যোৱা ২৫ অক্টোবৰৰ নিশা আমেৰিকাৰ মেইন প্ৰদেশৰ এখন সৰু চহৰ লুইষ্টনত বন্দুকধাৰীৰ আক্ৰমণত কমেও ১৮ জন লোকৰ মৃত্যু হয়। এই ঘটনাৰ অভিযুক্ত বন্দুকধাৰীজনক অৱশেষত আৰক্ষীয়ে মৃত অৱস্থাত উদ্ধাৰ কৰিছে।
ইয়াৰ পূৰ্বে অভিযুক্ত বন্দুকধাৰীজন দুদিনতকৈ অধিক সময় ধৰি সন্ধানহীন হৈ আছিল। অভিযুক্তৰ পৰিচয় প্ৰকাশ কৰি আৰক্ষীয়ে সকলোকে সাৱধান হ’বলৈ আহ্বান জনাইছিল।
জানিব পৰা মতে, অভিযুক্ত বন্দুকধাৰীজনে আমেৰিকান আৰ্মি ৰিজাৰ্ভত প্ৰশিক্ষক হিচাপে কাম কৰিছিল। অভিযুক্তৰ নাম ৰবাৰ্ট কাৰ্ড। বয়স ৪০ বছৰ। কাৰ্ড শেহতীয়াকৈ মানসিকভাৱে অসুস্থ হৈ পৰিছিল।
বিগত তিনিদিন ধৰি অবিৰতভাৱে অভিযুক্তক বিচাৰি অভিযান চলি আছিল। অৱশেষত যোৱা নিশা উদ্ধাৰ হয় ৰবাৰ্টৰ মৃতদেহ। খবৰ অনুসৰি ৰবাৰ্টে নিজকে গুলীয়াই হত্যা কৰে।
আমেৰিকাৰ উত্তৰ-পূব উপকূলত অৱস্থিত মেইন প্ৰদেশৰ সৰু চহৰ লুইষ্টনত মাত্ৰ ৩৮ হাজাৰ লোকে বাস কৰে। পৰ্টলেণ্ড চহৰৰ অতি ওচৰত লুইষ্টন অৱস্থিত। কাৰ্ডে সেই চহৰৰ কেইবাটাও স্থানত আক্ৰমণ চলাইছিল।
বাতৰি অনুসৰি, তেওঁ স্থানীয় বাৰ, বোলিং এলি আৰু ৱালমাৰ্টত আক্ৰমণ চলাইছিল। ইখনৰ পিছত সিখন ঠাইত আক্ৰমণ কৰি কাৰ্ড অন্তৰ্ধান হৈ পৰে। ৰবাৰ্ট কাৰ্ড নিজেই মেইনৰ বাসিন্দা বুলি কোৱা হৈছে।
লগতে পঢ়কঃক্ৰিকেট বিশ্বত চমক ৰিয়ান পৰাগৰ! ছেহৱাগৰ অভিলেখ ভংগ কৰি গঢ়িলে বিৰল ইতিহাস
ইপিনে, এই ঘটনাৰ পিছতে ৰবাৰ্ট কাৰ্ডক কৰায়ত্ত কৰিব নোৱাৰাত উদ্বেগ বাঢ়ি আহিছিল। কানাডাৰ সীমান্তত দুয়োখন দেশৰ গাৰ্ড সষ্টম হৈ আছিল। অৱশেষত যোৱা নিশা উদ্ধাৰ হয় হত্যাকাৰীজনৰ মৃতদেহ। বাতৰি অনুসৰি, নিজৰ ঘৰতে আত্মহত্যা কৰে ৰবাৰ্টে।
আনহাতে, মৃতদেহটোৰ কাষৰ পৰা এখন চুইচাইড নোট উদ্ধাৰ কৰে আৰক্ষীয়ে। ৰবাৰ্টে পুত্ৰলৈ চিঠিখন লিখিছিল। কিন্তু সেই পত্ৰৰ পৰা ২৫ অক্টোবৰৰ ঘটনাৰ কাৰণ জানিব পৰা হোৱা নাই।
বাতৰি মতে, ২৫ তাৰিখৰ নিশা ৰবাৰ্ট কাৰ্ডে ছেমি অটোমেটিক ৰাইফলেৰে নিৰ্বিচাৰে গুলী চলাবলৈ আৰম্ভ কৰে। আক্রমণকাৰীয়ে পিন্ধিছিল বাদামী ৰঙৰ হুডি আৰু ক’লা পেণ্ট৷ পিছত চিচিটিভি ফুটেজৰ জৰিয়তে তেওঁক চিনাক্ত কৰা হয়। পিছত আৰক্ষীয়ে ৰবাৰ্ট কাৰ্ডৰ সবিশেষ তথ্যৰে জাননী জাৰি কৰে।
লগতে পঢ়কঃমাত্ৰ ২৬ বছৰ বয়সতে ২২টা সন্তানৰ মাতৃ! শতক অৰ্জনৰ লক্ষ্য এই যুৱতী মহিলাৰ; বিড়ম্বনা স্বামীৰ
সূত্ৰসমূহৰ মতে, বিগত কেইবামাহো ধৰি ৰবাৰ্ট কাৰ্ড মানসিকভাৱে অসুস্থ হৈ আছিল। ইয়াৰ পূৰ্বে চলিত বৰ্ষৰ গ্ৰীষ্মকালত তেওঁক মানসিক চিকিৎসাৰ বাবে চিকিৎসালয়ত ভৰ্তি কৰা হৈছিল। ঘৰুৱা হিংসাকে ধৰি একাধিক গোচৰত কেইবাবাৰো কাৰাগাৰত ভৰ্তি হ’বলগীয়া হৈছিল কাৰ্ড। কিন্তু ২৫ তাৰিখৰ নিশা ৰবাৰ্টে বন্দুক লৈ চহৰখনতে কিয় তাণ্ডৱ চলাইছিল সেয়া ৰহস্য হৈয়েই ৰৈছে।
