অত্যন্ত শোকাৱহ ঘটনা! বিদ্যালয়ৰ ভিতৰত সংঘটিত এক দুৰ্ঘটনাত প্ৰাণ হেৰুৱালে এগৰাকী ২৬ বছৰীয়া বিদ্যালয়ৰ শিক্ষয়ত্ৰীয়ে।
ঘটনাটো সংঘটিত হয় উত্তৰ মুম্বাইত। জেনেল ফাৰ্ণাণ্ডেজ মালাডৰ এখন ব্যক্তিগত ইংৰাজী মাধ্যমৰ বিদ্যালয়ৰ শিক্ষয়ত্ৰী আছিল। শুকুৰবাৰে তেওঁ স্কুলৰ লিফ্টত এক ভয়ংকৰ দুৰ্ঘটনাৰ সন্মুখীন হয়।
লগতে পঢ়ক: মোডীৰ জন্মদিনৰ দিনাই চৰকাৰী কৰ্মচাৰীৰ প্ৰতিবাদত উত্তাল গুজৰাট; স্তব্ধ চৰকাৰী কামকাজ!
আৰক্ষীৰ সূত্ৰ অনুসৰি, সেইদিনা দুপৰীয়া প্ৰায় ১ বজাত তেওঁ বিদ্যালয়ৰ সপ্তম মহলাৰ পৰা দ্বিতীয় মহলাৰ শিক্ষকৰ জিৰণি কোঠালৈ লিফ্টত উঠিবলৈ গৈ আছিল। কিন্তু এটা ভৰি লিফ্টত থ’লে যদিও শৰীৰটো সম্পূৰ্ণৰূপে প্ৰৱেশ কৰাৰ আগতে লিফ্টখন চলিবলৈ আৰম্ভ কৰে।
এনে পৰিস্থিতিত আবদ্ধ হৈ জেনেলে জোৰেৰে চিঞৰিবলৈ ধৰে। বিদ্যালয়খনৰ আন শিক্ষক আৰু কৰ্মচাৰীসকল ঘটনাস্থলীলৈ দৌৰি আহে। এই ঘটনাত তেওঁ গুৰুতৰভাৱে আঘাতপ্ৰাপ্ত হয়। তেওঁক ৰক্তাক্ত অৱস্থাত স্থানীয় এখন চিকিৎসালয়লৈ লৈ যোৱা হয়। কিন্তু তাত চিকিৎসকসকলে জেনেলক মৃত বুলি ঘোষণা কৰে।
লগতে পঢ়ক: Google Mistake: গুগলৰ পৰা হঠাতে একাউণ্টত সোমাল প্ৰায় ২ কোটি টকা! তাৰ পিছত?
ঘটনাটোৰ পিছত বিদ্যালয় চৌহদত শোকৰ ছাঁ পৰিছে। আৰক্ষীয়ে ইতিমধ্যে ঘটনাটোৰ তদন্ত আৰম্ভ কৰিছে। অস্বাভাৱিক মৃত্যুৰ এটা গোচৰ ৰুজু কৰি তদন্ত আৰম্ভ কৰা হৈছে। লিফ্টত কোনো যান্ত্ৰিক বিভ্ৰান্তি হৈছিল নেকি সেয়াও অনুসন্ধান কৰি থকা হৈছে।
