দুৰ্নীতিৰ অভিযোগত ইডিৰ জালত আপৰ আন এজন শীৰ্ষ নেতা। মঙলবাৰে পুৱা ইডিয়ে দিল্লীৰ প্ৰাক্তন মন্ত্ৰী সৌৰভ ভৰদ্বাজৰ ঘৰকে ধৰি ১৩টা স্থানত তালাচী আৰম্ভ কৰে। চিকিৎসালয় নিৰ্মাণত ব্যাপক দুৰ্নীতি সংঘটিত হোৱাৰ অভিযোগত তালাচী আৰম্ভ হৈছে।
জানিব পৰা মতে দিল্লীত আপ চৰকাৰৰ দিনত ২০১৮-১৯ চনত ২৪খন চিকিৎসালয় নিৰ্মাণৰ অনুমোদন দিয়া হৈছিল। কোৱা হৈছিল যে ৬ মাহৰ ভিতৰত আই চি ইউ বিচনা থকা চিকিৎসালয়সমূহ নিৰ্মাণ কৰা হ’ব। কিন্তু ইমান সময়ৰ পাছতো কাম সম্পূৰ্ণ হোৱা নাই। অৱশ্যে ৮০০ কোটিৰো অধিক খৰচ হৈছে। স্বাস্থ্য খণ্ডত ব্যাপক দুৰ্নীতিৰ অভিযোগত জুন মাহত প্ৰাক্তন মন্ত্ৰীগৰাকীৰ বিৰুদ্ধে গোচৰ ৰুজু কৰিছিল দুৰ্নীতি বিৰোধী শাখাই। এই গোচৰত প্ৰাক্তন স্বাস্থ্যমন্ত্ৰী সত্যেন্দ্ৰ জৈনৰ সৈতে ভৰদ্বাজৰ নাম উল্লেখ কৰা হৈছে। সেই গোচৰৰ ভিত্তিত আজি ইডিয়ে আৰম্ভ কৰিছে অনুসন্ধান অভিযান। কেন্দ্ৰীয় বাহিনীৰ জোৱানৰ লগতে ভৰদ্বাজৰ ঘৰকে ধৰি ১৩টা স্থানত অভিযান চলাই আছে।
ইডিৰ দাবী অনুসৰি দিল্লীত লোক নায়ক চিকিৎসালয় নিৰ্মাণৰ বাবে ৪৮৮ কোটি টকা আবণ্টন দিয়া হৈছিল। অৱশ্যে এই প্ৰকল্পৰ বাবে এই পৰ্যন্ত ১১৩৫ কোটিতকৈ অধিক ধন ব্যয় কৰা হৈছে। কিন্তু কাম সম্পূৰ্ণ হোৱা নাই। বহু ক্ষেত্ৰত দেখা গৈছে যে চিকিৎসালয়, আই চি ইউ, পলিক্লিনিক নিৰ্মাণত অযথা পলম হৈছে। প্ৰায়বোৰ প্ৰকল্প সময়মতে সম্পূৰ্ণ হোৱা নাই যদিও খৰচ শ শ কোটি টকা বৃদ্ধি পাইছে। কেন্দ্ৰীয় তদন্তকাৰী সংস্থাটোৰ মতে আপ চৰকাৰৰ দিনত স্বাস্থ্য খণ্ডত ব্যাপক দুৰ্নীতি সংঘটিত হৈছে।
মন কৰিবলগীয়া যে ২০২৪ চনৰ ২২ আগষ্টত দিল্লী বিধানসভাৰ তদানীন্তন বিৰোধী দলপতি বিজেন্দৰ গুপ্তাই এই ঘটনাত এজাহাৰ দাখিল কৰিছিল। তেওঁ দাবী কৰে যে দিল্লীৰ স্বাস্থ্য খণ্ডত আপৰ নেতাসকলে ব্যাপক দুৰ্নীতি সংঘটিত কৰিছে। সত্যেন্দ্ৰ জৈন আৰু সৌৰভ ভৰদ্বাজৰ নাম তাত ওপৰলৈ উঠি আহিল। দাবী কৰা হৈছিল যে স্বাস্থ্য প্ৰকল্পৰ বাজেটত ধন আত্মসাৎ কৰাৰ চেষ্টাৰ উপৰিও কামত ব্যাপক অনিয়ম, ধনৰ অপব্যৱহাৰ, ব্যক্তিগত ঠিকাদাৰৰ ব্যৱহাৰ আদিও সংঘটিত হৈছে।
