বিজেপিৰ “অপাৰেচন লটাছ”ৰ মুখ্য অস্ত্ৰোপচাৰক এতিয়া অসমৰ মুখ্যমন্ত্ৰী হিমন্ত বিশ্ব শর্মা। মঙ্গলবাৰে মুখ্যমন্ত্ৰীক এইদৰে কটাক্ষ কৰে অসম প্ৰদেশ কংগ্ৰেছ কমিটিৰ সভাপতি ভূপেন কুমাৰ বৰাই।
বৰাই কয় “গোপীনাথ বৰদলৈ, হেম বৰুৱা, বিমলা প্ৰসাদ চলিহা, শৰৎ চন্দ্ৰ সিংহ, হিতেশ্বৰ শইকীয়া, তৰুণ গগৈৰ দৰে বৰেণ্য প্রাক্তন মুখ্যমন্ত্ৰী তথা বিশিষ্ট ৰাজনীতিকসকলে অসমক যিদৰে দেশৰ ৰাজনৈতিক ক্ষেত্ৰখনৰ এক সন্মানজনক আসনত প্ৰতিষ্ঠা কৰিছিল, আজি সেই সকলো এফালৰ পৰা ধূলিস্যাৎ কৰি গৈছে বৰ্তমানৰ মুখ্যমন্ত্ৰী হিমন্ত বিশ্ব শৰ্মাই।”
লগতে পঢ়ক: বিহাৰৰ ৰাজনীতিৰ দৃশ্যপট সলনি! এইবাৰ ৰাজ্যপালক লগ কৰিবলৈ সময় বিচাৰিলে নীতিশ কুমাৰে
‘’ঝাৰখণ্ডৰ বিধায়ক কিনা-বেচাৰ ঘৃণনীয় বজাৰখনৰ বেপাৰী হিচাপে নিজৰ পৰিচয় দাঙি ধৰি এইজন বিজেপিৰ মুখ্যমন্ত্ৰীয়ে আজি অসমৰ ৰাইজৰ সকলো মান-সন্মান, মর্যাদা শেষ কৰি পেলালে,”-বৰাই কয়।
বৰাই জানিবলৈ দিয়ে, “ৰাঁচী থানাত ঝাৰখণ্ডৰ বিধায়ক কুমাৰ জয়মংগল (শ্রীঅনুপ সিং)য়ে আজি দাখিল কৰা এজাহাৰত ৰাজ্যখনত ঝাৰখণ্ড মুক্তি মৰ্চা আৰু কংগ্ৰেছৰ সম্মিলিত চৰকাৰখন ভাঙি বিজেপিৰ চৰকাৰ প্ৰতিষ্ঠা কৰিবলৈ যি ষড়যন্ত্ৰ ৰচনা কৰা হৈছে তাৰ মূল কাণ্ডাৰী হিচাপে নাম উল্লেখ কৰিছে অসমৰ মুখ্যমন্ত্ৰী হিমন্ত বিশ্ব শৰ্মাৰ।‘’
‘’এজাহাৰত কোৱা হৈছে যে তেওঁৰ জৰিয়তে প্ৰতিগৰাকী বিধায়কক ১০ কোটিকৈ টকাৰ প্রলোভন দিয়া হৈছে আৰু হিমন্ত বিশ্ব শর্মাই ব্যক্তিগতভাৱে লগ ধৰি নতুন চৰকাৰত তেওঁক প্ৰভাৱশালী মন্ত্রীদপ্তৰ দিয়াৰ নিশ্চিতি দিব বুলিও বিধায়কগৰাকীক প্রস্তাৱ দিয়া হৈছে”-তেওঁ লগতে কয়।
“এনে নীতিহীন, বণিয়াৰ ৰাজনীতিয়ে দেশখনক কোন দিশে লৈ গৈ আছে সেই কথা আজি সকলোৱে উপলব্ধি কৰিছে। অসমৰ সুনাম, খ্যাতি সকলো মষিমূৰ কৰি কেৱল ‘হর্ছ ট্রেডিং ‘ আৰু ‘ক্ৰছ ভোটিং’ৰ ‘মাষ্টাৰ মাইণ্ড’ হিচাপে নিজকে প্ৰতিষ্ঠা কৰি অসমৰ ৰাজনীতিত এক কলংকিত অধ্যায়ৰ সূচনা কৰিলে হিমন্ত বিশ্ব শৰ্মাই,’’-এইদৰে মন্তব্য কৰে বৰাই।
লগতে পঢ়ক: ডোনাল্ড ট্ৰাম্পৰ ফ্ল’ৰিডাৰ ঘৰত এফবিআইৰ অভিযান; চন্দুক ভাঙি বিচাৰিলে নথি!
বৰাই কয়, ‘’অসমৰ প্ৰতিগৰাকী সচেতন নাগৰিকৰ বাবে ই লাজ আৰু অপমানৰ বিষয়। কেনে নিকৃষ্ট ৰাজনীতিৰে জড়িত এজন ব্যক্তিৰ হাতত অসমৰ মুখ্যমন্ত্ৰীৰ আসনখনৰ গৰিমা তথা মর্যাদা হানি হৈছে সেই কথা আজি দেশবাসীৰ সন্মুখত অতি নগ্ন ৰূপত উন্মোচিত হ’ল।”
