পানীত হাঁহ নচৰা অৱস্থা হৈছে বাওঁপন্থী দলসমূহৰ। দিল্লী বিধানসভাৰ নিৰ্বাচনত ছখন আসনত প্ৰতিদ্বন্দ্বিতা কৰিবলৈ একত্ৰিত হোৱা বাওঁপন্থী দলসমূহে সকলো আসনতে নোটাতকৈ কম ভোট লাভ কৰিছে।
বাওঁপন্থী দলসমূহৰ ভিতৰত ভাৰতীয় কমিউনিষ্ট পাৰ্টি (মাৰ্ক্সবাদী)য়ে কৰোৱাল নগৰ আৰু বদৰপুৰৰ পৰা প্ৰাৰ্থী প্ৰক্ষেপ কৰিছিল, বিকাশপুৰী আৰু পালামৰ পৰা ভাৰতীয় কমিউনিষ্ট পাৰ্টিয়ে প্ৰতিদ্বন্দ্বিতা কৰিছিল আৰু চিপিআই(এমএল) লিবাৰেশ্যনে নাৰেলা আৰু কণ্ডলী আসনত প্ৰতিদ্বন্দ্বিতা কৰিছিল।
ছয়খন আসনত বাওঁপন্থী দলসমূহে একেলগে ২১৫৮টা ভোট লাভ কৰাৰ বিপৰীতে নোটাই ৫৬২৭টা ভোট লাভ কৰে।
২০২০ চনৰ দিল্লীৰ সংঘৰ্ষৰ ফলত আটাইতকৈ বেছি ক্ষতিগ্ৰস্ত হোৱা অন্যতম অঞ্চল কৰোৱাল নগৰত চিপিআই(এম)য়ে সুপৰিচিত আৰটিআই কৰ্মী তথা অধিবক্তা অশোক আগৰৱালাক প্ৰক্ষেপ কৰিছিল, যিয়ে মাত্ৰ ৪৫৭ টা ভোট লাভ কৰিছিল, আনহাতে ৭০৯ টা ভোট নোটালৈ গৈছিল।ইয়াৰ বিপৰীতে বিজয়ী প্ৰাৰ্থী ভাৰতীয় জনতা পাৰ্টিৰ কপিল মিশ্ৰই ১,০৭,৩৬৭ টা ভোট লাভ কৰে।
বদৰপুৰত চিপিআই(এম)ৰ প্ৰাৰ্থী জগদীশ চান্দে ৩৬৭টা ভোট লাভ কৰাৰ বিপৰীতে বিজয়ী প্ৰাৰ্থী আম আদমি পাৰ্টিৰ ৰাম সিং নেতাজীয়ে ১,১২,৯৯১টা ভোট আৰু ৯১৫টা ভোট লাভ কৰে নোটাই।
বিকাশপুৰীৰ চিপিআই প্ৰাৰ্থী শ্বেজো ভাৰ্গেজে ৫৮০টা ভোট লাভ কৰাৰ বিপৰীতে নোটালৈ ১১২৭টা ভোট যায়। বিজয়ী প্ৰাৰ্থী বিজেপিৰ পংকজ কুমাৰ সিঙে লাভ কৰে ১,০৩,৯৫৫টা ভোট। চিপিআইৰ পালামৰ প্ৰাৰ্থী দিলীপ কুমাৰে ৩২৬টা ভোট লাভ কৰাৰ বিপৰীতে নোটাই ১১১৯টা ভোট লাভ কৰে। বিজয়ী প্ৰাৰ্থী বিজেপিৰ কুলদীপ সোলংকিয়ে লাভ কৰে ৮২,০৪৬টা ভোট।
ইফালে, ভাৰতীয় কমিউনিষ্ট পাৰ্টি (মাৰ্ক্সবাদী-লেনিনবাদী) লিবাৰেচনৰ প্ৰাৰ্থীসকলৰ প্ৰদৰ্শনো একেধৰণৰ আছিল।
নৰেলাৰ পৰা চিপিআই(এমএল)ৰ প্ৰাৰ্থী অনিল কুমাৰ সিঙে ৩২৮টা ভোট লাভ কৰাৰ বিপৰীতে নোটাই ৯৮১টা ভোট লাভ কৰে। বিজয়ী প্ৰাৰ্থী বিজেপিৰ ৰাজ কৰণ খাত্ৰীয়ে লাভ কৰে ৮৭,২১৫টা ভোট।
কণ্ডলীত চিপিআই(এমএল)ৰ অমৰজীত প্ৰসাদে মাত্ৰ ১০০টা ভোট লাভ কৰাৰ বিপৰীতে নোটাই ৭৭৬টা আৰু বিজয়ী প্ৰাৰ্থী আপৰ কুলদীপ কুমাৰে ৬১,৭৯২টা ভোট লাভ কৰে।
