ভাৰত আৰু পাকিস্তানৰ মাজত যুদ্ধবিৰতি সম্পৰ্কে পুনৰ প্ৰকাশ মন্তব্য কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে।
ৰাষ্ট্ৰপতি ট্ৰাম্পে কয় যে মাত্ৰ কেইমাহমানৰ ভিতৰতে আমি ভাৰত-পাকিস্তান, ইজৰাইল-ইৰাণ, ডি আৰ চি-ৰুৱাণ্ডা আৰু আন কিছুমান দেশৰ মাজত শান্তি স্থাপন কৰিবলৈ সক্ষম হৈছো।
ট্ৰাম্পে কয়, “ভাৰত আৰু পাকিস্তানত দুজন মহান নেতা আছে আৰু তেওঁলোকে যুদ্ধ ৰোধ কৰিবলৈ সক্ষম হৈছে। তেওঁলোকৰ মাজত ডাঙৰ যুঁজ চলিছিল। সকলোৱে জানিছিল যে ইয়াৰ পৰিণতি বহুত বেয়া হ’ব।”
“তেওঁলোক দুয়োখন অতি শক্তিশালী পাৰমাণৱিক ৰাষ্ট্ৰ। মোৰ প্ৰশাসনে আগন্তুক মাহ আৰু বছৰবোৰত সকলোৰে সৈতে ঘনিষ্ঠভাৱে কাম কৰি যাব।”উল্লেখ্য যে ড’নাল্ড ট্ৰাম্পে ভাৰত আৰু পাকিস্তানৰ মাজত যুদ্ধবিৰতি অনা বুলি কেইবাবাৰো দাবী কৰিছে। অৱশ্যে যুদ্ধবিৰতিত আমেৰিকা আৰু ট্ৰাম্পৰ ভূমিকাক অস্বীকাৰ কৰিছে ভাৰতে। একে সময়তে যুদ্ধবিৰতিৰ বাবে পাকিস্তানে ৰাষ্ট্ৰপতি ট্ৰাম্প আৰু আমেৰিকাক কেইবাবাৰো ধন্যবাদ জনাইছে। সেয়েহে ট্ৰাম্প আৰু মোদীৰ বক্তব্যক লৈ বিতৰ্ক এতিয়া চলি আছে।
