যৌন নিৰ্যাতনত অভিযুক্ত ভাৰতীয় মল্লযুঁজাৰু ফেডাৰেচনৰ প্ৰাক্তন সভাপতি তথা বিজেপি সাংসদ ব্রিজ ভূষণ শৰণ সিঙে প্ৰতিবাদী মল্লযুঁজাৰুসকলক দিছিল চৰম ভাবুকি। আদালতত এই বক্তব্য দিল্লী আৰক্ষীৰ।
ব্রিজ ভূষণৰ বিৰুদ্ধে মহিলা মল্লযুঁজাৰুসকলে ৰুজু কৰা যৌন নিৰ্যাতনৰ গোচৰৰ শুনানিৰ সময়ত আদালতত এই কথা প্ৰকাশ কৰে দিল্লী আৰক্ষীয়ে। দিল্লী আৰক্ষীৰ অধিবক্তা অতুল শ্ৰীবাস্তৱে আদালতত দাঙি ধৰে এই তথ্য।
অধিবক্তাগৰাকীয়ে আদালতত উল্লেখ কৰা মতে, মহিলা মল্লযুঁজাৰুসকলক ব্ৰিজ ভূষণে কেৰিয়াৰ অব্যাহত ৰাখিবলৈ হ’লে মুখ বন্ধ ৰাখিবলৈ ভাবুকি দিছিল। কাৰোবাৰ কেৰিয়াৰ যিদৰে বনাব পাৰে, তেনেদৰে ধ্বংসও কৰিব পাৰে বুলি ভাবুকি দিছিল ব্ৰিজ ভূষণে।
ব্রিজ ভূষণৰ এনে ভাবুকি ভাৰতীয় দণ্ডবিধিৰ ধাৰা ৫০৬ৰ অধীনত অপৰাধমূলক ভাবুকিৰ সৈতে জড়িত বুলি যুক্তি আগবঢ়ায় দিল্লী আৰক্ষীৰ অধিবক্তা অতুল শ্ৰীবাস্তৱে৷ তেওঁ লগতে আন এক তথ্যও আদালতত দাঙি ধৰে।
অভিযোগকাৰী এগৰাকী মহিলা খেলুৱৈৰ বক্তব্যৰ উদ্ধৃতি দি শ্ৰীবাস্তৱে কয় যে ব্রিজ ভূষণে ধুতি-কুৰ্তাৰ সাজত নিজকে কেনেকুৱা লাগিছে বুলি খেলুৱৈগৰাকীক সুধিছিল। এয়া মহিলা খেলুৱৈক সুধিবলগীয়া প্ৰশ্ন নেকি বুলি অধিবক্তাগৰাকীয়ে আদালতত প্ৰশ্ন কৰে।
ইফালে ফেডাৰেচনৰ প্ৰাক্তন সহকাৰী সম্পাদক তথা আন এজন অভিযুক্ত বিনোদ টোমাৰৰ কাৰ্যালয়ত কেৱল মহিলাসকলকহে প্ৰৱেশৰ অনুমতি দিয়া হৈছিল বুলি এগৰাকী মল্লযুঁজাৰুৱে তোলা অভিযোগৰ বিষয়েও আদালতত উল্লেখ কৰে দিল্লী আৰক্ষীয়ে।
অধিবক্তাগৰাকীয়ে লগতে ব্রিজ ভূষণে আন এগৰাকী মহিলা মল্লযুঁজাৰুক সাৱটি ধৰাৰ আন এটা কাণ্ডৰ কথাও উল্লেখ কৰে। ইয়াৰ দ্বাৰা ব্ৰিজ ভূষণৰ উদ্দেশ্য প্ৰকাশ পাইছে বুলি অধিবক্তা শ্ৰীবাস্তৱে লগতে আদালতৰ দৃষ্টিগোচৰ কৰে।
উল্লেখ্য যে, মল্লযুঁজাৰুসকলৰ প্ৰতিবাদৰ পিছত বিগত বৰ্ষৰ ১৫ জুনত দিল্লী আৰক্ষীয়ে ভাৰতীয় দণ্ডবিধিৰ ধাৰা ৩৫৪, ৩৫৪এ, ৩৫৪ডি আৰু ৫০৬ৰ অধীনত অভিযোগনামা দাখিল কৰিছিল।
কিন্তু তাৰ পিছতে ২০ জুলাইত ব্রিজ ভূষণৰ জামিন মঞ্জুৰ কৰিছিল আদালতে। আদালতে লগতে ফেডাৰেচনৰ সহকাৰী সম্পাদক বিনোদ টোমাৰক নিলম্বন কৰিছিল।
