বিতৰ্কিত মন্তব্য কৰা নেতাক বিজেপিয়ে অপসাৰণ কৰাৰ পিছতো ক্ষান্ত হোৱা নাই মধ্য প্ৰাচ্যৰ দেশসমূহ। আনহাতে, পয়গম্বৰ মহম্মদকলৈ বিজেপি নেতাৰ বিতৰ্কিত মন্তব্যৰ প্ৰতিক্ৰিয়া অধিক শক্তিশালী আৰু তীব্ৰ হৈ উঠিছে। উপসাগৰীয় ইছলামিক দেশসমূহত অসন্তুষ্টি বৃদ্ধি পাইছে। কাটাৰ, কুৱেইট আৰু ইৰাণে ইতিমধ্যে ভাৰতীয় ৰাষ্ট্ৰদূতক তলব কৰিছে। সামাজিক মাধ্যমত ভাৰতীয় সামগ্ৰী বৰ্জন কৰাৰ বাৰ্তা বিয়পি পৰিছে। বিদেশত ভাৰতৰ ধৰ্মনিৰপেক্ষ নীতি প্ৰশ্নৰ সন্মুখীন হৈছে।
বিজেপিয়ে দলটোৰ ৰাষ্ট্ৰীয় মুখপাত্ৰ নুপুৰ শৰ্মা আৰু দিল্লীৰ সংবাদ মাধ্যমৰ মুৰব্বী নবীন কুমাৰ জিন্দালৰ মন্তব্যকলৈ যে বিতৰ্কৰ সৃষ্টি হ’ব সেইকথা গেৰুৱা বাহিনীয়ে অনুমান কৰিব পাৰিছিল। সেয়ে পৰিস্থিতি অধিক জটিল হোৱাৰ পূৰ্বে বহিষ্কাৰ কৰা হয় দলৰ দুই নেতাক।
বিজেপিয়ে জাৰি কৰা এটা বিবৃতিত কোৱা হৈছে যে ই “সকলো ধৰ্মক সন্মান কৰে” আৰু “যিকোনো ধৰ্মীয় ব্যক্তিৰ অপমানক তীব্ৰ গৰিহণা দিয়ে”।”
কাটাৰে শাসকীয় দলৰ নেতাসকলৰ বিৰুদ্ধে লোৱা ব্যৱস্থা আদৰণি জনাইছে। দেশখনৰ বৈদেশিক পৰিক্ৰমা মন্ত্ৰালয়ৰ বিবৃতিত কোৱা হৈছে, “ভাৰতীয় ৰাষ্ট্ৰদূত দীপক মিট্টালক মাতি পঠোৱা হৈছিল আৰু এটা “চৰকাৰী টোকা প্ৰদান কৰা হৈছে”। ইয়াত পয়গম্বৰ মহম্মদৰ বিৰুদ্ধে ভাৰতৰ শাসকীয় দলৰ দুগৰাকী নেতাই কৰা মন্তব্যৰ ওপৰত অসন্তুষ্টিৰ কথা ব্যক্ত কৰা হৈছে আৰু বিতৰ্কিত মন্তব্য সম্পূৰ্ণ প্ৰত্যাখ্যান তথা গৰিহনা প্ৰকাশ কৰা হৈছে। ‘
বিবৃতিটোত লগতে কোৱা হৈছে, “কাটাৰে এই মন্তব্যৰ বাবে ভাৰত চৰকাৰৰ পৰা ৰাজহুৱাভাৱে ক্ষমা আৰু তাৎক্ষণিক গৰিহনা আশা কৰিছে। এনে ইছলাম বিৰোধী মন্তব্যৰ বাবে শাস্তি নোহোৱাটো মানৱ অধিকাৰৰ সুৰক্ষাৰ বাবে এক গুৰুতৰ ভাবুকি আৰু ইয়ে অধিক কুসংস্কাৰলৈ ঠেলি দিব পাৰে।” ফলত ক্ৰমান্বয়ে ঈৰ্ষা আৰু ঘৃণাৰ পৰিৱেশ সৃষ্টি কৰিব। তদুপৰি, এনেধৰণৰ অপমানজনক মন্তব্যই ধৰ্মীয় বিদ্বেষক উচটনি দিব আৰু বিশ্বজুৰি ২০০কোটিতকৈও অধিক মুছলমানক ক্ষুব্ধ কৰি তুলিব।‘’
