প্ৰাচীন কালৰে পৰা পৰম্পৰাগত অসমীয়া খাদ্যসম্ভাৰ আৰু থলুৱা চিকিৎসা পদ্ধতিত কেতবোৰ ঔষধি গুণসম্পন্ন থলুৱা দ্ৰব্যৰ ব্যৱহাৰ হৈ আহিছে। তাৰে ভিতৰত থেকেৰাও অন্যতম। অসমত বৰ থেকেৰা, কুজি থেকেৰা, ৰূপহী থেকেৰা আদি কেইবাপ্ৰকাৰৰো থেকেৰা পোৱা যায়। ইয়াৰ ভিতৰত ঔষধি হিচাবে কুজি থেকেৰা সাধাৰণতে বেছিকৈ ব্যৱহাৰ হয়।
ইয়াক সংৰক্ষণ কৰিবলৈও সহজ। অতীত কালত থেকেৰাৰ ব্যৱহাৰ বেছি আছিল যেন অনুমান হয়, কাৰণ আমাৰ পূৰ্বপুৰুষসকলে থেকেৰা বিচাৰি আনি ৰ’দত শুকুৱাই ওৰে বছৰটোৰ বাবে সংৰক্ষণ কৰি ৰাখিছিল। সেই সংৰক্ষণ কৰি ৰখা থেকেৰাখিনি তেওঁলোকে বিভিন্ন ব্যঞ্জন বনাওতে আৰু কেতবোৰ ৰোগৰ চিকিৎসাত ঔষধি হিচাপে ব্যৱহাৰ কৰিছিল।
থেকেৰা দিয়া মগু দাইল আৰু সৰু গুটি আলুৰ আঞ্জাখন, থেকেৰাৰে মাছৰ আঞ্জা, থেকেৰা দিয়া পদিনাৰ চাটনিখন অতি তৃপ্তিদায়ক, প্ৰতিজন অসমীয়াৰে প্রিয়। কাঁহুদি বা পানিটেঙা বনাওতে থেকেৰা অকণ লাগিবই।
ইয়াৰ উপৰিও আমাৰ খিলঞ্জীয়া জনজাতিসকলৰ বিভিন্ন ঔষধি ব্যঞ্জনত থেকেৰা ব্যৱহাৰ হোৱা দেখা যায়।
থেকেৰা যিমানে পুৰণি হয় তাৰ ঔষধি গুণাগুণো বেছি হয়। পুৰণি কুজি থেকেৰা বহু ৰোগৰ চিকিৎসাত ব্যৱহাৰ হয়। আমাৰ ককা-আইতাহঁতে থেকেৰাৰ ‘জুৰণি’ খাইছিল। গুৰ আৰু থেকেৰাৰে বনোৱা চৰবত (জুৰণি) খাই তেওঁলোকে গৰম দিনত হোৱা বিভিন্ন ৰোগৰ পৰা উপশম পাইছিল।
কুজি থেকেৰা গছৰ ফলবোৰ জেঠ আহাৰ মহীয়া পুৰঠ হয়। এই পকা ফলবোৰ পাৰি আনি তাৰ ভিতৰৰ গুটিবোৰ উলিয়াই লৈ ওপৰৰ বাকলিবোৰ ভালকৈ ধুই লব লাগে। আঠাজাতীয় পদাৰ্থ থকাৰ বাবে অলপ সময় পানীত তিয়াই ৰাখিব লাগে।
তাৰ পিছত সৰু সৰুকৈ কাটি বাঁহৰ চালনী বা খৰাহীত মেলি লৈ চোকা ৰ’দত কিছুদিন শুকুৱাব লাগে। তাৰ পিছত শুকান থেকেৰা খিনি আইনা বা চিচাৰ বটলত ভৰাই ৰাখিব লাগে।
এনেদৰে থ’লে বহুত বছৰলৈ সেইখিনি থেকেৰা ব্যৱহাৰ কৰিব পাৰি। প্ৰাচীন আয়ুৰ্বেদ চিকিৎসাত কুজি থেকেৰা গ্ৰহণী আদি পেটৰ ৰোগত ব্যৱহাৰ হৈ আহিছে। পৃথিৱীৰ বিভিন্ন দেশৰ বিভিন্ন ব্যঞ্জনত থেকেৰা ব্যৱহাৰ হয়। প্ৰধানকৈ টেঙা ব্যঞ্জন বনাওতে ইয়াৰ ব্যৱহাৰ হয়।
সকলোৰে পৰিচিত কুজি থেকেৰাই কিদৰে স্বাস্থ্য ৰক্ষা আৰু বিভিন্ন ৰোগ নিৰাময় কৰে তাৰ বিষয়ে থুলমূলকৈ উল্লেখ কৰা হৈছে:-
পুৰণি সঞ্চিত গ্ৰহণীত বা ক্ৰনিক ডিচেন্টেৰী, কৌষ্ঠকাঠিন্য, পেট কামোৰণি আদি পেটৰ যিকোনো সমস্যাত কুজি থেকেৰা বৰ উপকাৰী।
