জুৱাৰ নিচাই মানুহক সৰ্বশ্ৰান্ত কৰি জীৱন ধ্বংস কৰি তোলে। তথাপি জুৱাৰ নিচাৰ পৰা মুক্তি লাভ কৰিব নোৱাৰে জুৱাসক্ত লোক। এইদৰে লুডুৰ জুৱা খেলি সৰ্বশ্ৰান্ত হোৱা উত্তৰ প্ৰদেশৰ এগৰাকী মহিলাৰ অভাৱনীয় ঘটনাই তীব্ৰ চাঞ্চল্যৰ সৃষ্টি কৰিছে।
ৰাজ্যখনৰ প্ৰতাপগড়ত এগৰাকী মহিলাৰ লুডুৰ জুৱাত নিজৰ সমুদায় ধনৰাশি হেৰুওৱাৰ পিছত শেষত নিজকে জুৱাৰ বাজী ৰাখি ঘৰৰ মালিকৰ ওচৰত হৈছে।
প্ৰকাশিত খবৰ অনুসৰি মহিলাগৰাকীৰ স্বামীয়ে ৰাজস্থানৰ জয়পুৰত কাম কৰে। স্বামীয়ে নিজৰ উপাৰ্জনৰ ধন প্ৰতাপগড়ত ভাড়া ঘৰ লৈ থকা পত্নীলৈ পঠায়।
কিন্তু ঘৰৰ মালিকৰ লগত নিয়মীয়াকৈ লুডুৰ জুৱা খেলা ৰেণু নামৰ মহিলাগৰাকীয়ে এই টকাৰে জুৱা খেলি শেষ কৰে। ইয়াৰ পাছতো জুৱাৰ নিচাৰ পৰা মুক্ত হ’ব নোৱাৰা মহিলাগৰাকীয়ে শেষত নিজকে জুৱাৰ বাজী হিচাপে আগবঢ়ায় আৰু এই বাজীতো পৰাস্ত হৈ।
উপায়ন্তৰ হৈ মহিলাগৰাকীয়ে স্বামীক ফোন কৰি সমগ্ৰ ঘটনাৰ বিষয়ে অৱগত কৰে। এনে অভাৱনীয় ঘটনাৰ বিষয়ে জানিব পৰি তেওঁ লগে লগে প্ৰতাপগড়ত উপস্থিত হয় আৰু আৰক্ষীৰ ওচৰত এজাহাৰ দাখিল কৰে।
তেওঁ এই সমগ্ৰ কাণ্ডৰ বিষয়ে ছ’চিয়েল মিডিয়া প্লেটফৰ্মতো পোষ্ট কৰিছিল। এই পোষ্টটোও সম্প্ৰতি ভাইৰেল হৈ পৰিছে। ৰেণুৰ স্বামীৰ ভাষ্য মতে, তেওঁ পূৰ্বে দেৱকালি অঞ্চলৰ ভাড়াঘৰত বাস কৰিছিল।
ছমাহ পূৰ্বে তেওঁ জয়পুৰলৈ কাম কৰিবলৈ যায় আৰু নিয়মীয়াকৈ পত্নীলৈ পইচা পঠিয়ায়। কিন্তু এই ধন তেওঁৰ পত্নীয়ে জুৱা খেলত ব্যৱহাৰ কৰাৰ বিষয়ে জানিব পৰা নাছিল বুলি উল্লেখ কৰে।
তেওঁ লগতে জানিবলৈ দিয়া মতে তেওঁলোকৰ দুটা সন্তান আছে। মহিলাগৰাকীয়ে এতিয়া ঘৰৰ মালিকৰ লগত থাকিবলৈ আৰম্ভ কৰিছে আৰু তেওঁক বাৰে বাৰে পুনৰ ঘূৰাই আনিবলৈ চেষ্টা কৰিছে যদিও পত্নী ৰেণু ঘূৰি যাবলৈ মান্তি নহয় বুলি তেওঁ ক্ষোভ প্ৰকাশ কৰিছে।
ইফালে ঘটনা সন্দৰ্ভত এগৰাকী আৰক্ষী বিষয়াই সংবাদ মাধ্যমৰ আগত উল্লেখ কৰা মতে আৰক্ষীয়ে ঘৰৰ মালিকগৰাকীৰ সৈতে যোগাযোগ কৰিবলৈ চেষ্টা কৰিছে আৰু তেওঁৰ সৈতে যোগাযোগ কৰাৰ লগে লগে তদন্ত আৰম্ভ কৰা হ’ব।
