আই আই টি-খড়গপুৰৰ ছাত্ৰ অসমৰ ফাইজান আহমেদৰ ৰহস্যজনক মৃত্যুৰ প্ৰায় দুবছৰৰ পাছত তেওঁক হত্যা কৰা বুলি নিশ্চিত কৰা নতুন প্ৰমাণ পোৱা গৈছে।
কলিকতা উচ্চ ন্যায়ালয়ৰ নিৰ্দেশ আৰু ডাঃ এ কে গুপ্তাৰ দ্বাৰা সম্পন্ন কৰা শেহতীয়াকৈ প্ৰকাশিত ফৰেনছিক প্ৰতিবেদনত ফাইজানৰ ডিঙিত বন্দুকৰ গুলী আৰু ছুৰীৰ আঘাত পোৱাৰ কথা প্ৰকাশ পাইছে, যাৰ ফলত পূৰ্বৰ আত্মহত্যাৰ দাবী অচল হৈ পৰিছে।
চলিত বৰ্ষৰ মে’ মাহত আদালতত দাখিল কৰা বিশেষজ্ঞগৰাকীৰ বিশদ বিশ্লেষণত ফাইজানৰ ডিঙিৰ ওপৰৰ বাওঁফালে বন্দুকৰ গুলী আৰু সোঁফালে ছুৰীৰে আঘাত কৰাৰ ইংগিত পোৱা গৈছে।
প্ৰাৰম্ভিক আৰক্ষী তদন্তৰ সময়ত বা ২০২২ চনৰ অক্টোবৰ মাহত মিডনাপুৰ চিকিৎসা মহাবিদ্যালয়ত কৰা প্ৰথম মৰণোত্তৰ পৰীক্ষাৰ সময়ত এই জটিল আঘাতসমূহ নথিভুক্ত কৰা হোৱা নাছিল।
ডাঃ গুপ্তাৰ দ্বিতীয় মৰণোত্তৰ পৰীক্ষাৰ প্ৰতিবেদনত অৱশ্যে এই আঘাতসমূহ উন্মোচিত হৈছে আৰু ফাইজানৰ নখৰ কটা অংশ, চুলি, মেৰুদণ্ড, থুঁতুৰি, আৰু পিঠিৰ পেশীত মানুহৰ তেজ লক্ষ্য কৰা হৈছে।
লগতে পঢ়কঃ হেৰাই গৈছে শ্বীনা বৰাৰ দেহৰ অৱশিষ্ট অংশ! আদালতত অধিবক্তাৰ দাবীক কেন্দ্ৰ কৰি তোলপাৰ
তিনিচুকীয়া জিলাৰ মেকানিকেল ইঞ্জিনিয়াৰিঙৰ তৃতীয় বৰ্ষৰ ২৩ বছৰীয়া ছাত্ৰ ফাইজান আহমেদক যোৱা ১৪ অক্টোবৰত আই আই টি-খড়গপুৰৰ লালা লাজপত ৰায় হোষ্টেলৰ এটা কোঠাত মৃত অৱস্থাত উদ্ধাৰ কৰা হয়।
প্ৰথম অৱস্থাত তেওঁৰ মৃত্যুক আত্মহত্যা বুলি কোৱা হৈছিল যদিও তেওঁৰ পৰিয়ালে কেম্পাছত চলা ৰেগিঙৰ উদাহৰণ দি হত্যাৰ অভিযোগ উত্থাপন কৰিছিল।
ফাজানৰ মাতৃৰ অনুৰোধৰ পিছত কলিকতা উচ্চ ন্যায়ালয়ে বিশেষ তদন্তকাৰী দল (এছ আই টি)ক গোচৰটো পুনৰ পৰীক্ষা কৰিবলৈ নিৰ্দেশ দিয়ে।
২০২৩ চনৰ মে’ মাহত আদালতে দ্বিতীয়বাৰৰ বাবে মৰণোত্তৰ পৰীক্ষাৰ বাবে ফাইজানৰ মৃতদেহ খনন কৰাৰ নিৰ্দেশ দিছিল, য’ত শেষত হত্যাৰ চিন ওলাইছিল।
