১৪ দিন পূৰ্বে সমাপ্ত হৈছিল টি-২০ বিশ্বকাপ। প্ৰতিযোগিতাখন শেষ হোৱাৰ দুসপ্তাহৰ পাছতে আইচিচিৰ দুই বিষয়া ক্ৰীছ টেটলী আৰু ক্লেয়াৰ ফাৰ্লঙে পদত্যাগ কৰিছে। ভাৰত-পাকিস্তানৰ খেলখনৰ খেলপথাৰক লৈ হোৱা বিতৰ্কৰ বাবেই তেওঁলোকে এই সিদ্ধান্ত গ্ৰহণ কৰিছে বুলি ধাৰণা কৰা হৈছে।
ক্ৰিকেট ৱেবছাইটৰ এক প্ৰতিবেদন অনুসৰি নিউয়ৰ্কৰ নাছাউ ক্ৰিকেট ষ্টেডিয়ামত খেলপথাৰক লৈ হোৱা বিবাদৰ ফলত দুজন বিষয়াই পদত্যাগ কৰিবলৈ বাধ্য হৈছে। এই খেলপথাৰখন বিশ্বকাপৰ পূৰ্বে নিৰ্মাণ কৰা হৈছিল। তাত ‘ড্ৰপ ইন’ পিটচ (অন্য ঠাইত বনোৱা আৰু স্থাপন কৰা পিটচ) স্থাপন কৰা হৈছিল। কিন্তু সেই খেলপথাৰত খেলাটো বেটছমেনসকলৰ বাবে কঠিন হৈ পৰিছিল। বলাৰসকলে শক্তি দেখুৱাইছিল। ভাৰত-পাকিস্তানৰ মেচতো দেখা গ’ল ছবিখন। ১১৯ ৰান সংগ্ৰহ কৰিও ভাৰতে ৬ ৰানত জয়লাভ কৰে। হাই ভল্টেজৰ মেচখনে আশা কৰা ধৰণৰ ক্ৰিকেটৰ প্ৰদৰ্শন নহ’ল। ভাৰতৰ অধিনায়ক ৰোহিত শৰ্মা আৰু পাকিস্তানৰ অধিনায়ক বাবৰ আজমে খেলপথাৰ সন্দৰ্ভত প্ৰশ্ন উত্থাপন কৰে।
কিন্তু আন এটা কাৰণ ওলাই পৰে। এক সূত্ৰৰ পৰা জানিব পৰা মতে, ইতিমধ্যে দুয়োগৰাকী বিষয়াই পদত্যাগ কৰাৰ সিদ্ধান্ত লৈছিল। যোৱা বছৰ পদত্যাগ কৰিব বিচাৰিছিল। কিন্তু বিশ্বকাপৰ আগন্তুক সময়ত তেওঁ আৰু কেইমাহমান সেৱা আগবঢ়াইছিল। টি-২০ বিশ্বকাপৰ অন্ত পৰাৰ পাছত দুয়োগৰাকী বিষয়াই পদত্যাগ কৰে। অৱশ্যে শ্ৰীলংকাৰ কলম্বোত ১৯ জুলাইৰ পৰা ২২ জুলাইলৈ অনুষ্ঠিত হ’বলগীয়া আইচিচিৰ বাৰ্ষিক বৈঠকত এই বিষয়া দুগৰাকী উপস্থিত থাকিব।
কাৰণ যিয়েই নহওক, এইবাৰ বিশ্বকাপ আয়োজনক লৈ বহু প্ৰশ্ন উত্থাপন হৈছে। কেৱল নিউয়ৰ্কৰ খেলপথাৰখনেই নহয়, বহু দলে অনুশীলন খেলপথাৰ, ষ্টেডিয়ামৰ পৰা হোটেললৈ দূৰত্ব আৰু পৰিবহণ ব্যৱস্থাৰ বিষয়েও অভিযোগ উত্থাপন কৰিছে। খেলাৰ সময়ক লৈও প্ৰশ্ন উত্থাপন হৈছে। কিছুমান দলে ২৪ ঘণ্টাৰ ভিতৰত খেলিবলৈ বাধ্য হৈছিল। সেই সকলোবোৰ বিতৰ্কৰ মাজতে ভাৰতে বিশ্বকাপ জয় কৰে। ফাইনেলত দক্ষিণ আফ্ৰিকাক পৰাস্ত কৰি ৰোহিত শৰ্মাই ১৩ বছৰীয়া বিশ্বকাপৰ অপেক্ষাৰ অন্ত পেলায়।
