যোৱা বছৰ আদানী গ্ৰুপৰ বিৰুদ্ধে উৎকোচৰ অভিযোগত আমেৰিকাৰ আদালতত গোচৰ ৰুজু হৈছিল। এই গোচৰৰ পৰা সকাহ পাবলৈ আদানী গ্ৰুপে ট্ৰাম্প প্ৰশাসনৰ কাষ চাপিছে। ভাৰতীয় কোটিপতি গৌতম আদানীৰ প্ৰতিনিধি আৰু আদানী গ্ৰুপৰ বিষয়াসকলে শেহতীয়াকৈ ট্ৰাম্প প্ৰশাসনৰ বিষয়াসকলৰ সৈতে সাক্ষাৎ কৰে।
দেওবাৰে ব্লুমবাৰ্গৰ এক প্ৰতিবেদনত এই বৈঠকৰ বিষয়টো প্ৰকাশ পাইছে। ব্লুমবাৰ্গে এই প্ৰতিবেদন প্ৰকাশ কৰাৰ লগতে বিষয়টোৰ সৈতে পৰিচিত লোকৰ বক্তব্যও প্ৰকাশ কৰে।
যোৱা বছৰৰ নৱেম্বৰ মাহত গৌতম আদানীকে ধৰি আদানী গ্ৰুপৰ কেইবাজনো সদস্যৰ বিৰুদ্ধে আমেৰিকাৰ আদালতত গোচৰ ৰুজু হৈছিল। অভিযোগ উত্থাপন হৈছিল যে আদানী গ্ৰুপে ভাৰতত বিদ্যুৎ যোগানৰ চুক্তিৰ বাবে উৎকোচ দিছিল আৰু আমেৰিকাৰ বিনিয়োগকাৰীক বিপথে পৰিচালিত কৰি ধন সংগ্ৰহ কৰিছিল।
এই গোচৰত আমেৰিকাৰ আদালতে গৌতম আদানী আৰু তেওঁৰ ভতিজা সাগৰ আদানীকো চমন কৰে। ইউনাইটেড ষ্টেটছ ছিকিউৰিটিজ এণ্ড এক্সচেঞ্জ কমিছনেও এক সুকীয়া গোচৰ তৰে। এই তদন্ত আৰম্ভ হৈছিল বাইডেন প্ৰশাসনৰ সময়ত। ইয়াক ৰোধ কৰিবলৈ আদানী গ্ৰুপে ট্ৰাম্প প্ৰশাসনৰ কাষ চাপিছে।
ব্লুমবাৰ্গৰ এক প্ৰতিবেদন অনুসৰি আদানি গ্ৰুপৰ প্ৰতিনিধিয়ে কয় যে এই গোচৰৰ সৈতে ট্ৰাম্প প্ৰশাসনৰ নীতিগত অগ্ৰাধিকাৰৰ কোনো সম্পৰ্ক নাই। সেয়েহে এই গোচৰৰ বিচাৰ প্ৰক্ৰিয়া পুনৰ বিবেচনা কৰিবলৈ অনুৰোধ জনোৱা হৈছে।
চলিত বৰ্ষৰ আৰম্ভণিৰে পৰা এই গোচৰত আদানী গ্ৰুপে নিষ্পত্তি কৰিবলৈ চেষ্টা চলাই আহিছে। এই বৈঠক তাৰেই ফল বুলি কোৱা হৈছে। অৱশ্যে আদানি গ্ৰুপ, হোৱাইট হাউছ আৰু ন্যায় বিভাগৰ প্ৰতিনিধিয়ে বৈঠক সন্দৰ্ভত ব্লুমবাৰ্গৰ প্ৰতিবেদন সম্পৰ্কচ কোনো মন্তব্য দিবলৈ অস্বীকাৰ কৰে।
