চলিত ২০২৪ ৰ আই চি চি পুৰুষৰ টী-২০ বিশ্বকাপৰ চল্লিশতম মেচখন ৱেষ্ট ইণ্ডিজ বনাম আফগানিস্তানৰ মাজত অনুষ্ঠিত হৈছিল। চেণ্ট লুচিয়াৰ ডেৰেন ছেমি নেশ্যনেল ক্ৰিকেট ষ্টেডিয়ামত অনুষ্ঠিত হয় এই খেলখন। খেলখনত ৱেষ্ট ইণ্ডিজে আফগানিস্তানক ১০৪ ৰানত হৰুৱায়।
আফগানিস্তানে টছত জয়লাভ কৰি এই প্ৰথমে ফিল্ডিং কৰাৰ সিদ্ধান্ত লয়। কিন্তু তেওঁলোকৰ সিদ্ধান্ত ভুল বুলি প্ৰমাণ কৰিলে নিকোলাছ পুৰান আৰু চাৰ্লছ জনছনে। পাৱাৰপ্লে’ত তেওঁলোকে ধুমুহাৰ সৃষ্টি কৰিলে।
নিৰ্ধাৰিত ২০ অভাৰত ৫টা উইকেট হেৰুৱাই ২১৮ ৰান সংগ্ৰহ কৰে ৱেষ্ট ইণ্ডিজে। ইয়াৰ প্ৰত্যুত্তৰত আফগানিস্তানৰ ইনিংছ ১১৪ ৰানতে সমাপ্ত হয়। খেলখনৰ মেন অৱ দ্য মেচ হিচাপে নিৰ্বাচিত হয় নিকোলাছ পুৰাণ। নিকোলাছ পুৰানে মাত্ৰ ২ ৰানৰ বাবে শতক বঞ্চিত হয়।
ইপিনে, আফগানিস্তানৰ বিৰুদ্ধে ৱেষ্ট ইণ্ডিজে টী-২০ বিশ্বকাপৰ ইতিহাসত সৰ্বাধিক স্ক’ৰ কৰাই নহয়, চলিত টী-২০ বিশ্বকাপতো সৰ্বাধিক স্ক’ৰ কৰে। ৱেষ্ট ইণ্ডিজৰ দলটোৱে ৫টা উইকেট হেৰুৱাই ২০ অভাৰত ২১৮ ৰান সংগ্ৰহ কৰে। নিকোলাছ পুৰানৰ বিধ্বংসী ইনিংছৰ ফলতে আফগানিস্তানৰ সন্মুখত ২১৯ ৰানৰ লক্ষ্য নিৰ্ধাৰণ কৰিছিল ৱেষ্ট ইণ্ডিজে।
নিকোলাছ পুৰানে ৫৩টা বলত ৬টা চাৰি আৰু ৮টা ছয়ৰ সহায়ত ৯৮ৰান কৰাৰ বিপৰীতে জনছন চাৰ্লছে ২৭টা বলত ৪৩ ৰান সংগ্ৰহ কৰে। অধিনায়ক ৰভমেন পাৱেলৰ বেটৰ পৰা আহে ২৬ ৰান আৰু শ্বাই হোপে ২৫ ৰান সংগ্ৰহ কৰে।
২০২৪ চনৰ টী-২০ বিশ্বকাপত প্ৰথমবাৰৰ বাবে কোনো দলে ২১০ ৰান অতিক্ৰম কৰিছে। এই বিশ্বকাপত এতিয়ালৈকে মুঠ দুবাৰ দুশতকৈ অধিক ৰান কৰা হৈছে।
আফগানিস্তানৰ হৈ গুলবাদিন নাইবে ২টা আৰু আজমতুল্লাহ ওমৰজাই আৰু নবীন উল হকে ১টাকৈ উইকেট দখল কৰে। উমৰজাইয়ে ২ অভাৰত ৪১ ৰান ব্যয় কৰে। লগতে তেওঁ এটা অভাৰত সৰ্বাধিক ৩৬ ৰান দিয়ে।
আনহাতে, লক্ষ্য অনুসৰণ কৰি আফগানিস্তানে প্ৰথমে গুৰবাজৰ উইকেট হেৰুৱাই চাপত পৰে। পাৱাৰপ্লেত বেছি ৰান নোহোৱাৰ বাবে চাপ বাঢ়ি গ’ল। ইয়াৰ পিছত আফগানিস্তানে ৯.২ অভাৰত ৬৩ ৰানত ৫ উইকেট হেৰুৱায়। শেষত আফগানিস্তানৰ ইনিংছ ১৬.২ অভাৰত ১১৪ ৰানত সমাপ্ত হয়। ফলত ৱেষ্ট ইণ্ডিজে ১০৪ ৰানত জয়লাভ কৰে। এই জয়ৰ ফলত ৱেষ্ট ইণ্ডিজে গ্ৰুপ পৰ্যায়ত অপৰাজিত হৈয়ে ছুপাৰ এইটত প্ৰৱেশ কৰে।
