কথা মতেই কাম। এইবাৰ ঝিলাম নদীৰ পানীত ডুবিল পাকিস্তান। কাশ্মীৰৰ পেহেলগামত নিৰীহ পৰ্যটকৰ ওপৰত হোৱা নৃশংস সন্ত্ৰাসবাদী আক্ৰমণৰ পিছৰে পৰা ভাৰত আৰু পাকিস্তানৰ মাজত আন্তঃৰাষ্ট্ৰীয় ৰাজনীতি উত্তপ্ত হৈ পৰে। সময়ৰ লগে লগে দুয়োখন দেশৰ ৰাজনৈতিক সম্পৰ্ক অধিক জটিল হৈ পৰিছে।
পৰ্যটকৰ ওপৰত সন্ত্ৰাসবাদী আক্ৰমণৰ পৰিপ্ৰেক্ষিতত ভাৰত চৰকাৰে সিন্ধু জল চুক্তি স্থগিত ৰখাৰ সিদ্ধান্ত ঘোষণা কৰিছে। এইবাৰ ভাৰতে ঝিলাম নদীৰ পৰা পানী এৰি দিলে।
জানিব পৰা মতে, শনিবাৰে নিশাৰ পৰা বিটস্তা নদীৰ জলপৃষ্ঠ হঠাতে বৃদ্ধি পাবলৈ আৰম্ভ কৰিছে। ফলত পাকিস্তান অধিকৃত কাশ্মীৰৰ এক বৃহৎ অঞ্চল ডুব গৈছে। পাকিস্তান অধিকৃত কাশ্মীৰৰ মুজাফ্ফৰাবাদ আৰু চাকোটিত ঝিলাম নদীৰ পানী উফন্দি উঠাৰ বাবে বান পৰিস্থিতিৰ সৃষ্টি হৈছে।
ইয়াৰ উপৰিও পাকিস্তান অধিকৃত কাশ্মীৰৰ হাট্টিয়ান বালা জিলাৰ বিস্তীৰ্ণ অঞ্চলও ডুব গৈছে। সেই অঞ্চলসমূহৰ বাসিন্দাসকলে কোনো ধৰণৰ পূৰ্বৰ সতৰ্কবাণী অবিহনে নিশাটোৰ ভিতৰতে পানী এৰি দিয়াৰ বাবে সমস্যাৰ সন্মুখীন হৈছে।
সূত্ৰ অনুসৰি, হঠাৎ ঝিলাম নদীৰ পানী এৰি দিয়াৰ ফলত পাকিস্তানত হাহাকাৰ লাগিছে। পাকিস্তান চৰকাৰে দাবী কৰিছে যে ভাৰতে অঘোষিতভাৱে পানী এৰি দিয়াটো জল সন্ত্ৰাসবাদ। ঝিলাম নদীৰ পাৰৰ অঞ্চলসমূহৰ বাসিন্দাসকলক নিৰাপদ স্থানলৈ স্থানান্তৰিত হ’বলৈ জৰুৰীভাৱে সকীয়াই দিছে হাট্টিয়ান প্ৰশাসনে।
এই বিষয়ত স্থানীয় প্ৰশাসনৰ এক বিবৃতিত কোৱা হৈছে যে, “ভাৰতে বিতষ্টাত স্বাভাৱিকতকৈ অধিক পানী এৰি দিছে। ফলত বান পৰিস্থিতিৰ সৃষ্টি হৈছে।” কেৱল সেয়াই নহয়, প্ৰশাসনে স্থানীয় বাসিন্দাসকলক নদীৰ পাৰৰ অঞ্চলৰ পৰা আঁতৰি যাবলৈ নিৰ্দেশ দিছে।
জানিব পৰা মতে, অতিৰিক্ত পানী এৰি দিয়াৰ বাবে পাকিস্তান অধিকৃত কাশ্মীৰৰ কোহালা, ঢালকোটৰ দৰে নিম্নভূমি অঞ্চলত বানৰ ফলত কৃষিভূমি আৰু শস্যৰ ক্ষতিসাধন হৈছে।
