পাকিস্তানৰ পঞ্জাৱ বিশ্ববিদ্যালয়ত হোলী উদযাপন কৰা ছাত্ৰ-ছাত্ৰীক আক্ৰমণ কৰিছে এটা ইছলামিক সংগঠনে। এই আক্ৰমণত ১৫ গৰাকী বিশ্ববিদ্যালয়ৰ শিক্ষাৰ্থী আহত হৈছে। বিশ্ববিদ্যালয় প্ৰশাসনৰ অনুমতি সাপেক্ষে হোলী উদযাপন কৰি থকা অৱস্থাত ইছলামী জমিয়ত তুলবা (আই জে টি)ৰ সদস্যই অতৰ্কিতে আক্ৰমণ কৰে। এই আক্ৰমণৰ ঘটনাৰ কেইবাটাও ভিডিঅ’ ছ’চিয়েল মিডিয়াতো ভাইৰেল হৈ পৰিছে। ভিডিঅ’সমূহত দেখা গৈছে যে হিন্দু সম্প্ৰদায়ৰ ছাত্ৰ-ছাত্ৰীক হোলী আয়োজন কৰাৰ বাবে আক্ৰমণ কৰা হৈছিল।
কিছুমান ভিডিঅ’ত দেখা গৈছে যে নিৰাপত্তাৰক্ষীয়ে ছাত্ৰ-ছাত্ৰীক লাঠিৰে প্ৰহাৰ কৰিছে। সিন্ধ পৰিষদৰ সাধাৰণ সম্পাদক কাচিফ ব্ৰহীয়ে পাকিস্তানৰ ড’ন কাকতক জনোৱা অনুসৰি পাকিস্তানৰ বিশ্ববিদ্যালয়খনৰ প্ৰশাসনৰ পৰা অনুমতি লৈ হিন্দু সম্প্ৰদায় আৰু পৰিষদৰ সদস্যসকলে হোলী আয়োজন কৰিছিল।
তেওঁ কয় যে ছাত্ৰ-ছাত্ৰীসকলে তেওঁলোকৰ ফেচবুক পেজত হোলী উদযাপনৰ নিমন্ত্ৰণী পত্ৰ পোষ্ট কৰাৰ পিছতে আইজেটিৰ কৰ্মীসকলে তেওঁলোকক ভাবুকি দিবলৈ আৰম্ভ কৰে। তেওঁৰ মতে, সোমবাৰে পুৱা সিন্ধ পৰিষদৰ সদস্য আৰু হিন্দু সম্প্ৰদায়ৰ লোকসকলে পি ইউ ল’ কলেজৰ বাহিৰত হোলী উদযাপনৰ বাবে সমবেত হৈছিল, তেতিয়া আইজেটিৰ কৰ্মীসকলে তেওঁলোকক বন্দুক আৰু লাঠিৰে আক্ৰমণ কৰিছিল।
ব্ৰহীয়ে কয় যে এই সংঘৰ্ষৰ সময়ত হিন্দু সম্প্ৰদায় আৰু সিন্ধ পৰিষদৰ ১৫ গৰাকী ছাত্ৰ-ছাত্ৰী আহত হৈ অনুষ্ঠানটো উদযাপন নকৰাকৈয়ে গুচি যায়। ইয়াৰ পিছতে উপাচাৰ্যৰ কাৰ্যালয়ৰ বাহিৰত ছাত্ৰ-ছাত্ৰীসকলে সমবেত হৈ এই ঘটনাৰ প্ৰতিবাদ কৰে আৰু তেতিয়াই নিৰাপত্তাৰক্ষীয়ে লাঠি লৈ আহি ছাত্ৰ-ছাত্ৰীক প্ৰহাৰ কৰিবলৈ আৰম্ভ কৰে।
একে সময়তে আইজেটিৰ মুখপাত্ৰ ইব্ৰাহিম শ্বাহিদে কয় যে তেওঁ হিন্দু সম্প্ৰদায়ৰ সদস্যসকলক হোলী উদযাপন কৰাত বাধা দিয়া নাছিল। তেওঁ কয় যে আক্ৰমণকাৰীয়ে হয়তো সংগঠনৰ নাম ব্যৱহাৰ কৰি এই কাণ্ড সংঘটিত কৰিছে।
তেওঁ কয় যে নিৰাপত্তাৰক্ষীয়ে হয়তো ছাত্ৰ-ছাত্ৰীক আক্ৰমণ কৰিছিল, কিন্তু ইয়াৰ লগত আইজেটিৰ কোনো সম্পৰ্ক নাই। তেওঁ কয় যে চৌহদত দাৰ-ই-কুৰাণৰ আয়োজন কৰি থকাৰ বাবে এই ঘটনাৰ সময়ত তেওঁ উপস্থিত নাছিল। পাঞ্জাৱ বিশ্ববিদ্যালয়ৰ এগৰাকী মুখপাত্ৰই কয় যে সংখ্যালঘু সম্প্ৰদায়ৰ লোকক আক্ৰমণৰ লগত জড়িত ছাত্ৰ-ছাত্ৰীৰ বিৰুদ্ধে ব্যৱস্থা গ্ৰহণ কৰা হ’ব।
