ৰাইজৰ দলৰ মুখ্য কাৰ্যালয়ৰ পৰা আজি সংবাদ মেল সম্বোধন কৰে ৰাইজৰ দলৰ সাধাৰণ সম্পাদক চিন্ময় বড়াই। চৰকাৰী চিকিৎসালয়ত চিকিৎসা সেৱাৰ মাচুল বৃদ্ধিৰ প্ৰসংগত সংবাদ মেল সম্বোধন কৰি বড়াই কয় যে, দুখীয়া, মধ্যবিত্তৰ পৰা চিকিৎসাৰ সুবিধাখিনিও কাঢ়ি নিব বিচাৰিছে চৰকাৰখনে।
যি সময়ত চৰকাৰী চিকিৎসালয়ত উপযুক্ত চিকিৎসাৰ বাবে পর্যাপ্ত সুবিধা নাই, যি সময়ত সাধাৰণ ৰাইজে চৰকাৰী চিকিৎসালয়ত যমৰ যাতনা ভুগিব লাগে সেই সময়ত মাচুল বৃদ্ধিৰ ঘটনা কোনো কাৰণতেই গ্রহণযোগ্য নহয়। এটা তথ্য দাঙি ধৰি বড়াই কয় যে, গুৱাহাটী চিকিৎসা মহাবিদ্যালয়ত এম.আৰ.আই কৰিবৰ বাবে এগৰাকী ৰোগী ৪৫ দিন পর্যন্ত অপেক্ষা কৰিব লাগে।
WHO ৰ মতে প্রতি ১,০০০ জন ৰোগীৰ বিপৰীতে ১ জন ডাক্তৰ থাকিব লাগে যদিও অসমত বর্তমান সময়ত ১ জন ডাক্তৰৰ বিপৰীতে ১,৪৫৩ জন ৰোগী। ইয়েই প্ৰমাণ কৰে অসমৰ ভয়ানক স্বাস্থ্য খণ্ডৰ অৱস্থা। সেই সমস্যাসমূহ সমাধান কৰাৰ যত্ন কৰাৰ বিপৰীতে পুনৰ মাচুল বৃদ্ধিৰ সিদ্ধান্ত কেৱল হঠকাৰীয়ে নহয় জনতা বিৰোধীও।
চৰকাৰক এনে সিদ্ধান্ত পুনৰ বিবেচনা কৰি এই সিদ্ধান্ত প্রত্যাহাৰ কৰিবৰ বাবে তেওঁ আহ্বান জনায়। তেওঁ লগতে উল্লেখ কৰে যে কল্যাণকামী ৰাষ্ট্ৰৰ চৰিত্ৰ অক্ষুণ্ণ ৰাখিবলৈ চৰকাৰখনে বাজেটত স্বাস্থ্য খণ্ডত ব্যয় কৰিবলগীয়া ধনৰ পৰিমান বৰ্তমানৰ ২.৭৬% পৰা বৃদ্ধি কৰি চৰকাৰী চিকিৎসালয়ৰ সেৱাৰ মানদণ্ড উন্নত কৰিব লাগে। চৰকাৰী চিকিৎসালয়ৰ চিকিৎসক, স্বাস্থ্য কর্মী, লেবৰেটৰী টেকনিচিয়ান আদি সকলো পর্যাপ্ত পৰিমাণে নিযুক্তি দি চিকিৎসা সেবাক সুচল কৰি গঢ়ি তুলিব লাগে।
