পুনৰবাৰ উচ্চতম ন্যায়ালয়ৰ তীব্ৰ সমালোচনাৰ সন্মুখীন হৈছে ইডি। এই বছৰৰ পৰিসংখ্যাৰ উদ্ধৃতি দাঙি ধৰি মুখ্য ন্যায়াধীশ বি আৰ গাভাইয়ে ইডিক ধমক দি কয় যে দাখিল কৰা অভিযোগৰ ০.১ শতাংশহে দোষী সাব্যস্ত কৰা হৈছে। কেৱল সেয়াই নহয়, ইডিয়েও দোষী সাব্যস্ত নহ’লেও দিনৰ পিছত দিন জিম্মাত ৰখাত পাকৈত হৈ পৰিছে। এইদৰেই ভর্ৎসনা কৰে উচ্চতম ন্যায়ালয়ে।
জে এছ ডব্লিউ চিমেণ্টে ভূষণ পাৱাৰ এণ্ড ষ্টীল লিমিটেডৰ অধিগ্ৰহণৰ সৈতে জড়িত গোচৰৰ পৰিপ্ৰেক্ষিতত মুখ্য ন্যায়াধীশৰ নেতৃত্বত গঠিত বিচাৰপীঠে ইডিক তীব্ৰ সমালোচনা কৰে।
এজন অধিবক্তাই কয় যে ভূষণৰ বিৰুদ্ধে ইডিৰ তদন্ত এতিয়াও অব্যাহত আছে। সেই কথা শুনি ন্যায়াধীশ গাভাইয়ে কয়, “ইয়াতো ইডি আছে নেকি?”
এনে মন্তব্যৰ পিছত কেন্দ্ৰৰ ছলিচিটৰ জেনেৰেল তুষাৰ মেহতাই কয় যে ইডিৰ বিৰোধিতা কৰি ইউটিউবত কেইবাটাও ভুৱা ভিডিঅ’ প্ৰচাৰ কৰা হৈছে। কিন্তু বিত্তীয় অনিয়মৰ অভিযোগ দাখিল কৰাৰ পিছত ইডিয়ে ২৩ হাজাৰ কোটি টকা উদ্ধাৰ কৰিছে।
অৱশ্যে মুখ্য ন্যায়াধীশগৰাকীয়ে মেহতাক কয়, “মই মাত্ৰ ১০-১৫ মিনিটৰ বাবে বাতৰি কাকতখন পঢ়ো। আদালতে কোনো বিশেষ পক্ষৰ কথা নুশুনে।” ইয়াৰ পিছত ন্যায়াধীশ গাভাইয়ে কয়, “আপোনাৰ অভিযোগৰ ভিত্তিত দোষী সাব্যস্ত হোৱাৰ হাৰ কিমান? যিসকলৰ বিৰুদ্ধে আৰ্থিক অনিয়ম অনা হৈছে তেওঁলোকৰ দোষী সাব্যস্ত নহ’লেও আপোনালোকে তেওঁলোকক বছৰ বছৰ ধৰি জেলত ৰাখিবলৈ সাজু।”
উল্লেখ্য যে শেহতীয়াকৈ কেইবাবাৰো উচ্চতম ন্যায়ালয়ৰ তীব্ৰ সমালোচনাৰ সন্মুখীন হৈছে ইডি। কিছুদিন পূৰ্বে উচ্চতম ন্যায়ালয়ে স্পষ্টকৈ কৈছিল যে কেন্দ্ৰীয় তদন্তকাৰী সংস্থাটো ৰাজনৈতিক যুঁজত লিপ্ত হৈছে। ৰাজনৈতিক স্বাৰ্থৰ বাবে ইডিৰ অপব্যৱহাৰ হৈছে। প্ৰাক্তন মুখ্য ন্যায়াধীশ সঞ্জীৱ খান্নাইও ইডিক তীব্ৰ সমালোচনা কৰি কৈছিল যে অভিযুক্তক জেলত ৰখাৰ বাবে ধাৰাবাহিকভাৱে অভিযোগনামা প্ৰস্তুত কৰা হৈছে। উচ্চতম ন্যায়ালয়ে আপ নেতা অৰবিন্দ কেজৰিৱাল আৰু মনীষ চিছ’দিয়াক জামিন প্ৰদান কৰাৰ সময়ত এই বিষয়টোৰ কথা উল্লেখ কৰিছিল।
মন কৰিবলগীয়া যে ইডিৰ কাৰ্যকলাপক লৈ বিৰোধী নেতৃত্বই সদায় সৰৱ হৈ আহিছে। শেহতীয়াকৈ উচ্চতম ন্যায়ালয়েও সেই বিষয়টোক লৈ নিন্দা কৰিছে।
