আৱৰ্জনাৰ গাড়ীত মোডী-যোগীৰ ফটো; ভিডিঅ’ ভাইৰেল হোৱাৰ পিছতেই চাকৰি গ’ল চাফাইকৰ্মীৰ

প্ৰধানমন্ত্ৰী নৰেন্দ্ৰ মোডী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ ফটো আৱৰ্জনাৰ গাড়ীত পেলাই দিয়াৰ এটা ভিডিঅ’ ভাইৰেল হোৱাৰ পিছতেই মথুৰা পৌৰ নিগমত তোলপাৰ লাগে। ঠিকাভিত্তিক চাফাইকৰ্মীজনক দোষী সাব্যস্ত কৰা হয় আৰু তেওঁৰ চাকৰিৰ পৰা বৰ্খাস্ত কৰা হৈছে।

বাতৰি অনুসৰি নিগমৰ এজন চাফাইকৰ্মীয়ে ৰাস্তাৰ পৰা আৱৰ্জনা তুলিছিল। এই আৱৰ্জনাৰ মাজত প্ৰধানমন্ত্ৰী মোডী আৰু মুখ্যমন্ত্ৰী যোগীৰ ফটোও আছিল। এই ছবি বেলেগে নাৰাখি চাফাইকৰ্মীজনে আৱৰ্জনাৰ থূপৰ মাজত ৰাখিছিল।

জানিব পৰা মতে মথুৰাৰ সুভাষ ইণ্টাৰ কলেজৰ ওচৰত ঘটনাটো ঘটিছিল। প্ৰধানমন্ত্ৰী নৰেন্দ্ৰ মোডী আৰু মুখ্যমন্ত্ৰী যোগী আদিত্যনাথৰ আৱৰ্জনাত ফটো পোৱাৰ পিছত কেইজনমান লোক খঙত জ্বলি উঠে। জাৱৰৰ মাজত এই ছবি দেখি তেওঁলোকে অনাময় কৰ্মীজনক বাধা দিয়ে।

অনাময় কৰ্মীজনৰ সৈতে তেওঁলোকৰ  এই বিষয়ে কথা কটাকটি হোৱাৰ পিছত হাতাহাতিৰ পৰ্যায়ত উপনীত হয়। তাৰমাজতে একাংশ লোকে হস্তক্ষেপ কৰে আৰু ফটোবোৰ আৱৰ্জনাৰ পৰা আঁতৰাই নিয়ে।

ইয়াৰে এটা ভিডিঅ’ ছ’চিয়েল মিডিয়াত ভাইৰেল হোৱাৰ পিছত বিষয়টোক লৈ ধুমুহাৰ সৃষ্টি হয়। যেতিয়া ঘটনাটো বিষয়াসকলৰ ওচৰলৈ গৈ পায় তেওঁলোকে অভিযুক্ত চাফাইকৰ্মীজনক চাকৰিৰ পৰা বৰ্খাস্ত কৰে।

A municipal contractual worker has been terminated by Mathura Municipal corporation for carrying discarded photographs of Adityanath and Narendra Modi in a garbage cart.
The worker says he found the photos in a garbage dump. pic.twitter.com/xEUxCJYwRW

— Ravi Nair (@t_d_h_nair) July 17, 2022

বাতৰি অনুসৰি, গুৰু পূৰ্ণিমা উপলক্ষে উত্তৰ প্ৰদেশৰ মথুৰা-বৃন্দাবন ভ্ৰমণ কৰিবলৈ অহা আলৱাৰৰ চিকিৎসক পংকজ গুপ্তা, অশ্বানী জাওৱালী আৰু নৰেশ ধনৱাতে আৱৰ্জনাৰ থুপত মোডী-যোগীৰ ফটো দেখা পায়। তেওঁলোকে আৱৰ্জনাৰ গাড়ীৰ পৰা দুয়োখন ফটো তুলি নিয়ে আৰু পানীৰে ধুই সেইবোৰ পৰিষ্কাৰ কৰে। পিছত ডাঃ পংকজ গুপ্তাই সেই ফটো আলৱাৰত তেওঁৰ কাৰ্যালয়ত ৰাখিছে।