ৰাছিয়াই ফ্ৰান্স, ইটালী আৰু স্পেইনৰ ৮৫ গৰাকী কূটনীতিবিদক বহিষ্কাৰ কৰিছে।ৰাছিয়াই ইউক্ৰেইনত সামৰিক অভিযান আৰম্ভ কৰাৰ পিছৰে পৰা ইউৰোপীয় দেশসমূহে ৰাছিয়াৰ কূটনীতিবিদসকলক কেইবাটাও পৰ্যায়ত বহিষ্কাৰ কৰিছে। ইয়াৰ প্ৰত্যুত্তৰত, ৰাছিয়াই পুনৰ প্ৰতিশোধমূলক পদক্ষেপ হিচাপে তিনিখন দেশৰ বিৰুদ্ধে ব্যৱস্থা গ্ৰহণ কৰিছে।
ৰাছিয়াৰ বৈদেশিক মন্ত্ৰালয়ে কূটনীতিবিদসকলক বহিষ্কাৰ কৰাৰ সন্দৰ্ভত এটা বিবৃতি জাৰি কৰিছে। ইয়াত কোৱা হৈছে যে ৩৪ গৰাকী ফৰাচী কূটনীতিবিদক বহিষ্কাৰ কৰা হৈছে। তেওঁলোকক ৰাছিয়া এৰিবলৈ দুসপ্তাহৰ সময় দিয়া হৈছে।
লগতে পঢ়ক: Monkey pox আমেৰিকাত ধৰা পৰিল মাংকি পক্সৰ প্ৰথমটো ঘটনা,কি এই মাংকি পক্স?
ৰাছিয়াত থকা ফ্ৰান্সৰ ৰাষ্ট্ৰদূত পিয়েৰ লেভিক ৰাছিয়াৰ বৈদেশিক মন্ত্ৰালয়ে মাতি আনি কয় যে ফ্ৰান্সৰ পৰা ৪১ গৰাকী ৰাছিয়াৰ কূটনীতিবিদক বহিষ্কাৰ কৰাটো “স্পষ্টভাৱে উচটনিমূলক আৰু অগ্ৰহণযোগ্য সিদ্ধান্ত”।
ৰাছিয়াৰ বৈদেশিক মন্ত্ৰালয়ে পিছত কয় যে স্পেনিছ দূতাবাসৰ ২৭ গৰাকী কৰ্মচাৰীকো অবাঞ্ছিত ঘোষণা কৰা হৈছে।
তেওঁলোকে পৰৱৰ্তী সাত দিনৰ ভিতৰত ৰাছিয়া এৰিব লাগিব। ৰাছিয়াত স্পেইনৰ ৰাষ্ট্ৰদূত মাৰ্কোছ গোমেজ মাৰ্টিনেজক সতৰ্ক কৰি দিয়া হৈছে যে মাদ্ৰিদৰ পৰা ৰাছিয়াৰ কূটনীতিবিদসকলক বহিষ্কাৰ কৰিলে ৰাছিয়া-স্পেইন সম্পৰ্কত বাধা আহিব পাৰে। ইয়াৰ বিপৰীতে, স্পেইনে ৰাছিয়াৰ সিদ্ধান্তক সমালোচনা কৰিছে।
লগতে পঢ়ক: জনপ্ৰতিনিধিৰ কাণ্ড: সাংবাদিকৰ পিঠিত উঠি গ’ল বান বিধ্বস্ত এলেকা চাবলৈ!
ইপিনে, ইটালীৰ ২৪ গৰাকী কূটনীতিবিদকো ৰাছিয়াৰ পৰা বহিষ্কাৰ কৰা হৈছে।
এই সন্দৰ্ভত ৰাছিয়াৰ পৰা কোনো আনুষ্ঠানিক বিবৃতি দিয়া হোৱা নাই যদিও ইটালীয়ে ইয়াৰ কূটনীতিবিদসকলক বহিষ্কাৰ কৰাটো নিশ্চিত কৰিছে।
ৰাছিয়াৰ বৈদেশিক মন্ত্ৰালয়ৰ মুখপাত্ৰ মাৰিয়া জাখাৰোভায়েও ৰাছিয়াৰ সংবাদ মাধ্যমক বাতৰিটো নিশ্চিত কৰিছে। ইটালীৰ প্ৰধানমন্ত্ৰী মাৰিঅ’ দ্ৰাঘিয়ে ৰাছিয়াৰ পদক্ষেপক “প্ৰতিকূল আচৰণ” বুলি বৰ্ণনা কৰিছে।
লগতে পঢ়ক: ফেচবুকত বিপ্লৱী কবিতা লিখি গ্ৰেপ্তাৰ হ’ল যোৰহাটৰ প্ৰতিভাৱান ছাত্ৰী
ইতিমধ্যে ৰাছিয়াৰ ৩০০ তকৈও অধিক কূটনীতিবিদক ইউৰোপীয় দেশৰ পৰা বহিষ্কাৰ কৰা হৈছে। বহুতো দেশে ৰাছিয়াৰ কূটনীতিবিদসকলৰ ওপৰত চোৰাংচোৱাৰ অভিযোগ উত্থাপন কৰিছে। মস্কোৱে অৱশ্যে এনে অভিযোগ অস্বীকাৰ কৰিছে। এইক্ষেত্ৰত ৰাছিয়াইও আৰম্ভণিৰে পৰাই আক্ৰমণাত্মক স্থিতি গ্ৰহণ কৰি আহিছে। ৰাছিয়াই ৪৫ গৰাকী পোলেণ্ডৰ কূটনীতিবিদ আৰু ৪০ গৰাকী জাৰ্মান কূটনীতিবিদকো স্বদেশলৈ ঘুৰাই পঠিয়াইছে।
