অসম চৰকাৰৰ উদ্যোগ, বাণিজ্য আৰু ৰাজহুৱা উদ্যোগ বিভাগৰ মহিলা কোষৰ পৃষ্ঠপোষকতাত তথা উত্তৰ পূৰ্বাঞ্চল হস্ততাঁত আৰু বস্ত্ৰ উন্নয়ন নিগম লিমিটেড (এন ই এইচ এইচ ডি চি)ৰ দ্বাৰা আয়োজিত তেজস্বিনী অসম আইডিয়াথন ২০২৪ৰ ২১ অক্টোবৰত নেডফি হাউচত সামৰণি পৰে ।
সমগ্ৰ অসমৰ মহিলা উদ্যোগীসকলক সবলীকৰণ কৰা এই অনুষ্ঠানত ১৫০০ৰো অধিক পঞ্জীয়ন হয় আৰু ৫৮৭টা তালিকাভূক্ত কৰা নতুন ধাৰণাই সকলোৰে সঁহাৰি লাভ কৰে।তেজস্বিনী অসম আইডিয়াথন ২০২৪ত অংশগ্ৰহণকাৰীসকলে অসমৰ সংস্কৃতি আৰু ঐতিহ্যত শিপাই থকা প্ৰযুক্তিগত বিষয়ৰ পৰা আৰম্ভ কৰি সৃষ্টিশীল সামগ্ৰীলৈকে নিজৰ অভিনৱ ধাৰণাসমূহ প্ৰদৰ্শন কৰে ।
তেজস্বিনী অসম আইডিয়াথন ২০২৪ৰ বিজয়ীসকলক পুৰস্কাৰো প্ৰদান কৰা হয়। প্ৰথম পুৰস্কাৰ হিচাবে ১,৫০,০০০ টকা, দ্বিতীয় পুৰস্কাৰ হিচাবে ১,০০,০০০ টকা, আৰু । তৃতীয় পুৰস্কাৰ হিচাবে ৫০,০০,০০০ টকাৰ বাবে ৭৫,০০০ টকা আগবঢ়োৱা হয়। এই উপলক্ষে্য আয়োজিত সভাত অসম চৰকাৰৰ অতিৰিক্ত মুখ্য সচিব ড° বি কল্যাণ চক্ৰৱৰ্তীয়ে মহিলা উদ্যোগীসকলৰ প্ৰচেষ্টাক প্ৰশংসা কৰি ভাষণ প্ৰদান কৰে। তেওঁ অসমৰ আৰ্থ-সামাজিক উন্নয়নক আগুৱাই নিয়াত উদ্যোগীকৰণৰ গুৰুত্বপূৰ্ণ ভূমিকাৰ বিষয়েও আলোকপাত কৰে আৰু মহিলা নেতৃত্বাধীন ব্যৱসায়ৰ বাবে অনুকূল পৰিৱেশ গঢ়ি তোলাৰ বাবে চৰকাৰৰ নিৰন্তৰ সমৰ্থনৰ আশ্বাস দিয়ে।
ৰাজ্যৰ মহিলা উদ্যোগীসকলে লাভ কৰা উল্লেখযোগ্য অগ্ৰগতিৰ বিষয়ে আলোকপাত কৰি তেওঁলোকৰ ধাৰণাসমূহে অসমৰ অৰ্থনীতিত অৰিহণা যোগোৱাই নহয়, মহিলাসকলক উদ্যোগীকৰণৰ বাবে অনুপ্ৰাণিত কৰিব বুলিও তেওঁ আশা প্ৰকাশ কৰে।
এন ই এইচ এইচ ডি চিৰ পৰিচালন সঞ্চালক ব্ৰিগেডিয়াৰ (অৱসৰপ্ৰাপ্ত) ৰাজীৱ কুমাৰ সিঙে তেজস্বিনী অসম আইডিয়াথন ২০২৪ত উপস্থাপন কৰা উদ্ভাৱনীমূলক ধাৰণাসমূহৰ প্ৰশংসা কৰে। অনুষ্ঠানত এন ই এইচ এইচ ডি চিৰ উপদেষ্টা ড০ শ্ৰীপৰ্ণ বি বৰুৱাই এই উদ্ভাৱনী ধাৰণাসমূহক সফল উদ্যোগলৈ ৰূপান্তৰিত কৰাৰ ক্ষেত্ৰত গুৰুত্ব আৰোপ কৰে। তেওঁ ঘোষণা কৰে যে অংশগ্ৰহণকাৰীসকলক সহায় কৰিবলৈ অতি সোনকালে এক মেণ্টৰশ্বিপ আৰু ইনকিউবেচন কাৰ্যসূচী আৰম্ভ কৰা হ’ব। যাৰ জৰিয়তে মহিলাসকলে তেওঁলোকৰ উদ্যোগসমূহৰ বহনক্ষমতা নিশ্চিত কৰিবলৈ বিশেষজ্ঞৰ নিৰ্দেশনা, প্ৰশিক্ষণ আৰু বজাৰৰ সুবিধা প্ৰদান কৰিব পৰা যাব। অসম চৰকাৰৰ উদ্যোগ, বাণিজ্য আৰু ৰাজহুৱা উদ্যোগ বিভাগৰ যুটীয়া সচিব মঞ্জুৰাণী গগৈ তালুকদাৰে প্ৰয়োজনীয় সম্পদ আৰু মঞ্চ প্ৰদান কৰি মহিলা উদ্যোগীসকলক সৱলীকৰণৰ বাবে নিৰন্তৰ সমৰ্থনৰ আশ্বাস দিয়ে।
