৷ ৩১ মাৰ্চৰ ভিতৰত প্ৰাপ্য কমিচন নাপালে অনাগত দিনত জিলা সুলভ মূল্য ব্যৱসায়ী সন্থাই অনিৰ্দিষ্ট কাললৈ খাদ্য সুৰক্ষাৰ চাউল তথা সামগ্ৰী সংগ্ৰহ তথা বিতৰণৰ পৰা বিৰত থকাৰ হুংকাৰ দিয়ে ৷
