অসমৰ জনসাধাৰণে সন্মুখীন হোৱা জ্বলন্ত সমস্যাসমূহক লৈ ৰাজ্যজুৰি শক্তিশালী জনমত গঠন কৰিবৰ বাবে বাঁওপন্থী দলসমূহে যৌথভাৱে কাম কৰাৰ সিদ্ধান্ত গ্ৰহণ কৰিছে। আজি চিপিআই(এম)ৰ ৰাজ্যিক কাৰ্যালয়ত চিপিআই(এম), চিপিআই আৰু চিপিআই(এম-এল)ৰ ৰাজ্যিক নেতৃবৃন্দৰ এক যৌথ সভাত এই সিদ্ধান্ত লোৱা হয়। প্ৰবীণ বাঁওপন্থী নেতা মুনিন মহন্তৰ সভাপতিত্বত অনুষ্ঠিত এই সভাত অসমৰ সাম্প্ৰতিক পৰিস্থিতি সম্পৰ্কে গভীৰ উদ্বেগ প্ৰকাশ কৰে।
দলকেইটাই প্ৰকাশ কৰা এক যৌথ বিবৃতিত উল্লেখ কৰিছে যে, হিমন্ত বিশ্ব শৰ্মা নেতৃত্বাধীন বিজেপি চৰকাৰখনে ৰাজ্যখনত বিষাক্ত সাম্প্ৰদায়িক বাতাৱৰণ সৃষ্টি কৰিবলৈ উঠি-পৰি লাগিছে। কোনো বিকল্প সংস্থাপন আৰু ক্ষতিপূৰণৰ ব্যৱস্থা নকৰাকৈ সাম্প্ৰদায়িক ভিত্তিত উচ্ছেদ অভিযান সংঘটিত কৰা, ‘মিঞা বিৰোধী অভিযান’ চলোৱা আদিৰ নামত এক ভয়ংকৰ সাম্প্ৰদায়িক বাতাৱৰণ সৃষ্টি কৰিবলৈ শাসক দল আৰু চৰকাৰে অবিৰতভাৱে অপচেষ্টা চলাই গৈছে। অসমৰ জনসাধাৰণে জীয়াতু ভুগি থকা জ্বলন্ত সমস্যাৱলীৰ পৰা দৃষ্টি আঁতৰাই ৰাইজক ভাগ ভাগ কৰি ৰাজনৈতিক মুনাফা লাভ কৰাৰ বাবেই এই ষড়যন্ত্ৰ। অৱশ্যে সাম্প্ৰদায়িক আৰু বিভাজনবাদী প্ৰচাৰৰ বিৰুদ্ধে সাহসেৰে আৰু দৃঢ়তাৰে মাত মাতিছে ৰাজ্যখনৰ সচেতন নাগৰিকসকলে। নিজৰ অধিকাৰ আদায়ৰ বাবে শ্ৰমিক-কৰ্মচাৰী-শিক্ষকসকলেও ৰাজপথত আন্দোলন-সংগ্ৰাম সংগঠিত কৰি আছে।
এই প্ৰেক্ষাপটত দলসমূহে অত্যাৱশ্যকীয় সামগ্ৰীৰ দাম বৃদ্ধি ৰোধ, ভূমিহীনক ভূমিৰ অধিকাৰ প্ৰদান আৰু বিকল্প অবিহনে উচ্ছেদ বন্ধ, ছয় জনগোষ্ঠীৰ অনুসূচীকৰণ, ‘কা’ৰ প্ৰয়োগ বন্ধ আৰু এনআৰচি প্ৰক্ৰিয়া সম্পূৰ্ণ কৰা, শ্ৰমিক-কৰ্মচাৰী-শিক্ষক-কৃষকক ন্যায্য অধিকাৰ প্ৰদান, নতুন কৰ্মসংস্থান সৃষ্টি, একাংশ ভোটাৰৰ ভোটাধিকাৰ কৰ্তনৰ লক্ষ্যৰে কৰিব বিচৰা ভোটাৰ তালিকাৰ বিশেষ ব্যাপক সংশোধন (এছআইআৰ) বাতিল, সাম্প্ৰদায়িক প্ৰচাৰ বন্ধ আদি বিষয়সমূহক লৈ ৰাজ্যখনৰ বিভিন্ন স্থানত যুটীয়া অভিৱৰ্তন অনুষ্ঠিত কৰিব। প্ৰথমখন অভিৱৰ্তন অহা ২৮ আগষ্টত শিৱসাগৰত অনুষ্ঠিত হ’ব বুলি জনাইছে।
সভাই বাঁও দলসমূহৰ সমন্বয় অধিক সংহত কৰাৰ লক্ষ্যৰে এক সমন্বয় কমিটি গঠনৰো সিদ্ধান্ত লয়। সভাত চিপিআই(এম)ৰ ৰাজ্যিক সম্পাদক সুপ্ৰকাশ তালুকদাৰ আৰু ইচফাকুৰ ৰহমান, চিপিআইৰ ৰাজ্যিক সম্পাদক কনক গগৈ, মুনিন মহন্ত, বিপুল তালুকদাৰ আৰু অভিজিত চক্ৰৱৰ্তী আৰু চিপিআই(এম-এল)ৰ ৰাজ্যিক সম্পাদক বিবেক দাসে অংশগ্ৰহণ কৰে। এই যৌথ পদক্ষেপে অসমৰ ৰাজনৈতিক পৰিস্থিতিত নতুন গতি প্ৰদান কৰিব বুলি আশা প্ৰকাশ কৰিছে।
