ৰাষ্ট্ৰপতি দ্ৰৌপদী মুৰ্মুৱে একেলগে ৯খন ৰাজ্যত নতুন ৰাজ্যপাল নিযুক্তি দিছে। ইয়াৰ লগতে পুডুচেৰীৰ নতুন লেফটেনেণ্ট গৱৰ্ণৰ (লেফটেনেণ্ট গৱৰ্ণৰ)ৰ নামো ঘোষণা কৰা হৈছে। শনিবাৰে নিশা ৰাষ্ট্ৰপতি ভৱনে এক অধিসূচনা জাৰি কৰি অসম, ঝাৰখণ্ড, ৰাজস্থান, তেলেংগানা, ছিকিম, ছত্তীশগড়, মেঘালয়, মহাৰাষ্ট্ৰ,আৰু পঞ্জাৱত নতুন ৰাজ্যপাল নিয়োগৰ কথা উল্লেখ কৰে।
ৰাষ্ট্ৰপতিৰ দ্বাৰা ৰাজ্যপাল হিচাপে নিযুক্তি দিয়া হৈছে ৬ গৰাকী নতুন ব্যক্তিক। তিনিগৰাকীৰ ক্ষেত্ৰত ৰাজ্য সলনি কৰা হৈছে। লগতে কিছুমানক অতিৰিক্ত দায়িত্ব দিয়া হৈছে।
কোন ৰাজ্যৰ ৰাজ্যপাল কোন? চাওক সম্পূৰ্ণ তালিকা-
১) সন্তোষ কুমাৰ গাংগোৱাৰক ঝাৰখণ্ডৰ ৰাজ্যপাল হিচাপে নিযুক্তি দিয়া হৈছে। এইবাৰৰ লোকসভা নিৰ্বাচনত তেওঁক বৰেলীৰ পৰা টিকট দিয়া নাছিল বিজেপিয়ে। তেওঁ সেই আসনৰ পৰা একেৰাহে ছটা কাৰ্যকালৰ বাবে নিৰ্বাচিত হৈছিল।
২) হৰিভাউ কিষাণৰাও বাগড়েক ৰাজস্থানৰ ৰাজ্যপাল হিচাপে নিযুক্তি।
৩) ত্ৰিপুৰাৰ প্ৰাক্তন উপ-মুখ্যমন্ত্ৰী জিষ্ণু দেৱবৰ্মাক তেলেংগানাৰ ৰাজ্যপাল হিচাপে নিযুক্তি দিয়া হৈছে। তেলেংগানাত কংগ্ৰেছ ক্ষমতা আছে।
৪) ওমপ্ৰকাশ মাথুৰক ছিকিমৰ ৰাজ্যপাল হিচাপে নিযুক্তি দিয়া হৈছে। ৰাজস্থানৰ জ্যেষ্ঠ বিজেপি নেতাগৰাকী ৰাজ্যসভাৰ সদস্য আছিল।
৫) অসমৰ জ্যেষ্ঠ বিজেপি নেতা ৰমেন ডেকাক ছত্তীশগড়ৰ ৰাজ্যপাল হিচাপে নিযুক্তি দিয়া হৈছে।
৬) চি এইচ বিজয়শংকৰক মেঘালয়ৰ ৰাজ্যপাল নিযুক্তি দিয়া হৈছে। তেওঁ এগৰাকী সাংসদ আছিল। বিজেপি ত্যাগ কৰি কংগ্ৰেছত যোগদান কৰিছিল। ২০১৯ চনত পুনৰ বিজেপিত যোগদান কৰে।
৭) এতিয়ালৈকে ঝাৰখণ্ডৰ ৰাজ্যপাল আছিল চি পি ৰাধাকৃষ্ণন। তেওঁক মহাৰাষ্ট্ৰৰ ৰাজ্যপাল হিচাপে নিযুক্তি দিয়া হৈছে। তেলেংগানাও অতিৰিক্ত দায়িত্ব হিচাপে তেওঁৰ হাতত আছিল।
৮) অসমৰ ৰাজ্যপাল গুলাবচান্দ কটাৰিয়াক পঞ্জাৱৰ ৰাজ্যপাল হিচাপে নিযুক্তি দিয়া হৈছে। অতিৰিক্ত দায়িত্ব হিচাপে তেওঁক ৰাষ্ট্ৰপতিয়ে চণ্ডীগড়ৰ প্ৰশাসকৰ দায়িত্বও দিয়া হৈছে। ৰাষ্ট্ৰপতি ভৱনে জনোৱা মতে, বানোৱাৰীলাল পুৰোহিতৰ পঞ্জাৱৰ ৰাজ্যপাল আৰু চণ্ডীগড়ৰ প্ৰশাসক পদৰ পদত্যাগ গ্ৰহণ কৰা হৈছে।
৯) ছিকিমৰ ৰাজ্যপাল লক্ষ্মণপ্ৰসাদ আচাৰ্যক অসমৰ ৰাজ্যপাল হিচাপে নিযুক্তি দিয়া হৈছে। তেওঁ মণিপুৰৰ ৰাজ্যপাল হিচাপেও কাৰ্যনিৰ্বাহ কৰিব।
ইপিনে, অৱসৰপ্ৰাপ্ত আই এ এছ বিষয়া কে কৈলাশানাথনক পুডুচেৰীৰ লেফটেনেণ্ট গৱৰ্ণৰ হিচাপে নিযুক্তি দিয়া হৈছে। গুজৰাটৰ মুখ্যমন্ত্ৰী হিচাপে থকা কালত কৈলাশনাথন মোডীৰ মুখ্য প্ৰধান সচিব আছিল। তেওঁ দীৰ্ঘদিন গুজৰাটৰ মুখ্যমন্ত্ৰীৰ মুখ্য প্ৰধান সচিব হিচাপে কাৰ্যনিৰ্বাহ কৰিছিল। ৩০ জুনত তেওঁ পদত্যাগ কৰে।
ৰাষ্ট্ৰপতি ভৱনে জনাইছে যে যিসকলক নতুন দায়িত্বত নিযুক্তি দিয়া হৈছে, তেওঁলোকৰ কাৰ্যকাল তেওঁলোকে দায়িত্বভাৰ গ্ৰহণ কৰা দিনৰে পৰা আৰম্ভ হ’ব।
