বৰদুৱাৰ বাগানৰ পৰম্পৰাগতভাৱে ভোগদখল কৰি অহা ভূমিৰ পট্টা প্ৰদানৰ ক্ষেত্ৰত চৰকাৰৰ পৰা লিখিত প্ৰতিশ্ৰুতি বিচাৰিছে ৰাভা হাছঙৰ কৃষক-শ্ৰমিকসকলে। একে সময়তে অঞ্চলটোত প্ৰস্তাৱিত চেটেলাইট টাউনশ্বিপ প্ৰকল্প আনুষ্ঠানিকভাৱে বাতিল কৰাৰো দাবী জনাইছে বৰদুৱাৰ বাগান ভূমি পট্টন দাবী সমিতিয়ে। সোমবাৰে গুৱাহাটী প্ৰেছ ক্লাবত এখন সংবাদমেল সম্বোধন কৰি সংগঠনটোৱে এই দাবী উত্থাপন কৰে।
সংবাদমেলত সংগঠনটোৰ হৈ জ্যেষ্ঠ অধিবক্তা শান্তনু বৰঠাকুৰ আৰু মুখ্য আহ্বায়ক গোবিন্দ চন্দ্ৰ ৰাভাই কয় যে, দীৰ্ঘদিন ধৰি বৰদুৱাৰ বাগানৰ বাসিন্দাসকলে নিজৰ ভোগদখলত থকা মাটিৰ পট্টাৰ দাবীত আৰু প্ৰস্তাৱিত চেটেলাইট টাউনশ্বিপৰ বিৰুদ্ধে আন্দোলন চলাই আহিছে। ২০২৫ চনৰ ২৬ মে’ত মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমত কৰা এটা পোষ্ট আৰু বাতৰি কাকতত প্ৰকাশিত গ্ৰ’থ চেণ্টাৰৰ বিজ্ঞাপনে অঞ্চলটোৰ বাসিন্দাসকলৰ মাজত ভূমি হেৰুৱাৰ আশংকা সৃষ্টি কৰিছে বুলিও তেওঁলোকে উল্লেখ কৰে।
সংগঠনটোৰ অভিযোগ অনুসৰি, চৰকাৰৰ বিভিন্ন উচ্চপদস্থ বিষয়াই সময় সময়ে বৰদুৱাৰ বাগানৰ বাসিন্দাসকলক মাটিৰ পট্টা প্ৰদান কৰা হ’ব আৰু অঞ্চলটোত চেটেলাইট টাউনশ্বিপ নিৰ্মাণ কৰা নহ’ব বুলি মৌখিক প্ৰতিশ্ৰুতি দি আহিছে। কিন্তু কেৱল মৌখিক আশ্বাসেৰে ৰাইজৰ শংকা দূৰ হোৱা নাই। সেয়েহে চৰকাৰৰ পৰা স্পষ্ট লিখিত প্ৰতিশ্ৰুতি বিচাৰিছে সংগঠনটোৱে।
সংবাদমেলত তেওঁলোকে কয় যে যোৱা ২৩ অক্টোবৰ, ২০২৬ তাৰিখে বৰদুৱাৰ বাগানত অনুষ্ঠিত এখন সভাত স্থানীয় বিধায়ক, কামৰূপ জিলা আয়ুক্ত আৰু পলাশবাৰী সমজিলা আয়ুক্তৰ উপস্থিতিত ভূমি পট্টা প্ৰদানৰ পূৰ্বে মাটিৰ জৰীপ কৰাৰ কথা কোৱা হৈছিল। ২৯ নং পলাশবাৰী বিধানসভা সমষ্টিৰ বিধায়কগৰাকীয়ে অঞ্চলটোৰ তিনিখন ৰাজহ গাঁৱৰ প্ৰতিগৰাকী ভোগদখলকাৰীক তেওঁলোকে দখল কৰি থকা মাটিৰ পট্টা প্ৰদান কৰা হ’ব বুলিও ৰাজহুৱাভাৱে ঘোষণা কৰিছিল।
২৩ অক্টোবৰৰ সেই সভালৈ বৰদুৱাৰ বাগান ভূমি পট্টন দাবী সমিতিক আমন্ত্ৰণ জনোৱা হোৱা নাছিল বুলি উল্লেখ কৰি সংগঠনটোৱে কয় যে, তথাপি মাটিৰ জৰীপৰ জৰিয়তে পট্টা প্ৰদানৰ বাবে লোৱা সিদ্ধান্তক তেওঁলোকে আদৰণি জনাইছে। অৱশ্যে জৰীপৰ কাম আৰম্ভ কৰাৰ পূৰ্বে কেইটামান বিষয়ত চৰকাৰৰ স্পষ্ট স্থিতি বিচাৰিছে অঞ্চলটোৰ ৰাইজে।
সংগঠনটোৰ দাবী, জৰীপ আৰম্ভ কৰাৰ আগতেই পৰম্পৰাগতভাৱে ভোগদখল কৰি অহা মাটিৰ পট্টা প্ৰদান কৰা হ’ব বুলি চৰকাৰে লিখিত প্ৰতিশ্ৰুতি দিব লাগিব। পট্টা প্ৰদানৰ জৰিয়তে সেই ভূমিৰ ওপৰত বাসিন্দাসকলৰ আইনগত অধিকাৰ সুৰক্ষিত কৰাৰ নিশ্চয়তাও বিচাৰিছে তেওঁলোকে। ইয়াৰ লগতে বৰদুৱাৰ বাগানত প্ৰস্তাৱিত চেটেলাইট টাউনশ্বিপ প্ৰকল্প আনুষ্ঠানিকভাৱে বাতিল কৰি উপায়ুক্তৰ কাৰ্যালয়ৰ পৰা এই সন্দৰ্ভত লিখিত প্ৰতিশ্ৰুতি দিয়াৰ দাবী জনাইছে।
