ভাৰতৰ আৰ্থ-ৰাজনৈতিক পৰিস্থিতিত বাৰে বাৰে কৃষকৰ আত্মহননৰ কথা পোহৰলৈ আহে। কিন্তু এন চি আৰ বিয়ে দিয়া শেহতীয়া প্রতিবেদনৰ পৰিসংখ্যাত কোৱা হৈছে যে শেহতীয়াকৈ ভাৰতত শিক্ষাৰ্থীৰ আত্মহত্যাৰ হাৰে দেশত জনসংখ্যা বৃদ্ধিৰ হাৰ অতিক্রম কৰিছে৷
এনচিআৰবিয়ে আইচিটিআৰআইৰ সহযোগত এই অধ্যয়ন সম্পূৰ্ণ কৰিছে। বুধবাৰে প্ৰকাশ কৰা হৈছে এই প্ৰতিবেদন। তেওঁলোকৰ শেহতীয়া প্ৰতিবেদনৰ পিছতে চাঞ্চল্যৰ সৃষ্টি হৈছে।
শেহতীয়াকৈ নেশ্যনেল ক্ৰাইম ৰেকৰ্ডছ ব্যুৰোৰ ‘শিক্ষাৰ্থীৰ আত্মহত্যা: ভাৰতত ব্যাপক মহামাৰী’ শীৰ্ষক প্ৰতিবেদনত এই বিস্ফোৰক তথ্য পোহৰলৈ আহে। ইয়াৰ পৰা দেখা গ’ল যে এই দেশত দুটা দশকত বছৰি ২ শতাংশ আত্মহত্যাৰ হাৰ বৃদ্ধি পাইছে আৰু কেৱল ছাত্ৰ-ছাত্ৰীৰ মাজত আত্মহত্যাৰ হাৰ তাৰ দুগুণ বৃদ্ধি পাইছে অৰ্থাৎ ৪ শতাংশ। এই হাৰ অকল সামগ্ৰিক আত্মহত্যাৰ হাৰতকৈয়ে বেছি নহয়, জনসংখ্যা বৃদ্ধিৰ হাৰতকৈও অধিক।
লগতে পঢ়কঃ সকলো অভিলেখ অতিক্ৰমি ৮৩ হাজাৰ গোচৰ বিচাৰাধীন উচ্চতম ন্যায়ালয়ত; তদন্তত শীৰ্ষ আদালত
কিয় এই কথা কোৱা হৈছে, তাকো তথ্য দি বুজাই দিয়া হৈছে। এন চি আৰ বিয়ে প্ৰকাশ কৰা অনুসৰি ০-২৪ বছৰীয়া লোকৰ জনসংখ্যালৈ চালে এটা দশকত ৫৮.২ কোটিৰ পৰা ৫৮.১ কোটিলৈ হ্ৰাস পাইছে। কিন্তু ছাত্ৰ-ছাত্ৰীৰ আত্মহত্যা দুগুণ হাৰত বৃদ্ধি পাইছে। ছাত্ৰ-ছাত্ৰীৰ আত্মহত্যা ৬,৬৫৪ৰ পৰা ১৩,০৪৪লৈ বৃদ্ধি পাইছে।
প্ৰতিবেদনত কেৱল সামগ্ৰিকভাৱে ছাত্ৰ-ছাত্ৰীৰ আত্মহত্যাৰ কথাই নহয়, কোনবোৰ ৰাজ্যই শীৰ্ষস্থান দখল কৰিছে তাকো প্ৰকাশ কৰা হৈছে। প্ৰতিবেদন অনুসৰি দেশত বছৰি ছাত্ৰ-ছাত্ৰীৰ আত্মহত্যাৰ সংখ্যাৰ এক তৃতীয়াংশ মাত্ৰ তিনিখন ৰাজ্যতে। সেই তিনিখন ৰাজ্য হ’ল মহাৰাষ্ট্ৰ, মধ্যপ্ৰদেশ আৰু তামিলনাডু।
প্ৰতিবেদন অনুসৰি ২০২১ চনৰ পৰা ২০২২ চনৰ ভিতৰত ছাত্ৰৰ আত্মহত্যাৰ হাৰ ৬ শতাংশ কমিছিল আৰু ছাত্ৰীৰ আত্মহত্যাৰ হাৰ ৭ শতাংশ বৃদ্ধি পাইছিল। ২০২২ চনৰ সমীক্ষা অনুসৰি শিক্ষাৰ্থীৰ আত্মহত্যাৰ ৫৩ শতাংশ ছাত্ৰ। বিগত দশকত ছাত্ৰৰ আত্মহত্যাৰ হাৰ ৫০ শতাংশ বৃদ্ধি পাইছে।
লগতে পঢ়কঃ অক্সিজেন, খাদ্যৰ নাটনি! মহাকাশ কেন্দ্ৰত আসন্ন বিপদত সুনীতা উইলিয়ামছ? কি ক’লে নাছাই?
ছাত্ৰীৰ আত্মহত্যাৰ হাৰ ৬১ শতাংশ বৃদ্ধি পাইছে। তেওঁলোকৰ মতে ছাত্ৰ-ছাত্ৰীৰ মৃত্যুৰ খবৰ সাধাৰণতে ৰাজহুৱাকৈ নাহে, বহু ক্ষেত্ৰত থানাত অভিযোগ দাখিল কৰা নহয়। তথাপিও পোহৰলৈ অহা সংখ্যা অত্যন্ত চিন্তাজনক।
