যৌন নিৰ্যাতনৰ অভিযোগ তুলি বিজেপি সাংসদ তথা ভাৰতীয় মল্লযুঁজ ফেডাৰেচনৰ তদানীন্তন সভাপতি ব্রিজ ভূষণ শৰণ সিঙৰ বিৰুদ্ধে তীব্ৰ আন্দোলন গঢ়ি তুলিছিল দেশৰ আগশাৰীৰ মল্লযুঁজাৰুসকলে। এই দীৰ্ঘদিনিয়া আন্দোলনৰ মাজতে সভাপতি হিচাপে ব্ৰিজ ভূষণৰ কাৰ্যকাল সমাপ্ত হৈছিল।
ইয়াৰ পিছতে প্ৰতিবাদকাৰী মল্লযুঁজাৰুসকলে ফেডাৰেচনৰ নিৰ্যাতনত ব্ৰিজ ভূষণৰ কোনো আত্মীয় তথা সহযোগীক অৱতীৰ্ণ হোৱাত বাধা আৰোপ কৰিবলৈ দাবী জনাইছিল। মল্লযুঁজাৰুসকলৰ দাবীৰ প্ৰতি সঁহাৰি জনাই দেশৰ ক্ৰীড়ামন্ত্ৰী অনুৰাগ ঠাকুৰেও এই বিষয়ত তেওঁলোকক আশ্বস্ত কৰিছিল।
কিন্তু আজি ফেডাৰেচনৰ সভাপতি হিচাপে নিৰ্বাচিত হৈছে যৌন নিৰ্যাতনৰ অভিযোগত অভিযুক্ত ব্রিজ ভূষণ শৰণ সিঙৰে এগৰাকী ঘনিষ্ঠ সহযোগী। ভাৰতীয় মল্লযুঁজ সংস্থাটোৰ নতুন সভাপতি হিচাপে নিৰ্বাচিত হৈছে ব্ৰিজ ভূষণৰ ঘনিষ্ঠ সহযোগী সঞ্জয় সিং।
প্ৰতিবাদী শীৰ্ষ মল্লযুঁজাৰুসকলে সমৰ্থন আগবঢ়োৱা প্ৰাৰ্থী, কমনৱেলথ গেমছৰ স্বৰ্ণ পদক বিজয়ী অনিতা শ্বেওৰানৰ বিৰুদ্ধে জয়েৰে সঞ্জয় সিং নিৰ্বাচিত হয় ফেডাৰেচনৰ সভাপতি ৰূপে। সিঙে নিৰ্বাচনত ৪৭টা ভোটৰ ভিতৰত ৪০ টা ভোটেই লাভ কৰে।
ইয়াৰ পূৰ্বে সঞ্জয় সিঙে উত্তৰ প্ৰদেশৰ মল্লযুঁজ সংস্থাৰ উপ-সভাপতি হিচাপে কাৰ্যনিৰ্বাহ কৰিছিল। ২০১৯ চনৰ পৰা তেওঁ ভাৰতীয় মল্লযুঁজ ফেডাৰেচনৰ যৌথ সচিব আছিল, লগতে শেষৰখন কাৰ্যবাহী পৰিষদৰ অংশ আছিল সঞ্জয় সিং।
উল্লেখ্য যে, ইতিপূৰ্বেই সঞ্জয় সিঙে তেওঁৰ ওচৰত অধিকাংশ ৰাজ্যৰে মল্লযুঁজ ফেডাৰেচনৰ সমৰ্থন আছে বুলি মন্তব্য কৰি নিৰ্বাচনত জয়ী হ’ব বুলি ভৱিষ্যতবাণী কৰিছিল।আজি জয়ৰ পিছত সিঙে একপ্ৰকাৰে ব্ৰিজ ভূষণলৈ সমৰ্থন আগবঢ়াই এই জয় ‘অসত্যৰ বিৰুদ্ধে সত্যৰ অতি বৃহৎ জয়’ বুলি অভিহিত কৰে।
লগতে ব্ৰিজ ভূষণক সমৰ্থন জনাই ‘যিজন ব্যক্তিৰ চৰিত্ৰত তেনে প্ৰৱণতাৰ স্থান নাই, তেওঁৰ বিৰুদ্ধে মল্লযুঁজাৰুসকলে এনে অভিযোগ উত্থাপন কৰিছিল’ বুলিও গুৰুত্বপূৰ্ণ মন্তব্য কৰে। লগতে কোনো মহিলা মল্লযুঁজাৰুৰ বিৰুদ্ধে কোনো অন্যায় নহ’ব বুলিও প্ৰতিশ্ৰুতি দিছে সঞ্জয় সিঙে।
