সদৌ অসম ছাত্ৰ সন্থাৰ বঙাইগাঁও জিলা সমিতিৰ উদ্যোগত তথা বঙাইগাঁও আঞ্চলিক ছাত্ৰ সন্থা আৰু বঙাইগাঁও মহাবিদ্যালয় আছু গোটৰ সহযোগত বঙাইগাঁও মহাবিদ্যালয় প্ৰেক্ষাগৃহত এক বিশেষ অভিনন্দন অনুষ্ঠান অনুষ্ঠিত হয় ৷
অনুষ্ঠানত সদ্য ঘোষিত হাইস্কুল শিক্ষান্ত আৰু হাইমাদ্ৰাছাৰ লগতে উচ্চতৰ মাধ্যমিক চূড়ান্ত পৰীক্ষাত স্থান লাভ কৰা আৰু হাইস্কুল শিক্ষান্ত পৰীক্ষাত ডিষ্টিংচনসহ সুখ্যাতিৰে উত্তীৰ্ণ হোৱা ছাত্ৰ -ছাত্ৰী সকলক জিলা ছাত্ৰ সন্থাৰ ফালৰ পৰা সম্বৰ্ধনা জনোৱা হয় ৷ জিলা খনৰ মুঠ ১৪২ গৰাকী কৃতিমানক এই অনুষ্ঠানত গামোচা মানপত্ৰ আৰু গছপুলিৰে সম্বৰ্ধনা জনোৱা হয় ৷
জিলা আছুৰ সভাপতি যিনোদ নাথৰ সভাপতিত্বত অনুষ্ঠিত অনুষ্ঠানত আছুৰ কেন্দ্ৰীয় সমিতিৰ সভাপতি দিপাংক কুমাৰ নাথ, বঙাইগাঁও মহাবিদ্যালয়ৰ অধ্যক্ষ ডঃ দীনেশ দাস, আছুৰ কেন্দ্ৰীয় সমিতিৰ শিক্ষা সম্পাদক ভৱজিৎ বেজবৰুৱা উপস্থিত থাকি জীৱনত সফলতা আহৰণৰ বাবে তথা নিজকে এজন সু নাগৰিক হিচাপে গঢ়ি তোলাৰ ক্ষেত্ৰত কিদৰে আগবাঢ়িব লাগিব সেই সন্দৰ্ভত কৃতিমানসকলক উদ্দেশ্যি বক্তব্য ৰাখে ৷
লগতে শিক্ষা গ্ৰহণৰ বাবে শিক্ষানুষ্ঠান বাচনি কৰাৰ ক্ষেত্ৰত সকলো দিশ চালি জাৰি চোৱাৰ লগতে বৰ্তমান সময়ত কিদৰে আগবাঢ়িলে সফল হ’ব পাৰি সেই বিষয়ে বিজ্ঞজনৰ সুপৰামৰ্শ লৈ আগবাঢ়িবলৈকো আহ্বান জনায় যাতে পিচত সমস্যাৰ সৃষ্টি নহয় ৷ উল্লেখ্য যে জিলা আছুৰ শিক্ষা সম্পাদক কংকন বায়নে আঁতধৰা তথা আদৰণি ভাষণ ৰখা অনুষ্ঠানত আছুৰ কেন্দ্ৰীয় কাৰ্যনিৰ্বাহক সদস্য নিলোৎপল চক্ৰৱৰ্তী আদিও উপস্থিত থাকে ৷
অনুষ্ঠানত হাইস্কুল শিক্ষান্ত পৰীক্ষাত দশম স্থানপ্ৰাপ্ত অনুভৱ কপিল, উচ্চতৰ মাধ্যমিক চূড়ান্ত পৰীক্ষাৰ কলা শাখাত দশম স্থান লাভ কৰা অনন্যা সূত্ৰধৰৰ লগতে হাইস্কুল শিক্ষান্ত পৰীক্ষাত ডিষ্টিংচন লাভ কৰা ছাত্ৰ – ছাত্ৰীসকলক অনুষ্ঠানত উপস্থিত থকা অতিথিসকলে সম্বৰ্ধনা জনায় ৷ আনহাতে হাইমাদ্ৰাছা পৰীক্ষাত দ্বিতীয় স্থান লাভ কৰা মোস্তাক আহমেদৰ হৈ পিতৃয়ে সম্বৰ্ধনা গ্ৰহণ কৰে ৷ ইপিনে অনুষ্ঠানত উপস্থিত থকা আছুৰ সভাপতি দীপাংক কুমাৰ নাথে সংবাদ মাধ্যমৰ আগত কয় যে আছুৰ তৰফৰ পৰা মেধাবী ছাত্ৰ- ছাত্ৰী সকলক প্ৰতি বছৰে এনেদৰে সম্বৰ্ধনা জনাই অহা হৈছে ৷ ইয়াৰ মূলতে হ’ল ছাত্ৰ ছাত্ৰী সকলে যাতে ভৱিষ্যতত ভাল নাগৰিক হ’ব পাৰে লগতে পৰৱৰ্তী পৰীক্ষাত অৱতীৰ্ণ হ’ব লগা ছাত্ৰ- ছাত্ৰীসকলে যাতে উৎসাহ পায় তাৰ বাবে এই অনুষ্ঠান ৰূপায়ণ কৰা হয় ৷ অনুষ্ঠানত সুখ্যাতিৰে উত্তীৰ্ণ হোৱা কৃতিমান ছাত্ৰ – ছাত্ৰীসকলে শিক্ষাগ্ৰহণ কৰা শিক্ষানুষ্ঠানৰ মুৰব্বীসকলোকো সম্বৰ্ধনা জনোৱা হয় ৷
শিল্পী জুবিন গাৰ্গৰ আশু আৰোগ্য কামনা আছুৰ সভাপতি দীপাংক কুমাৰ নাথৰ
চিকিৎসাধীন হৈ থকা অসমৰ জনপ্ৰিয় কন্ঠশিল্পী জুবিন গাৰ্গৰ আশু আৰোগ্য কামনা কৰিছে আছুৱে ৷ বুধবাৰে বঙাইগাঁৱত জিলা আছুই আয়োজন কৰা বিশেষ অভিনন্দন অনুষ্ঠানত উপস্থিত থকা আছুৰ সভাপতি দীপাংক কুমাৰ নাথে সংবাদ মাধ্যমৰ আগত অসমৰ স্বনামধন্য তথা আটাইৰে আদৰৰ আৰু মৰমৰ শিল্পী জুবিন গাৰ্গৰ আশু আৰোগ্য কামনা কৰি সোনকালে সুস্থ হৈ উঠাৰ বাবে ভগবানৰ ওচৰত প্ৰাৰ্থনা জনায় ৷
লগতে পূৰ্বৰদৰে জনপ্ৰিয় গীত আৰু যিবোৰ ব্যক্তিত্বসম্পন্ন বিষয় সেইবোৰ তেওঁ সময়ে সময়ে আমাক প্ৰকাশ কৰি আমাৰ মাজত সংগ্ৰামী চেতনা পুনৰ জগাই তোলাক ৷ আমি মৰ্মাহত হৈছো তেওঁৰ এই ঘটনাত ৷ উল্লেখ্য যে শিল্পীগৰাকী বাথৰূমত পিচলি পৰি মূৰত আঘাত পোৱাৰ ফলত সম্প্ৰতি চিকিৎসাধীন হৈ আছে ৷