ভূমি আৱণ্টন সন্দৰ্ভত চৰকাৰৰ শেহতীয়া বক্তব্যক লৈও প্ৰশ্ন উত্থাপন কৰিছে সংগঠনটোৱে। তেওঁলোকৰ মতে, ১৯৬৪ আৰু ১৯৭৪ চনত বান আৰু গৰাখহনীয়াত ক্ষতিগ্ৰস্ত লোকসকলক বৰদুৱাৰ বাগানত ভূমি আৱণ্টন দিয়া হৈছিল। সেই সময়ত চৰকাৰে বাগান কৰ্তৃপক্ষৰ পৰা ভূমি ক্ৰয় নকৰাকৈয়ে এই আৱণ্টন কৰিছিল। তেনে অৱস্থাত ২৩ অক্টোবৰৰ সভাত স্থানীয় বিধায়কে অসম চৰকাৰে বাগান কৰ্তৃপক্ষৰ পৰা ভূমি ক্ৰয় কৰি পট্টা প্ৰদান কৰিব বুলি কোৱা কথাৰ আঁৰৰ কাৰণ স্পষ্ট কৰিবলৈ দাবী জনাইছে সমিতিয়ে।
ইয়াৰ উপৰি জনজাতিসকলৰ সাংবিধানিক সুৰক্ষাৰ অন্যতম ব্যৱস্থা জনজাতি আৱেষ্টনী আৰু খণ্ডৰ সম্পূৰ্ণ সুৰক্ষা নিশ্চিত কৰাৰো দাবী উত্থাপন কৰিছে সংগঠনটোৱে। চেটেলাইট টাউনশ্বিপক লৈ বৰ্তমানেও বিভিন্ন চৰকাৰী কাৰ্যালয়ত শুনানি প্ৰক্ৰিয়া চলি থকা বুলি উল্লেখ কৰি তেওঁলোকে কয় যে, জনজাতি পৰিক্ৰমা সঞ্চালক, কামৰূপ জিলা আয়ুক্তৰ কাৰ্যালয় আৰু ৰাভা হাছং স্বায়ত্তশাসিত পৰিষদৰ কাৰ্যালয়ত এই সন্দৰ্ভত সমিতিৰ সৈতে শুনানি চলি আছে।
সংগঠনটোৱে লগতে সদৰী কৰে যে, ৰাষ্ট্ৰীয় অনুসূচিত জনজাতি আয়োগে এই বিষয়ত অসম চৰকাৰক ১৫ দিনৰ ভিতৰত উত্তৰ দাখিল কৰিবলৈ নিৰ্দেশ দিছিল। কিন্তু এই নিৰ্দেশৰ পাছত অসম চৰকাৰে উত্তৰ দাখিল কৰিলেনে নাই আৰু বৰ্তমান এই বিষয়ত চৰকাৰৰ স্থিতি কি, সেই কথা ৰাজহুৱাভাৱে প্ৰকাশ কৰিবলৈও দাবী জনাইছে সমিতিয়ে।
সংবাদমেলত সংগঠনটোৱে অভিযোগ কৰে যে, গণতান্ত্ৰিক দেশৰ নাগৰিক হিচাপে বৰদুৱাৰ বাগানৰ ৰাইজে নিজৰ ভূমিৰ অধিকাৰ সন্দৰ্ভত চৰকাৰৰ পৰা স্পষ্ট নিশ্চয়তা বিচৰাটো সম্পূৰ্ণ ন্যায়সংগত। তেওঁলোকৰ মতে, এয়া অঞ্চলটোৰ বাসিন্দাসকলৰ দীৰ্ঘদিনীয়া প্ৰাপ্য অধিকাৰৰ বিষয়।
ইফালে, যোৱা ২৯ অক্টোবৰত আয়োজন কৰা গুৰুত্বপূৰ্ণ সমাৱেশখন প্ৰশাসনৰ অনুৰোধত বাতিল কৰা বুলি সদৰী কৰে সংগঠনটোৱে। সকলো প্ৰস্তুতি সম্পূৰ্ণ হোৱাৰ পাছতো প্ৰশাসনৰ অনুৰোধৰ প্ৰতি সঁহাৰি জনাই সমাৱেশ বাতিল কৰা বুলি উল্লেখ কৰি তেওঁলোকে প্ৰশাসনৰ বিৰুদ্ধে বৈষম্যমূলক আচৰণৰ অভিযোগ উত্থাপন কৰে। সংগঠনটোৰ প্ৰশ্ন, বিজেপিয়ে ৰাজপথত সভা-সমাৱেশ আৰু ৰেলী অনুষ্ঠিত কৰিব পাৰে, অথচ সাধাৰণ ৰাইজে নিজৰ ভূমিৰ অধিকাৰক লৈ আলোচনা কৰিবলৈ বিচাৰিলেও কিয় প্ৰশাসনে বাধা প্ৰদান কৰে?
বৰদুৱাৰ বাগানৰ ৰাইজৰ ভূমিৰ অধিকাৰ সুৰক্ষিত কৰা আৰু তেওঁলোকৰ দাবীসমূহৰ ন্যায়সংগত সমাধানৰ বাবে অসম চৰকাৰ তথা সংশ্লিষ্ট কৰ্তৃপক্ষক অতি শীঘ্ৰে প্ৰয়োজনীয় ব্যৱস্থা গ্ৰহণ কৰিবলৈ আহ্বান জনাইছে বৰদুৱাৰ বাগান ভূমি পট্টন দাবী সমিতিয়ে।
