শ্ৰীলংকাৰ নৌসেনাই ভাৰত মহাসাগৰত ওপঙি থকা ট্ৰলাৰৰ পৰা ১০৪ গৰাকী ৰোহিংগীয়া মহিলা, পুৰুষ আৰু শিশুক উদ্ধাৰ কৰিছে। স্থানীয় সময় অনুসৰি দেওবাৰে নিশা শ্ৰীলংকাৰ উত্তৰ উপকূলৰ পৰা ৰোগিংগীয়া সকলক উদ্ধাৰ কৰিবলৈ সক্ষম হয় শ্ৰীলংকাৰ নৌ সেনা। শ্ৰীলংকাৰ নৌসেনাৰ মুখপাত্ৰ গায়ন উইক্ৰামছুৰিয়াই এই কথা সদৰী কৰিছে।
উইক্ৰামছুৰিয়াই কয় যে এই উদ্ধাৰ হোৱা ৰোহিংগীয়াসকলক আৰক্ষীৰ হাতত গতাই দিয়া হৈছে। সোধাপোচাৰ পিছত আদালতত হাজিৰ কৰোওৱা হ’ব নাগৰিক সকলক। লগতে নৌসেনাৰ বিষয়াজনে কয় যে নৌসেনাৰ সদস্যসকলে শ্ৰীলংকাৰ উত্তৰ উপকূলৰ পৰা প্ৰায় ৭ কিলোমিটাৰ (৩.৫ নটিকেল মাইল) দূৰত্বত ট্ৰলাৰখন ওপঙি থকা দেখিছিল।
জানিব পৰা মতে ৰোহিংগীয়াৰ নাগৰিক সকলক কঢ়িয়াই অনা জাহাজ খনৰ ইঞ্জিন ভাঙি গৈছিল। প্ৰাথমিক তদন্ত অনুসৰি ম্যানমাৰৰ আৰাকান উপকূলৰ পৰা ইণ্ডোনেছিয়ালৈ যাত্ৰা কৰিছিল ৰহিংগীয়াসকলে। নৌসেনাৰ বিবৃতি অনুসৰি ট্ৰলাৰৰ ইঞ্জিন বিকল হোৱাৰ পিছতে সাগৰত ওপঙি আছিল ৰহিংগীয়াসকল।
উপঙি থকা ট্ৰলাৰখনত ৩৯ গৰাকী মহিলা, ২৩ গৰাকী শিশু আৰু ৮০ গৰাকী বয়সস্থ লোক আছিল। সাগৰৰ বুকুত সকলো অসুস্থ হৈ পৰিছিল। উদ্ধাৰৰ পিছত এই ৰোহিংগীয়াসকলক চিকিৎসালয়ত ভৰ্তি কৰোৱা হৈছে বুলি জানিবলৈ দিছে শ্ৰীলংকাৰ নৌসেনাৰ বিষয়াই।
