সাম্প্ৰদায় ভিত্তিক সংঘাত আৰু অস্থিৰতা দূৰ কৰি কৰ্ণাটকৰ মন্ত্ৰীসভা সম্প্ৰসাৰণ কৰিলে মুখ্যমন্ত্ৰী সিদ্ধাৰমাইয়াই। শনিবাৰে কানাড়া ৰাজ্যৰ মন্ত্ৰী হিচাপে একেলগে শপত গ্ৰহণ কৰে ২৪ গৰাকী মন্ত্ৰীয়ে। মুখ্যমন্ত্ৰী সিদ্ধাৰমাইয়া আৰু উপ-মুখ্যমন্ত্ৰী ডি কে শিৱকুমাৰৰ উপস্থিতিত মন্ত্ৰীসকলে শপত গ্ৰহণ কৰে।
উল্লেখ্য, মুখ্যমন্ত্ৰী আৰু উপ-মুখ্যমন্ত্ৰীৰ সৈতে একেদিনাই মন্ত্ৰী হিচাপে শপত গ্ৰহণ কৰিছিল ৮ গৰাকী জ্যেষ্ঠ মন্ত্ৰীয়ে। আজি ২৪ গৰাকীয়ে শপত গ্ৰহণ কৰাৰ লগে লগে কৰ্ণাটকৰ সিদ্দাৰমাইাৰ কেবিনেটৰ মন্ত্ৰীৰ ৩৪ গৰাকীলৈ বৃদ্ধি পালে।
দুয়োটা ফৈদৰ অৰ্থাৎ মুখ্যমন্ত্ৰী সিদ্দাৰমাইয়া আৰু উপ মুখ্যমন্ত্ৰী শিৱকুমাৰৰ সৈতে সমানে কেবিনেট গঠন কৰাটো যথেষ্ট প্ৰত্যাহ্বানজনক আছিল। সম্ভৱতঃ এই জটিলতাৰ বাবেই দলৰ শীৰ্ষ নেতৃত্বৰ সৈতে যৌথভাৱে দিল্লীত নতুন মন্ত্ৰীৰ নাম ঘোষণা কৰাৰ সিদ্ধান্ত লোৱা হয়। কংগ্ৰেছৰ শীৰ্ষ নেতৃত্বও মন্ত্ৰীসভা গঠনত সকলো ধৰ্ম আৰু সম্প্ৰদায়ক যথাযথ গুৰুত্ব দিয়াটো বিছাৰিছিল।
কৰ্ণাটকৰ নতুন মন্ত্ৰীসভাত প্ৰধান সম্প্ৰদায় লিংগায়তৰ পৰা ৬ গৰাকী মন্ত্ৰীক অন্তৰ্ভুক্ত কৰা হৈছে আছে। লিংগায়তৰ প্ৰতিটো উপ-সম্প্ৰদায়ৰো একোগৰাকীক মন্ত্ৰীসভাত স্থান দিয়া হৈছে। নতুন মন্ত্ৰীসভাত ডি কে শিৱকুমাৰৰ নিজৰ ভোক্কালিগা সম্প্ৰদায়ৰ ৪ গৰাকী প্ৰতিনিধি আছে। তিনিজন অনুসূচিত জাতিৰ, দুজন অনুসূচিত জনজাতিৰ। পাঁচগৰাকী হৈছে অন্যান্য পিছপৰা জাতিৰ। মুছলমান, ব্ৰাহ্মণ, উচ্চ বৰ্ণৰ প্ৰতিটো সম্প্ৰদায়ৰ মন্ত্ৰীসভাত এজনকৈ মন্ত্ৰীক অন্তৰ্ভুক্ত কৰা হৈছে।
কিন্তু হতাশাজনকভাৱে ৩৪ জনীয়া কেবিনেটত মাত্ৰ এগৰাকীহে মহিলা মন্ত্ৰীক অন্তৰ্ভুক্ত কৰা হৈছে।
উল্লেখ্য, কানাড়া ৰাজনীতিত মহিলাৰ অংশগ্ৰহণ একেবাৰে পুতৌজনক। এইবাৰো ১২১গৰাকী মহিলা প্ৰাৰ্থীৰ ভিতৰত মাত্ৰ ১০গৰাকীয়েহে জয়লাভ কৰিছে। ইয়াৰে চাৰিগৰাকী হৈছে কংগ্ৰেছৰ। এই চাৰিগৰাকী মহিলা বিধায়কৰ ভিতৰত বেলগাঁও গ্ৰাম্য বিধায়িকা লক্ষ্মী এ হেব্বলকাৰক মন্ত্ৰী হিচাপে নিযুক্তি দিয়া হৈছে।
কংগ্ৰেছৰ জ্যেষ্ঠ নেতা দীনেশ গুণ্ডুৰাও, এইচ কে পাটিল, আৰ সুধাকৰ, বি নাগেন্দ্ৰই ৩৪ জনীয়া মন্ত্ৰীসভাত স্থান লাভ কৰিছে।
