উত্তৰ-পূব অঞ্চলৰ গুৱাহাটীত প্ৰথমখন সৰ্বভাৰতীয় চিকিৎসা বিজ্ঞান প্ৰতিষ্ঠান (এইমছ) উদ্বোধন কৰি প্ৰধানমন্ত্ৰী নৰেন্দ্ৰ মোদীয়ে একপ্ৰকাৰ ২০২৪ৰ লোকসভাৰ নিৰ্বাচনৰ প্ৰচাৰ আৰম্ভ কৰিলে। শুকুৰবাৰে এইমছ গুৱাহাটীৰ চৌহদ উদ্বোধন কৰি দেশৰ স্বাস্থ্য আন্তঃগাঁথনি উন্নীতকৰণৰ বাবে পূৰ্বৰ চৰকাৰসমূহে কোনো কাম কৰা নাই বুলি দাবী কৰিল প্ৰধানমন্ত্ৰী মোদীয়ে।
প্ৰধানমন্ত্ৰী মোদীয়ে কয় যে, ১৯৫০ চনৰ ভিতৰত দিল্লীত প্ৰথমখন এইমছ নিৰ্মাণ কৰা হৈছিল। দেশৰ চুক-কোণৰ পৰা মানুহ চিকিৎসাৰ বাবে এইমছ দিল্লীলৈ গৈছিল, কিন্তু কোনো চৰকাৰে সমগ্ৰ দেশতে এইমছ কেম্পাছ স্থাপন কৰাৰ প্ৰয়োজনীয়তা বুজি পোৱা নাছিল।
মোদীৰ মতে, অটল বিহাৰী বাজপেয়ী চৰকাৰেই আন চহৰত এইমছ নিৰ্মাণৰ উদ্যোগ লৈছিল। ২০০৪ চনত বাজপেয়ীৰ চৰকাৰ পতনৰ পিছত এই প্ৰকল্পসমূহ স্থবিৰ হৈ পৰিছিল আৰু ২০১৪ চনৰ পিছত কেন্দ্ৰত বিজেপি ক্ষমতালৈ অহাৰ পিছত সমগ্ৰ দেশতে এইমছ স্থাপনৰ প্ৰক্ৰিয়া আৰম্ভ হৈছিল বুলি জাহিৰ কৰে প্ৰধানমন্ত্ৰী মোদীয়ে।
আমি ১৫ খন এইমছ কেম্পাছ নিৰ্মাণৰ কাম আৰম্ভ কৰিলোঁ, আৰু আজি ইয়াৰে কমেও ৫০ শতাংশতকৈও অধিক কাৰ্যক্ষম বুলিও তেওঁ কয়। চিকিৎসা পাঠ্যক্ৰমৰ পাঠদান আৰু চিকিৎসা প্ৰদান সেই প্ৰতিষ্ঠানবোৰত আৰম্ভ হৈছিল। প্ৰধানমন্ত্ৰীয়ে গুৱাহাটীত ষ্টেট অৱ দ্য আৰ্ট হাস্পতালৰ আধাৰশিলা স্থাপনৰ লগতে অসমত তিনিখন নতুন চিকিৎসা মহাবিদ্যালয় উদ্বোধন কৰে।
বিৰোধীক লক্ষ্য কৰি মোদীয়ে কয় যে পূৰ্বৰ চৰকাৰসমূহৰ ভুল নীতিৰ বাবে স্বাস্থ্যসেৱা ব্যৱস্থাৰ পতন ঘটিছে। তেওঁৰ মতে, দেশত ইয়াৰ পূৰ্বে চিকিৎসা পেছাদাৰীত্ব তীব্ৰ নাটনি হৈছিল।
মোদীয়ে উল্লেখ কৰিছে, ২০১৪ চনৰ আগতে দেশত মাত্ৰ ১৫০ খন চিকিৎসা মহাবিদ্যালয় আছিল। যোৱা ৯ বছৰত বিজেপি নেতৃত্বাধীন চৰকাৰে সেই অঞ্চলত গুৰুত্ব দিছে। আমি ৩০০খন নতুন চিকিৎসা মহাবিদ্যালয় নিৰ্মাণ কৰিছেো এতিয়া এম বি বি এছৰ পাঠ্যক্ৰমত এক লাখৰো অধিক আসন আছে। পিজিৰ আসনসমূহো বৃদ্ধি কৰা হৈছে। লগতে তেওঁ কয় যে এই সংখ্যা আৰু অধিক বৃদ্ধিৰ কাম চলি আছে।
মুঠৰ ওপৰত প্ৰধানমন্ত্ৰী মোদীয়ে তেওঁৰ কাৰ্যকালতে সমগ্ৰ দেশৰ বিকাশ তৰান্বিত হোৱাৰ বুলি আত্মজাহিৰ কৰি গুৱাহাটীত ২০২৪ৰ লোকসভাৰ নিৰ্বাচনৰ প্ৰচাৰেই আৰম্ভ কৰি গ’ল বুলি ক’লেও অত্যুক্তি কৰা নহ’ব।