ইয়াৰ বাবে দুই এচকল থেকেৰা এগিলাচ পানীত অকণমান তালমিছিৰি দি এৰাতি তিয়াই থব লাগে। পুৱা খালিপেটত চেকনিৰে চেকি লৈ সেইখিনি খাব লাগে। কিছুদিন এনেকৈ খালে পেটৰ ৰোগ নিৰাময় হয়।
প্ৰসাৱ জ্বলা পোৰা কৰা, সঘনাই প্ৰসাৱ হোৱা বা প্ৰসাৱৰ সংক্ৰমণজনীত ৰোগত পুৰণি কুজি থেকেৰা মহৌষধ। দুই তিনি ফুটা পুৰণি থেকেৰা এগিলাচ পানীত তালমিছিৰি দি এৰাতি তিয়াই পিছদিনা খালিপেটত কেইদিনমান চৰবত হিচাবে সেৱন কৰিলে পেচাবৰ যিকোনো সমস্যা সমাধান হয়।
উচ্চ ৰক্তচাপত কুজি থেকেৰা উপকাৰী। উচ্চ ৰক্তচাপ ৰোগীয়ে মাজে মাজে থেকেৰা চৰবত সেৱন কৰা উচিত। ইয়াৰোপৰি দাইল বা অন্য আঞ্জাৰ লগত দুই এফুটা থেকেৰা দি সেৱন কৰিলেও উপকৃত হব।
Also Read : Health benefits of the Indian blackberry: এতিয়া জামু খোৱাৰ বতৰ; তাৰ কেইটামান উপকাৰিতাৰ বিষয়ে জানো আহক
এন্টিঅক্সিডেন্টযুক্ত কুজি থেকেৰাই ফ্ৰি ৰেদিকেলৰ ক্ষতিকাৰক প্ৰভাৱৰ পৰা আমাৰ শৰীৰক ৰক্ষা কৰে। ইয়াত থকা ভিটামিন চি- এ শৰীৰৰ ৰোগ প্ৰতিৰোধ ক্ষমতা বৃদ্ধি কৰে।
ডায়েবেটিচ ৰোগীয়েও মাজে সময়ে থেকেৰা দিয়া ব্যঞ্জন সেৱন কৰি থাকিব পাৰে। কাৰণ ইয়াত প্ৰচুৰ পৰিমাণে ভিটামিন চি আৰু অন্য এন্টিঅক্সিডেন্ট আছে যি শৰীৰৰ বাবে উপকাৰী।
ফেতি লিভাৰ সমস্যাতো থেকেৰা খুব উপকাৰী। পুৱা খালি পেটত থেকেৰাৰ চৰবত সেৱন কৰিলে বহু উপকৃত হ’ব।
প্ৰচুৰ পৰিমাণে ভিটামিন চি থকাৰ বাবে দাঁতৰ সুস্বাস্থ্যৰ বাবে উপকাৰী।
শৰীৰৰ জমা হোৱা অপকাৰী টকচিন্স বা অলাগতিয়াল বৰ্জিত পদাৰ্থ নিষ্কাশন কৰি শৰীৰ শোধন কৰে থেকেৰাৰ চৰবতে। শালমন, ব্ৰন আদি বিভিন্ন ছালৰ সমস্যা থকা লোকে মাজে মাজে থেকেৰা চৰবত সেৱন কৰিলে সুফল পাব।
আমাৰ খাদ্যত প্ৰধানকৈ মিঠা, টেঙা, নিমখীয়া, তিতা, জ্বলা, কেঁহা আদি ছটা ৰস থাকে। প্ৰতিটো ৰসৰে নিজস্ব ঔষধি গুণাগুণ আছে। সেয়েহে আমাৰ থলুৱা খাদ্যসম্ভাৰত প্ৰতিটো ৰসৰ বিবিধ ব্যঞ্জন আছে যিবোৰে আমাৰ শৰীৰৰ ভাৰসাম্য ৰক্ষা কৰি আমাক নিৰোগী কৰি ৰাখে।
থলুৱা খাদ্যসম্ভাৰত থেকেৰা টেঙাৰ দৰে ঔষধি গুণসমৃদ্ধ থলুৱা গৌণ ফলৰ অন্তৰ্ভুক্তিয়ে আমাৰ খাদ্যসম্ভাৰ চহকী কৰি তুলিছে।
Also Read : Hair Loss: চুলি সৰা বা চুলিৰ সমস্যাত ভূগিছে নেকি? তেনেহ’লে চাওক কেনেকৈ নিজৰ চুলি যতনাই ৰাখিব পাৰি