উল্লেখ্য যে দুই বিজেপি নেতাৰ বিতৰ্কিত মন্তব্যৰ সময়ত ভাৰতৰ উপ ৰাষ্ট্ৰপতি এম ভেংকায়া নাইডু তিনিদিনীয়া কাটাৰ ভ্ৰমণত আছে।
লগতে পঢ়ক: Nigeria church attack: নাইজেৰিয়াৰ গীৰ্জাত বন্দুকধাৰীৰ নিৰ্বিচাৰ গুলীচালনাত কমেও ৫০ জন নিহত
আনহাতে, ভাৰতত থকা কাটাৰৰ দূতাবাসৰ এক বিবৃতিত কোৱা হৈছে যে বিতৰ্কিত টুইটবোৰ কোনোপ্ৰকাৰে ভাৰত ৰাষ্ট্ৰৰ দ্বাৰা সমৰ্থনযোগ্য নহয়। এইবোৰ প্ৰান্তীয় দৃষ্টিভংগী (ফ্ৰিঞ্জ এলিমেণ্ট)। আমাৰ সভ্যতাৰ পৰম্পৰা আৰু বৈচিত্ৰ্যৰ মাজত একতাৰ এক শক্তিশালী সংস্কৃতি জড়িত। ভাৰত চৰকাৰে সকলো ধৰ্মকে সৰ্বাধিক সন্মান প্ৰদান কৰে।
দূতাবাসৰ বক্তৱ্যত কয়, “যিসকলে অপমানজনক মন্তব্য কৰিছে তেওঁলোকৰ বিৰুদ্ধে ইতিমধ্যে কঠোৰ ব্যৱস্থা গ্ৰহণ কৰা হৈছে। ভাৰত-কাটাৰ সম্পৰ্কৰ বিৰুদ্ধে নিহিত স্বাৰ্থ থকা লোকসকলে এই অপমানজনক মন্তব্য কৰি জনসাধাৰণক উচটনি দিছে। ‘
ইপিনে, তেহৰানেও বিজেপি নেতাৰ মন্তব্যকলৈ অসন্তুষ্টি প্ৰকাশ কৰিছে। বিজেপিয়ে গ্ৰহণ কৰা পদক্ষেপৰ পিছত অৱশ্যে দেওবাৰে নিশালৈকে তেহৰানে কোনো আনুষ্ঠানিক বিবৃতি জাৰি কৰা নাই। ইৰাণৰ বৈদেশিক মন্ত্ৰী হোছেইন আমিৰ আব্দুল্লাহিয়ানে এই সপ্তাহতে ভাৰত ভ্ৰমণ কৰাৰ সম্ভাৱনা আছে।
লগতে পঢ়ক: উত্তৰাখণ্ডত তীৰ্থযাত্ৰী কঢ়িয়াই নিয়া বাছ গভীৰ খাৱৈত পৰি ২৫ জন তীৰ্থযাত্ৰীৰ মৃত্যু
সেইদৰে, পাকিস্তানেও নিজৰ অসন্তুষ্টিৰ কথা প্ৰকাশ কৰিছে। প্ৰধানমন্ত্ৰী শ্বেহবাজ শ্বৰীফে কয়, “মই বাৰে বাৰে কৈছো যে মোডীৰ অধীনত ভাৰতে ধৰ্মীয় স্বাধীনতাক পদদলিত কৰি মুছলমানসকলৰ ওপৰত অত্যাচাৰ কৰি আছে। বিশ্বই এই দিশটো চোৱা প্ৰয়োজন আৰু ভাৰতক কঠোৰভাৱে ভৰ্ৎসনা কৰা উচিত।‘’
