ৰাজস্থানৰ যোধপুৰত এখন বিবাহথলীত সংঘটিত ভয়াৱহ চিলিণ্ডাৰ বিস্ফোৰণত দুটি শিশুসহ চাৰিগৰাকী লোকৰ মৃত্যু হোৱাৰ লগতে প্ৰায় ৬০ গৰাকী নিমন্ত্ৰিত অতিথি আহত হয়।
বিয়াৰ আহাৰ ৰন্ধা ঠাইত থকা পাঁচটাকৈ চিলিণ্ডাৰৰ গেছ লিক হোৱাৰ ফলত এই শক্তিশালী বিস্ফোৰণ সংঘটিত হয় বুলি জানিব পৰা গৈছে।
এই ভয়াৱহ বিস্ফোৰণে বিবাহথলীত মুহূৰ্তৰ ভিতৰতে আতংকৰ সৃষ্টি কৰে। বিস্ফোৰণৰ ফলত বিয়া অনুষ্ঠিত হোৱা মণ্ডপৰ এটা অংশও ভাঙি পৰে।
এই মৰ্মান্তিক ঘটনা সংঘটিত হোৱাৰ সময়ত বহু লোকে খাদ্য গ্ৰহণ কৰি আছিল। বিস্ফোৰণত বিবাহত বহিবলগীয়া দৰাগৰাকীও কিছু পৰিমাণে আহত হয়।
এই ঘটনাৰ খবৰ লাভ কৰাৰ লগে লগে জিলা উপায়ুক্ত হিমাংশু গুপ্তা আৰু গ্ৰাম্য আৰক্ষী অধীক্ষক অনিল কায়াল ঘটনাস্থলীত উপস্থিত হয়।
জিলা উপায়ুক্ত হিমাংশু গুপ্তাই ঘটনা সন্দৰ্ভত কয়, “এয়া অত্যন্ত ভয়াৱহ দুৰ্ঘটনা। আহত ৬০ গৰাকীৰ ভিতৰত ৪২ গৰাকীক এম জি এইচ হাস্পতাললৈ প্ৰেৰণ কৰা হৈছে। আহতসকলৰ চিকিৎসা চলাই থকা আছে।”
ইফালে আহতসকলৰ স্বাস্থ্যৰ অৱস্থাৰ বুজ ল’বলৈ স্থানীয় বিধায়িকা মীনা কানৱাৰ চিকিৎসালয়ত উপস্থিত হয়। প্ৰকাশিত খবৰ অনুসৰি আহতসকলৰ ভিতৰত ১২ গৰাকী লোক গুৰুতৰভাৱে অগ্নিদগ্ধ হৈছে।
ৰাজ্যৰ মুখ্যমন্ত্ৰী অশোক গেহলটে আজি সন্ধিয়া চিকিৎসালয়ত আহতসকলক সাক্ষাৎ কৰাৰ সম্ভাৱনা আছে।
