ৰাজ্য কপোঁৱা ধিঙৰ দলবদ্ধ ধৰ্ষণৰ অভিযুক্তক ফাৰ্ষ্ট ট্ৰেক আদালতৰ জৰিয়তে ক্ষিপ্ৰতাৰে বিচাৰ প্ৰক্ৰিয়া সম্পন্ন কৰাৰ জৰিয়তে ন্যায় প্ৰদানৰ দাবী আম আদমী পাৰ্টিৰ ৰাজ্যিক সভাপতি ডাঃ ভবেন চৌধুৰীৰ ।
আজি গণেশগুৰিস্থিত আপৰ ৰাজ্যিক কাৰ্যালয়ত সংবাদ মাধ্যমৰ সৈতে মত বিনিময় কৰি আপৰ নেতাগৰাকীয়ে কয়, ” অসম আৰক্ষীয়ে এজন অভিযুক্তক গ্ৰেপ্তাৰ কৰিবলৈ সক্ষম হ’লেও আৰক্ষীৰ জিম্মাত থকা অৱস্থাতে অভিযুক্তৰ ৰহস্যজনকভাৱে মৃত্যু হয়। আৰক্ষীয়ে এতিয়ালৈকে আন দুজন অভিযুক্তক কৰায়ত্ত কৰিব পৰা নাই। আমি আম আদমী পাৰ্টিয়ে অতি শীঘ্ৰেই দোষীক কৰায়ত্ত কৰি ফাৰ্ষ্ট ট্ৰেক আদালতৰ জৰিয়তে বলাৎকাৰীৰ চৰম তথা কঠোৰতম শাস্তি বিচাৰিছোঁ । এই ক্ষেত্ৰত আৰু এটা গুৰুত্বপূৰ্ণ কথা যে আমাৰ দলে অভিযুক্তৰ ন্যায় বহিৰ্ভূত হত্যাৰ বিৰোধিতা কৰোঁ । আইনী ব্যৱস্থাৰ জৰিয়তে ধিঙৰ ঘটনাৰ উপৰিও ৰাজ্যৰ ভিন্ন প্ৰান্তত সংঘটিত বলাৎকাৰৰ অভিযুক্ত সকলক দৃষ্টান্তমূলক শাস্তিৰ দাবী জনাওঁ। ”
আপৰ সভাপতি ডাঃ ভবেন চৌধুৰীয়ে এডিআৰৰ তথ্যৰ উদ্ধৃতিৰে কয়,” পৰিসংখ্যা অনুসৰি বিগত দিনত বিজেপি শাসিত ৰাজ্যসমূহত সৰ্বাধিক মহিলাৰ বিৰুদ্ধে অপৰাধ সংঘটিত হৈছে। বিজেপি দলৰ ৪৪ গৰাকী বিধায়ক আৰু ১০ গৰাকী সাংসদৰ বিৰুদ্ধে নাৰী নিৰ্যাতনৰ অভিযোগ আছে। এনে অৱস্থাত প্ৰধানমন্ত্ৰী নৰেন্দ্ৰ মোদীৰ বেটি বাচাওঁ, বেটি পঢ়াওঁ শ্লোগান অৰ্থহীন। ” ধৰ্ম বা সম্প্ৰ্দায়ৰ ভিত্তিত অভিযুক্ত তথা অপৰাধীৰ শ্ৰেণী বিভাজনৰ বিৰুদ্ধেও সৰৱ হয় আপৰ নেতাগৰাকী।
আনহাতে, ৰাজ্যৰ সাধাৰণ মানুহৰ ওপৰত চৰকাৰে জাপি দিয়া এপিডিচিএলৰ প্ৰিপেইড স্মাৰ্ট মিটাৰ শীঘ্ৰে প্ৰত্যাহাৰ কৰিবলৈ দাবী জনায় ডাঃ ভবেন চৌধুৰীয়ে ।
এই সন্দৰ্ভত আম আদমী পাৰ্টিৰ আন এগৰাকী জ্যেষ্ঠ নেতা ৰাজীৱ শইকীয়াই কয়, ” প্ৰিপেইড স্মাৰ্ট মিটাৰৰ জৰিয়তে চৰকাৰে ৰাজ্যবাসীৰ ওপৰত লুণ্ঠন চলাইছে। এপিডিচিএলৰ প্ৰিপেইড স্মাৰ্ট মিটাৰৰ বিৰুদ্ধে ৰাজ্যজুৰি প্ৰতিবাদ হৈ আছে। আমি আম আদমী পাৰ্টিয়ে প্ৰতিবাদী বিক্ষোভ কাৰ্যসূচী পালন কৰিছোঁ। কিন্তু চৰকাৰখনে বিজেপিৰ ঘনিষ্ঠ ব্যৱসায়ী আদানীৰ স্বাৰ্থত ৰাইজৰ ওপৰত মাধমাৰ সোধাইছে । যি সকল লোকে পূৰ্বে ২০০ টকা বিদ্যুত বিল আদায় দিছিল, প্ৰিপেইড স্মাৰ্ট মিটাৰৰ বাবে আজি সেই সকল উপভোক্তাই ১৫ টকা বা দুহেজাৰ টকালৈ দিবলগীয়া হৈছে। গতিকে শীঘ্ৰেই চৰকাৰে এই লুণ্ঠন বন্ধ কৰক। তদুপৰি দিল্লীত আম আদমী পাৰ্টিৰ মুখ্যমন্ত্ৰী অৰবিন্দ কেজৰিৱালৰ চৰকাৰৰ দৰে অসমতো ২০০ ইউনিটলৈকে বিনামূলীয়া বিদ্যুৎ যোগান আঁচনি গ্ৰহণ কৰিবলৈ আমি চৰকাৰক আহ্বান জনাইছোঁ।”
সংবাদ মাধ্যমৰ সৈতে মত বিনিময় কৰি এনেদৰে চৰকাৰৰ জনবিৰোধী নীতিৰ বিৰুদ্ধে সৰৱ হয় ডাঃ ভবেন চৌধুৰী আৰু ৰাজীৱ শইকীয়াই।
