২০২১-২২ চনৰ পৰা ২০২৪-২৫ চনৰ ডিচেম্বৰ মাহলৈকে অসমলৈ মুঠ ২ কোটি ৪৩ লাখ ৬৪ হাজাৰ ১৮০ জন পৰ্যটকে ভ্ৰমণ কৰিছে। পৰ্যটন মন্ত্ৰী ৰণজিৎ কুমাৰ দাসে মঙলবাৰে বিধানসভাত এই তথ্য দাঙি ধৰে। বিধায়ক অখিল গগৈৰ এক প্ৰশ্নৰ উত্তৰত মন্ত্ৰীগৰাকীয়ে কয় যে ২০২১-২২ চনৰ পৰা ২০২৪-২৫ চনৰ ডিচেম্বৰলৈকে ৰাজ্যখনলৈ অহা পৰ্যটকৰ মুঠ সংখ্যা ২,৪৩,৬৪,১৮০ জন। মন্ত্ৰীগৰাকীয়ে লগতে কয় যে ইয়াৰে ৬০,৩০৬ জন আছিল বিদেশী পৰ্যটক।
উল্লেখ্য যে ২০২২-২৩ বৰ্ষত সৰ্বাধিক সংখ্যক পৰ্যটকে অসম ভ্ৰমণ কৰিছিল। এই সময়ছোৱাত মুঠ ৯৮ লাখ ৩১ হাজাৰ ১৪১ জন পৰ্যটক ৰাজ্যখনলৈ আহিছিল। ২০২৩-২৪ চনত এই সংখ্যা আছিল ৭০ লাখ ৬৭ হাজাৰ ৩৩৫ জন। ২০২১-২২ চনত পৰ্যটকৰ সংখ্যা আছিল ১৭ লাখ ২ হাজাৰ ৯৩২ জন। আনহাতে, ২০২৪-২৫ চনৰ ডিচেম্বৰ মাহলৈকে ৫৭ লাখ ৬২ হাজাৰ ৭৭২ জন পৰ্যটকে অসম ভ্ৰমণ কৰাৰ তথ্য পোৱা গৈছে।
এ আই ইউ ডি এফৰ বিধায়ক আমিনুল ইছলামৰ আন এক প্ৰশ্নৰ উত্তৰত মন্ত্ৰীগৰাকীয়ে কয় যে ৰাজ্য চৰকাৰে পৰ্যটন খণ্ডক অধিক বিকশিত কৰাৰ বাবে আন্তঃগাঁথনি উন্নয়ন, প্ৰচাৰ আৰু দক্ষতা বিকাশৰ বিভিন্ন আঁচনি হাতত লোৱা হৈছে।
উল্লেখ্য যে নদীভিত্তিক পৰ্যটনৰ প্ৰসাৰৰ বাবে পৰ্যটন বিভাগটোৱে ১৯৯১-৯২ চনত গুৱাহাটীৰ ব্ৰহ্মপুত্ৰ নদীত ‘জলপৰী’ আৰু ২০১১-১২ চনত গুৱাহাটীৰ পৰা মাজুলীলৈ ‘মহাবাহু’ নামৰ বিলাসী ক্ৰুজ সেৱা আৰম্ভ কৰিছিল। ইয়াৰ উপৰিও, ব্ৰহ্মপুত্ৰ নদীৰ পাৰত অৱস্থিত গুৱাহাটীৰ আঠটা প্ৰধান ধৰ্মীয় স্থান আৰু ইয়াৰ চাৰিওফালৰ অঞ্চলসমূহ সংযোগ কৰি ‘হপ অন হপ অফ’ (hop On Hop Off )নাও সেৱাৰ পৰিকল্পনা হাতত লোৱা হৈছে উল্লেখ কৰে।
এই পৰিকল্পনাৰ কাৰ্যকৰীকৰণৰ বাবে সাগৰমালা ডেভেলপমেণ্ট কোম্পানী লিমিটেড, ভাৰতীয় আভ্যন্তৰীণ জলপথ প্ৰাধিকৰণ লিমিটেড, ৰাজ্যৰ পৰ্যটন বিভাগ আৰু আভ্যন্তৰীণ জল পৰিবহণ বিভাগ, অসমৰ যৌথ উদ্যোগত এটা নতুন সংস্থা গঠন কৰা হৈছে। মন্ত্ৰীগৰাকীয়ে লগতে কয় যে এই সংস্থাটোক ‘ব্ৰহ্মপুত্ৰ সাগৰমালা মন্দিৰ দৰ্শনম এছ পি ভি প্ৰাইভেট লিমিটেড’ নামেৰে নামকৰণ কৰা হৈছে আৰু প্ৰকল্পটো ৰূপায়ণৰ দায়িত্ব অৰ্পণ কৰা হৈছে।
