বাৰ্মিংহামত উজলিছে ভাৰতীয় নাৰী শক্তি। চলিত কমনৱেলথ গেমছত দেশৰ কেইবাগৰাকীও মহিলা খেলুৱৈয়ে ভাৰতক পদক উপহাৰ দিয়াৰ পাছত এইবাৰ আন এক পদক নিশ্চিত কৰিছে ভাৰতীয় মহিলা ক্ৰিকেট দলটোৱে।
আজি অনুষ্ঠিত হোৱা ছেমিফাইনেলত এক ৰোমাঞ্চকৰ যুঁজত ইংলেণ্ডক চাৰি ৰাণত পৰাস্ত কৰি কমনৱেলথ গেমছৰ ফাইনেলত উপনীত হৈছে ভাৰত। খেলখনত টচত জয়ী হৈ ভাৰতীয় অধিনায়ক হৰমনপ্ৰীত কৌৰে প্ৰথমে বেটিং কৰাৰ সিদ্ধান্ত লয়।
ইনিংছ মুকলি কৰিয়ে দলৰ অপেনাৰদ্বয় স্মৃতি মান্ধানা আৰু শ্বেফালী বাৰ্মাই ভাৰতক এক বিস্ফোৰক আৰম্ভণি দিয়ে। বিশেষকৈ মান্ধানাই আক্ৰমণাত্মক বেটিঙেৰে প্ৰথমৰ পৰাই ইংলেণ্ডৰ বলিং আক্ৰমণক দিশহাৰা কৰি তোলে।
মাৰমুখী বেটিঙেৰে মান্ধানাই পাৱাৰপ্লে’ চলি থাকোঁতেই সম্পূৰ্ণ কৰে নিজৰ অৰ্ধশতক। দুয়ো অপেনাৰে প্ৰথম উইকেটত ৭৬ ৰান যোগ দিয়াৰ পিছত ব্যক্তিগত ১৫ ৰান স্ক’ৰত বিদায় লয় শ্বেফালীয়ে।
শ্বেফালীৰ উইকেটৰ পিছৰটো অভাৰতে মান্ধানাও আউট হয়। অৱশ্যে আউট হোৱাৰ পূৰ্বে ৩২ বলত ৮ টা চাৰি আৰু ৩ টা ছয়েৰে ৬১ ৰানৰ এক বিস্ফোৰক ইনিংছ খেলে মান্ধানাই।
অধিনায়ক হৰমনপ্ৰীত কৌৰেও ২০ ৰানৰ মূল্যৱান অৱদান আগবঢ়ায়। শেষলৈ দীপ্তি শৰ্মা আৰু জেমিমা ৰড্ৰিগোৱেজে চতুৰ্থ উইকেটত ৫৩ ৰান সংগ্ৰহ কৰি ভাৰতীয় স্ক’ৰ ১৫৯ ৰানলৈ নিয়ে।
দীপ্তি শৰ্মাই ২২ ৰান কৰি বিদায় ল’লেও ৩১ বলত ৭ টা চাৰিৰে ৪৪ ৰান সংগ্ৰহ কৰি অপৰাজিত থাকে জেমিমা। নিৰ্ধাৰিত অভাৰৰ সমাপ্তিৰ পিছত ভাৰতৰ স্ক’ৰ হয়গৈ ৫ উইকেটত ১৬৪ ৰান।
আনহাতে ১৬৫ ৰানৰ জয়ৰ লক্ষ্য অনুসৰণ কৰি ইংলেণ্ডেও শক্তিশালী আৰম্ভণি ঘটায়। দুয়ো অপেনাৰ ছ’ফিয়া ডাঙ্কলী আৰু ডেনিয়েল ৱাইটে মাত্ৰ ২.৫ অভাৰতে ২৮ ৰান সংগ্ৰহ কৰাৰ পিছত ডাঙ্কলীয়ে ১০ বলত ১৯ ৰান কৰি দীপ্তি শৰ্মাৰ চিকাৰ হয়।
আনহাতে আনগৰাকী অপেনাৰ ৱাইটেও ২৭ টা বলত ৩৫ ৰান সংগ্ৰহ কৰে। অধিনায়ক নাটালি চাইভাৰ আৰু এমি জ’নচে ৫৪ ৰান যোগ দি ইংলেণ্ডক জয়ৰ ফালে গতি দিলেও অগা-পিছাকৈ দুয়োগৰাকী ৰান আউট হোৱাৰ পিছত মেচখন ভাৰতৰ পক্ষত পুনৰ ঘূৰি আহে।
অন্তিম অভাৰত ইংলেণ্ডক জয়ৰ বাবে ১৪ ৰানৰ প্ৰয়োজন আছিল যদিও স্নেহ ৰানাৰ অভাৰটোত ৯ ৰানহে সংগ্ৰহ কৰিবলৈ সক্ষম হয় আৰু ৪ ৰানত পৰাজয়বৰণ কৰে।
ভাৰতে এতিয়া কমনৱেলথ স্বৰ্ণ জয়ৰ যুঁজত অষ্ট্ৰেলিয়া আৰু নিউজিলেণ্ডৰ মাজত হ’বলগীয়া দ্বিতীয় ছেমিত জয়ী হোৱা দলটিৰ বিৰুদ্ধে অৱতীৰ্ণ হ’ব।
