ইজৰাইল আৰু হামাছৰ যুদ্ধ চলি থকাৰ মাজতে আহি পৰিছে আন এক আক্ৰমণৰ খবৰ। এইবাৰ চিৰিয়াৰ ওপৰত আক্ৰমণ চলাইছে ইজৰাইলে।
ইজৰাইলী সেনাই ছিৰিয়াৰ দামাস্কাছ আৰু আলেপ্পোত আক্ৰমণ কৰিছে। ইজৰাইলৰ বোমা নিক্ষেপৰ পাছতে বিমানবন্দৰকেইটাৰ বিস্তৰ ক্ষতি হৈছে। অৱশ্যে এই আক্ৰমণত কোনো লোক হতাহত হৈছে নে নাই সেই বিষয়ে জানিব পৰা হোৱা নাই ।
ছিৰিয়াই ইজৰাইলৰ ওপৰত হোৱা আক্ৰমণৰ প্ৰতি সমৰ্থন আগবঢ়াইছে, এই অভিযোগ ইজৰাইল প্ৰতিৰক্ষা বাহিনী(আইডিএফৰ)ৰ।
ইজৰাইলৰ প্ৰতিৰক্ষা মন্ত্ৰী ইয়োভ গেলেণ্টে কয় যে যদি দেশৰ বাহিৰৰ পৰা আক্ৰমণ হৈ থাকে তেন্তে ইজৰাইলে শক্তিশালী স্থিতি ল’ব ।
ইজৰাইলৰ আক্ৰমণৰ পাছতে ৰাজধানী দামাস্কাছ আৰু উত্তৰৰ আলেপ্পো চহৰৰ চৰকাৰৰ নিয়ন্ত্ৰিত বিমানবন্দৰসমূহত বিমানৰ চলাচল বন্ধ হৈ পৰিছে ।
ছিৰিয়াৰ চৰকাৰী সংবাদ সংস্থাত প্ৰকাশ পোৱা খবৰ অনুসৰি বিমান আক্ৰমণৰ ফলত দামাস্কাছ বিমানবন্দৰত এগৰাকী সাধাৰণ শ্ৰমিকৰ মৃত্যু হয় আৰু আন এজন আহত হয় ।
ইফালে ইজৰাইল আৰু হামাছৰ যুদ্ধক লৈ সন্ত্ৰাসবাদী সংগঠন হিজবুল্লাহে ইজৰাইলক সকীয়নি প্ৰদান কৰিছে । গাজা ষ্ট্ৰিপত স্থল আক্ৰমণ হ’লে হিজবুল্লাহে ইজৰাইলক প্ৰত্যুত্তৰ দিয়াৰো হুংকাৰ দিছে ।
