অন্য এক জঘন্য হত্যাকাণ্ড পোহৰলৈ আহিছে। মানৱ সমাজক লজ্জানত কৰা এই হত্যাকাণ্ডটো সংঘটিত হৈছে মহাৰাষ্ট্ৰত।
সংবাদ মাধ্যমত প্ৰকাশিত খবৰ অনুসৰি মহাৰাষ্ট্ৰৰ পুনেৰ এজন লোকে প্ৰেমিকাৰ শিশু পুত্ৰক অতি নৃশংসভাৱে হত্যা কৰিছে।
আৰক্ষীয়ে প্ৰকাশ কৰা মতে পুনেৰ খেদ নামৰ অঞ্চলৰ বাসিন্দা বিক্ৰম শাৰদ কোলেকাৰৰ মৃত শিশুটিৰ মাতৃৰে অবৈধ সম্পৰ্ক আছিল। সেই সূত্ৰে অভিযুক্ত বিক্ৰম শাৰদ কোলেকাৰে প্ৰায় প্ৰেয়সীৰ ঘৰলৈ গৈছিল। অভিযুক্ত বিক্ৰমে যোৱা ৬ এপ্ৰিলৰ পুৱাও প্ৰেমিকাৰ ঘৰলৈ যায় আৰু মাতৃয়ে পুত্ৰক প্ৰমিক বিক্ৰমৰ তত্বাৱধানত থৈ বাহিৰলৈ ওলাই যায়।
সেই সময়তে প্ৰেমিক বিক্ৰমে শিশুটিক উতলা গৰম পানীৰে ভৰ্তি এটা পাত্ৰত ডুবাই হত্যাৰ চেষ্টা কৰে। মাতৃয়ে ঘৰলৈ আহি দগ্ধ অৱস্থাত শিশুটিক উদ্ধাৰ কৰি চিকিৎসালয়ত ভৰ্তি কৰে। কিন্তু গৰম পানীত শৰীৰটো সম্পূৰ্ণৰূপে দগ্ধ হোৱা শিশুটি চিকিৎসাধীন অৱস্থাতে ১৫ দিনৰ পিছত কৰুণভাৱে মৃত্যুক আকোৱালি লয়।
ইতিমধ্যে ঘটনা সন্দৰ্ভত শিশুটিৰ মাতৃগৰাকীয়ে অভিযুক্ত প্ৰেমিকৰ বিৰুদ্ধে আৰক্ষী থানাত এজাহাৰ দাখিল কৰিছে। উক্ত এজাহাৰৰ ভিত্তিতে আৰক্ষীয়ে অভিযুক্ত বিক্ৰম শাৰদ কোলেকাৰক গ্ৰেপ্তাৰ কৰি ঘটনাৰ সন্দৰ্ভত তদন্ত আৰম্ভ কৰিছে।
আৰক্ষীয়ে প্ৰকাশ কৰা মতে মহিলাগৰাকীয়ে বিবাহ বিচ্ছেদিত আৰু স্বামীৰ পৰা পৃথকে বাস কৰি আহিছে। মহিলাগৰাকীৰ মতে বিক্ৰমেৰে বিবাহপাশত আৱদ্ধ হ’বলৈ অস্বীকাৰ কৰি অহাৰ বাবে প্ৰেমিকে তেওঁৰ শিশু পুত্ৰক হত্যা কৰিছে।
আৰক্ষীয়ে সদৰী কৰা মতে অভিযুক্ত বিক্ৰমে প্ৰেমিকাৰ ভগ্নীকো আক্ৰমণ কৰাৰ ভাবুকি প্ৰদান কৰি আহিছে।