ডাঃ গুপ্তাই কৰা ফৰেনছিক পৰীক্ষাত অতিৰিক্ত জটিল তথ্য প্ৰকাশ পাইছে। ফাইজানৰ মূৰৰ খুলিৰ সোঁফালৰ টেম্প’ৰেল হাড়টো নোহোৱা হৈছিল, যিটো তেওঁৰ মৃতদেহৰ প্ৰাৰম্ভিক ফটোৰ সৈতে মিলি গৈছিল আৰু প্ৰতিবেদনত বিষক্ৰিয়াক মৃত্যুৰ কাৰণ বুলি নিশ্চিতভাৱে নুই কৰা হৈছিল।
লগতে পঢ়কঃ ‘উচটনিমূলক ভাষণ’! প্ৰসিদ্ধ লেখিকা অৰুন্ধতী ৰয়ৰ বিৰুদ্ধে ইউএপিএৰ অধীনত গোচৰ তৰাৰ অনুমতি
এই তথ্য প্ৰকাশৰ পিছতো তদন্তত উল্লেখযোগ্য প্ৰত্যাহ্বানৰ সন্মুখীন হয়। আৰক্ষীৰ প্ৰাৰম্ভিক সঁহাৰি আৰু তদন্ত অপৰ্যাপ্ত বুলি সমালোচনা হৈছিল।
মৃত্যুৰ তিনিদিন পিছত ফাইজানৰ মৃতদেহটো উৱলি যোৱা অৱস্থাত উদ্ধাৰ হৈছিল আৰু প্ৰাৰম্ভিক মৰণোত্তৰ পৰীক্ষাত এতিয়া উন্মোচিত হোৱা সবিশেষৰ অভাৱ আছিল।
তদুপৰি, ২০২৩ চনৰ ফেব্ৰুৱাৰী মাহত এই কাণ্ডৰ কেইমাহমানৰ পাছতহে আৰক্ষীয়ে ৰেগিং গোচৰ ৰুজু কৰিছিল, যাৰ ফলত ছাত্ৰ-ছাত্ৰী আৰু কৰ্মচাৰীকে ধৰি ছয়জন ব্যক্তিয়ে আত্মসমৰ্পণ কৰিছিল আৰু পৰৱৰ্তী সময়ত জামিন লাভ কৰিছিল।
কলিকতা উচ্চ ন্যায়ালয়ে ফাইজানৰ ৰেগিঙৰ অভিযোগৰ ওপৰত কোনো ব্যৱস্থা গ্ৰহণ নকৰাৰ অভিযোগ উত্থাপন কৰি আই আই টি খড়গপুৰৰ প্ৰশাসনক ধমক দিয়ে।
পৰিয়ালটোৰ অধিবক্তা অনিৰুদ্ধ মিত্ৰই আৰক্ষী আৰু প্ৰতিষ্ঠান দুয়োটাই হত্যাকাণ্ড ঢাকি ৰাখিবলৈ চেষ্টা কৰাৰ অভিযোগ উত্থাপন কৰিছে।
লগতে পঢ়কঃ পাকিস্তানৰ আশাত চেঁচা পানী ঢালিলে বৰষুণে; টী-২০ বিশ্বকাপৰ প্ৰথম ৰাউণ্ডৰ পৰাই ল’লে বিদায়
তেওঁ কয়, ‘তদন্ত অবিহনে আৰক্ষীয়ে ইয়াক আত্মহত্যাৰ গোচৰলৈ ৰূপান্তৰিত কৰাৰ চেষ্টা কৰিছিল, আৰু আজিলৈকে প্ৰথম মৰণোত্তৰ পৰীক্ষাৰ ভিত্তিত তদন্ত চলি আছে, যদিও আদালতে আৰক্ষীক তেনে নকৰিবলৈ নিৰ্দেশ দিছিল।’
মিত্ৰই চিচিটিভিৰ নিৰীক্ষণৰ অভাৱ আৰু ফাইজানৰ নিৰ্যাতন আৰু ৰেগিঙৰ অভিযোগৰ ওপৰত প্ৰতিষ্ঠানটোৱে কোনো ব্যৱস্থা গ্ৰহণ নকৰাৰ সমালোচনা কৰে।
