নেদাৰলেণ্ডৰ বিৰুদ্ধে ১০৪ ৰানৰ লক্ষ্য খেদি কষ্টকৰ জয় দক্ষিণ আফ্ৰিকাৰ; সেইখন পিটচতে আজি আছে ভাৰত-পাকিস্তানৰ মেচ

নিউয়ৰ্কৰ নাছাউ ষ্টেডিয়ামৰ পিটচখনে টী-২০ বিশ্বকাপত পুনৰবাৰ চকু কপালত তুলিলে। দেওবাৰে এই পিটচতে অনুষ্ঠিত হ’ব ভাৰত-পাকিস্তানৰ মেচ। ইয়াৰ পূৰ্বে শনিবাৰৰ খেলখনত নেদাৰলেণ্ড আৰু দক্ষিণ আফ্ৰিকা দুয়োখন দেশৰ বেটছমেনে সমস্যাৰ সন্মুখীন হৈছিল। প্ৰতিটো ৰানৰ বাবে যুঁজিবলগীয়া হৈছিল।

প্ৰথমে বেটিং কৰি নেদাৰলেণ্ডে ৯টা উইকেট হেৰুৱাই ২০ অভাৰত ১০৩ ৰান সংগ্ৰহ কৰে। সেই ৰান খেদি দক্ষিণ আফ্ৰিকাও সমস্যাত পৰে। তেওঁলোকে কোনোমতে ৪ উইকেটত জয়ী হ’বলৈ সক্ষম হয়। দক্ষিণ আফ্ৰিকাৰ নায়ক ডেভিদ মিলাৰ অৰ্ধ শতকৰে অপৰাজিত হৈ থাকে।

দক্ষিণ আফ্ৰিকাৰ অধিনায়ক আইডেন মাৰ্ক্ৰামে টছত জয়লাভ কৰি প্ৰথমে বলিং কৰাৰ সিদ্ধান্ত লয়। প্ৰথম অভাৰত মাৰ্কো জান্সেনে এটা উইকেট দখল কৰে। তেওঁ মাইকেল লেভিটক শূন্য ৰাণত ঘূৰাই পঠিয়ায়। সেইটোৱেই আৰম্ভণি। নিয়মীয়া ব্যৱধানত উইকেট পৰিবলৈ ধৰে। পাৱাৰ প্লে’ত ৩ উইকেট হেৰুৱায় নেদাৰলেণ্ডে।

নেদাৰলেণ্ডৰ বেটছমেনৰ মাজত চাইব্ৰাণ্ড এংগেলব্ৰেচ্ট আৰু লগান ভান ৱাইকে এই যুটী বান্ধে। তেওঁলোকে দলটোক ৪৮ ৰানত ৬ উইকেটৰ পৰা শতক অতিক্ৰম কৰাবলৈ সক্ষম হয়। ৰান ৰেট কম হ’লেও তেওঁলোকে উইকেট হেৰুওৱা নাছিল। এই পিটচত এংগেলব্ৰেচ্টে ভাল বেটিং কৰে। তেওঁ ৪০ ৰান সংগ্ৰহ কৰি আউট হয়। ভেন বিকে ২৩ ৰান সংগ্ৰহ কৰে। নেদাৰলেণ্ডৰ ইনিংছ ১০৩ ৰানতে সমাপ্ত হয়। দক্ষিণ আফ্ৰিকাৰ বলাৰসকলৰ ভিতৰত অট’নেইল বাৰ্টমেনে ৪টা আৰু জান্সেন আৰু এনৰিচ ন’খিয়ে ২টাকৈ উইকেট দখল কৰে।

দক্ষিণ আফ্ৰিকাৰ ইনিংছৰ আৰম্ভণি আৰু বেয়া আছিল। প্ৰথম বলত কুইণ্টন ডি’কক ৰান আউট হৈছিল। ৰিজা হেণ্ড্ৰিক্স, মাৰ্কৰাম আৰু হাইনৰিখ ক্লাচেনেও ৰান নাপালে। ১২ ৰানতে ৪ টা উইকেট হেৰুৱায় দক্ষিণ আফ্ৰিকাই। এনে লাগিছিল যেন দক্ষিণ আফ্ৰিকা আকৌ এবাৰ নেদাৰলেণ্ডৰ হাতত পৰাস্ত হ’ব।

তাৰ পৰাই মিলাৰে ইনিংছটো চম্ভালি লয়। তেওঁ ট্ৰিষ্টান ষ্টাবছৰ সৈতে যুটী বান্ধে। অভিজ্ঞতা কামত লগায় মিলাৰে। বাওঁহতীয়া বেটছমেনজনে দেখুৱাই দিলে যে তেওঁক কিয় এই দলৰ মেৰুদণ্ড বুলি কোৱা হয়। কঠিন পৰিস্থিতিত যুৱ ষ্টাবছেও ভাল খেলে। তেওঁলোকে খৰখেদা কৰা নাছিল। লাহে লাহে দলটোক জয়ৰ দিশে আগবঢ়াই নিয়ে।

Leading his side to an important victory 🫡

David Miller is awarded the @Aramco POTM after his steely half-century guides 🇿🇦 to a win against Netherlands 🙌#T20WorldCup | #NEDvSA pic.twitter.com/6H6t22Akds

— ICC (@ICC) June 8, 2024

কিন্তু যেতিয়া ষ্টাবছ ৩৩ ৰানত আউট হয়, তেতিয়া নেদাৰলেণ্ডে পুনৰ জয়ৰ গোন্ধ পাবলৈ আৰম্ভ কৰে। কিন্তু মিলাৰ তেতিয়াও ক্ৰীজত আছিল। তেওঁ আন কাৰো ওপৰত ভৰসা কৰা নাছিল। শেষত মিলাৰে কেইটামান ডাঙৰ শ্বট মাৰে। মেচখনত এটা অভাৰ বাকী থকা অৱস্থাত তেওঁ ছয় মাৰি দলক জয়ী কৰে। ৫১টা বলত ৫৯ ৰান সংগ্ৰহ কৰি অপৰাজিত হৈ থাকে মিলাৰ।