আইপিএলৰ মেগা নিলামত অৱহেলিত হৈ ৰোৱা পঞ্জাৱৰ আনমোলপ্ৰীত সিঙে লিষ্ট এ ক্ৰিকেটত দ্ৰুততম শতকৰ অভিলেখ গঢ়িবলৈ সক্ষম হৈছে। গ্ৰুপ এত আহমেদাবাদৰ নৰেন্দ্ৰ মোডী ষ্টেডিয়ামত অৰুণাচল প্ৰদেশৰ বিৰুদ্ধে মুখামুখি হয় পঞ্জাৱ। সেই মেচখনতে তেওঁ বেটিং বিস্ফোৰণ ঘটাই মাত্ৰ ৩৫টা বলত শতক অৰ্জন কৰে।
মেচখনত পঞ্জাবে ৯ উইকেটত জয়লাভ কৰে। বিজয়ী ৰান প্ৰায়খিনি আনমোলপ্ৰীত সিঙৰ বেটৰ পৰাই আহিছিল। ৫০ অভাৰত জয়ৰ লক্ষ্য আছিল মাত্ৰ ১৬৫ ৰান। আনমোলপ্ৰীত সিঙে কম ৰানৰ লক্ষ্যৰ সন্মুখত নিজকে নিয়ন্ত্ৰণ নকৰিলে। অৰুণাচল প্ৰদেশৰ বলিঙৰ সৈতে বিস্ফোৰ খেলিবলৈ আৰম্ভ কৰিছিল। ৩৫টা বলত শতক অৰ্জন কৰাৰ পাছত তেওঁ ১১৫ ৰানত অপৰাজিত হৈ থাকে। মাত্ৰ ১২.৫ অভাৰতে পঞ্জাবে খেলখন সমাপ্ত কৰে।
ইনিংছটোত তেওঁ ১২টা বাউণ্ডেৰীৰ লগতে তেওঁ ৯টা ছয়ো মাৰে। আনমোলপ্ৰীতে দ্বিতীয় উইকেটত প্ৰভসিমৰণ সিঙৰ সৈতে (২৫ বলত ৩৫ৰান) ১৫৩ ৰানৰ পাৰ্টনাৰশ্বিপ গঢ়িছিল।
তাৰ পূৰ্বে অৰুণাচল প্ৰদেশৰ বেটছমেনে পঞ্জাৱৰ বলিঙৰ সন্মুখত কোনো সুবিধা ল’ব পৰা নাছিল। ৫০ অভাৰত মাত্ৰ ১৬৩ ৰান সংগ্ৰহ কৰি আউট হৈ গৈছিল। মায়ংক মাৰ্কাণ্ডে আৰু অশ্বিনী কুমাৰে দুৰ্দান্ত বলিং কৰে। দুয়োজনে তিনিটাকৈ উইকেট দখল কৰে। বলতেজ সিঙে দুটা উইকেট দখল কৰে।
টেচি নেৰী (৪২) আৰু হাৰ্দিক ভাৰ্মাই (৩৮) অৰুণাচল প্ৰদেশক সন্মানজনক স্ক’ৰত উপনীত হোৱাত সহায় কৰে। কিন্তু এই মেচত জয়ী হ’বলৈ পঞ্জাৱৰ কোনো সমস্যা নাছিল। পঞ্জাৱৰ হৈ আনমোলপ্ৰীতে খেলখনত প্ৰায় এককভাৱে জয় আজুৰি আনে।
ইয়াৰ পূৰ্বে বৰোদাৰ তাৰকা ইউছুফ পাঠানে লিষ্ট এ ক্ৰিকেটত দ্ৰুততম শতক অৰ্জন কৰিছিল। ৪০টা বলত শতক অৰ্জন কৰা পাঠান ৪২টা বলত ১০৮ ৰানত অপৰাজিত আছিল। মহাৰাষ্ট্ৰৰ ২৩১ ৰানৰ লক্ষ্য খেদি বৰোদাই মাত্ৰ ৩৭ অভাৰতে খেলখন সমাপ্ত কৰিছিল।
