ৰাজধানী দিল্লীত প্ৰচণ্ড প্ৰদূষণ। বহু পৰিমাণে প্ৰদূষিত বায়ু। সোমবাৰে পুৱা ৮ বজাৰ পৰা দিল্লীত কাৰ্যকৰী হ’ব গ্ৰেডেড ৰেচপন্স একচন প্লেন বা GRAP। এতিয়াৰ বাবে ইউ পি চৰকাৰে দশম আৰু দ্বাদশ শ্ৰেণীৰ বাহিৰে সকলো ছাত্ৰ-ছাত্ৰীৰ বাবে অনলাইন ক্লাছ ঘোষণা কৰিছে।
দিল্লীত বৃদ্ধি পাইছে প্ৰদূষণৰ মাত্ৰা। দেওবাৰে বিয়লি কেন্দ্ৰৰ বায়ু গুণাগুণ পেনেলৰ বৈঠকৰ অন্তত এই পৰিস্থিতিত জৰুৰী ব্যৱস্থা গ্ৰহণ কৰা উচিত বুলি জানিবলৈ দিয়ে। তাৰ পাছত চৰকাৰে বিদ্যালয় বন্ধ কৰাৰ কথা ঘোষণা কৰে। অৱশ্যে অনলাইনযোগে পাঠদান চলি থাকিব বুলি অৱগত কৰা হৈছে। কেৱল দশম আৰু দ্বাদশ শ্ৰেণীৰ ছাত্ৰ-ছাত্ৰীয়েহে বিদ্যালয়লৈ যাব লাগিব।
লগতে এই মুহূৰ্তত ৰাজধানীত ট্ৰাকৰ প্ৰৱেশ নিষিদ্ধ কৰা হৈছে। এই সময়ত কোনো নিৰ্মাণ কাম কৰিব নোৱাৰিব। বৰ্তমান দিল্লীত কোনো BS4 গাড়ী বা পুৰণি ডিজেল গাড়ী চলাব নোৱাৰিব। এই ক্ষেত্ৰত জৰুৰীকালীন কামৰ সৈতে জড়িত বাহনসমূহহে ৰেহাই দিয়া হৈছে। প্ৰতিটো কাৰ্যালয়ত ৫০ শতাংশ কৰ্মচাৰীৰে কাম কৰিবলৈ নিৰ্দেশ দিয়া হৈছে। বাকীসকলে ঘৰৰ পৰাই কাম কৰে। কেন্দ্রীয় চৰকাৰৰ কার্যালয়তো ঘৰৰ পৰাই কাম আৰম্ভ হ’ব পাৰে বুলি খবৰ পোৱা গৈছে৷
অক্টোবৰৰ শেষৰ পৰা দিল্লীত বায়ু প্ৰদূষণৰ পৰিমাণ বৃদ্ধি পাবলৈ ধৰিলে। দীপাৱলীৰ সময়ত আৰু পাছত আকাশলংঘী প্ৰদূষণৰ মাত্ৰা। বৰ্তমান ৰাজধানীৰ বায়ুৰ ভয়াৱহ পৰিস্থিতি। বায়ুৰ গুণাগুণ ব্যৱস্থাপনা আয়োগে প্ৰদান কৰা তথ্য অনুসৰি সন্ধিয়া অহাৰ লগে লগে বায়ুৰ গুণাগুণ অৱনতি ঘটিবলৈ আৰম্ভ কৰে।
এই সকলোবোৰৰ প্ৰতি লক্ষ্য ৰাখি শুকুৰবাৰে দিল্লীৰ মুখ্যমন্ত্ৰীয়ে চৰকাৰী কাৰ্যালয়ৰ সময় সলনি কৰাৰ কথা ঘোষণা কৰে। প্ৰকাশিত নিৰ্দেশনা অনুসৰি দিল্লী পৌৰসভা পুৱা ৮:৩০ বজাৰ পৰা বিয়লি ৫ বজালৈ চলিব। পুৱা ৯ বজাত খোলা হ’ব কেন্দ্ৰীয় চৰকাৰৰ কাৰ্যালয়। সন্ধিয়া ৫:৩০ বজালৈকে চলি থাকিব। দিল্লীৰ চৰকাৰী কাৰ্যালয় পুৱা ১০ বজাৰ পৰা আৰম্ভ হৈ সন্ধিয়া ৬:৩০ বজালৈ চলিব।
ইফালে যেতিয়া দিল্লীৰ প্ৰদূষণে গুৰুতৰ ৰূপ ধাৰণ কৰিছে, তেতিয়া আজাৰবাইজানৰ বাকুত জলবায়ু পৰিৱৰ্তন সম্পৰ্কীয় ৰাষ্ট্ৰসংঘৰ সন্মিলনতো এই বিষয়টো উত্থাপন হৈছে। COP29ৰ বৈঠকত ভাৰতক প্ৰদূষণ ৰোধ কৰিবলৈ অনুৰোধ জনোৱা হৈছে। বিশ্বৰ পৰিৱেশবিদসকলে ভাৰতক অল্পকালীন প্ৰদূষণ হ্ৰাস কৰিবলৈ আহ্বান জনাইছে। এই প্ৰদূষকসমূহৰ ভিতৰত মূলতঃ মিথেন, ক’লা কাৰ্বন, ভূমিস্তৰৰ অ’জন আৰু হাইড্ৰ’ফ্ল’ৰ’কাৰ্বন আদি উল্লেখযোগ্য। যিটো মূলতঃ শস্যৰ শিপা জ্বলোৱাৰ বাবে বতাহত মিহলি হৈ থাকে।
