নগাঁও জিলাৰ আৰক্ষী অধীক্ষকক শাস্তিমূলক বদলিৰ দাবী জনাই আজি অসম প্ৰদেশ কংগ্ৰেছ কমিটিয়ে দেশৰ মুখ্য নিৰ্বাচন আয়ুক্তলৈ এখন স্মাৰক পত্ৰ প্ৰেৰণ কৰে। অসমৰ মুখ্য নিৰ্বাচনী বিষয়াৰ জৰিয়তে আজি প্ৰেৰণ কৰা পত্ৰখনত অসম প্ৰদেশ কংগ্ৰেছ কমিটিয়ে উল্লেখ কৰে যে নগাঁৱৰ চামগুৰি বিধানসভা সমষ্টিৰ উপ-নিৰ্বাচনত ব্যাপক হিংসা সংঘটিত হৈছে আৰু কংগ্ৰেছ কৰ্মীৰ ওপৰত অবিৰতভাৱে অত্যাচাৰ অব্যাহত আছে।
আজি পৰ্যন্ত কংগ্ৰেছৰ সমদলত যোৱা ১০০খনতকৈয়ো অধিক বাহন দুষ্কৃতিকাৰীয়ে ক্ষতিসাধন কৰিছে। কেবাজনো কংগ্ৰেছ নেতাৰ ওপৰত আক্ৰমণ চলিছে। কিন্তু আৰক্ষী অধীক্ষকজনে এতিয়ালৈকে দুষ্কৃতিকাৰীৰ বিৰুদ্ধে কোনোধৰণৰ কাৰ্যকৰী ব্যৱস্থা গ্ৰহণ কৰা নাই। প্ৰদেশ কংগ্ৰেছৰ অভিযোগ চামগুৰিৰ উপ-নিৰ্বাচনত শাসকীয় পক্ষই বিৰোধী পক্ষৰ ওপৰত তীব্ৰ হেঁচা অব্যাহত ৰাখিছে আৰু কংগ্ৰেছ দলৰ কেবাজনো কৰ্মীৰ ওপৰত আৰক্ষীয়ে আতিশয্যা চলাইছে। ২৬ অক্টোবৰত আৰফানি নামৰ কংগ্ৰেছ কৰ্মী এজনৰ ঘৰলৈ আৰক্ষী আহি আতিশয্যা আৰম্ভ কৰে। একেদৰে ২৭ অক্টোবৰত আৰিফুল ইছলাম আৰু ইজাজুল হক নামৰ দুজন কংগ্ৰেছ কৰ্মীক সাধাৰণ পোছাকত অহা লোকে আৰক্ষী বুলি চিনাকি উঠাই নি হাৰাশাস্তি কৰে। আৰক্ষী অধীক্ষকৰ অগোচৰে এই ঘটনা ঘটা নাই বুলি অভিযোগ কৰি অসম প্ৰদেশ কংগ্ৰেছ কমিটিয়ে আজি মুক্ত আৰু নিকা নিৰ্বাচনৰ স্বাৰ্থত আৰক্ষী অধীক্ষকজনক শীঘ্ৰে শাস্তিমূলক বদলি কৰিবলৈ দাবী জনায়।
উল্লেখ্য যে, ইয়াৰ পূৰ্বেও চামগুৰিত কংগ্ৰেছৰ বিধায়িকা শিৱামণি বৰাৰ ওপৰত আক্ৰমণ চলিছিল আৰু তাৰ বিৰুদ্ধে নিৰ্বাচন আয়ুক্ত অভিযোগ দাখিল কৰা হৈছিল। কিন্তু ১৩ অক্টোবৰৰ পৰা আজি পৰ্যন্ত আৰক্ষীয়ে অভিযুক্তসকলৰ বিৰুদ্ধে কোনো ব্যৱস্থা গ্ৰহণ নকৰিলে। একাংশ বিজেপিয়ে সংবাদ মাধ্যমৰ ওপৰতো আক্ৰমণ চলাইছিল। ৰাজ্য চৰকাৰৰ মন্ত্ৰী পীয়ুষ হাজৰিকাই সংবাদ মাধ্যমৰ ওপৰত আক্ৰমণ চলোৱা লোকসকলক কঠোৰ শাস্তি প্ৰদান কৰা হ’ব বুলি ৰাজহুৱাভাৱে ঘোষণা কৰিছিল। কিন্তু এই মুহূৰ্তলৈ আৰক্ষীৰ ভূমিকা মুঠেই সন্তোষজনক নহয়। আজি সজাতী দলটোত প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰ, সেৱা দলৰ অধ্যক্ষ দ্বীপ বায়ন, সাধাৰণ সম্পাদক বিপুল গগৈ, সুমন কল্যাণ বৰা প্ৰমুখ্যে একাংশ কংগ্ৰেছ নেতাই ৰাজ্যিক মুখ্য নিৰ্বাচনী বিষয়াক সাক্ষাৎ কৰে।
