ৰাছিয়া-ইউক্ৰেইনৰ যুদ্ধ আৰম্ভ হোৱাৰ পৰা এতিয়ালৈকে উইক্ৰেইনৰ ওপৰত সৰ্ববৃহৎ ড্ৰ’ন আক্ৰমণ চলালে ৰাছিয়াই। এই আক্ৰমণত কমেও তিনিজন লোকৰ মৃত্যু হৈছে আৰু ১৮ জন আহত হৈছে। এই আক্ৰমণত কিয়েভৰ মুখ্য চৰকাৰী ভৱনৰ ছাদ আৰু ওপৰৰ তলাৰ ক্ষতিসাধন হৈছে। ইউক্ৰেইনৰ বায়ুসেনাই জনোৱা মতে, ৰাছিয়াই ৮০৫খন ড্ৰ’ন আৰু ১৩টা ক্ষেপণাস্ত্ৰ ব্যৱহাৰ কৰি এই আক্ৰমণ চলাইছিল, য’ত ৭৫১খন ড্ৰ’ন আৰু চাৰিটা ক্ষেপণাস্ত্ৰ ধ্বংস কৰা হৈছে। ২০২২ চনৰ ফেব্ৰুৱাৰীত ৰাছিয়াৰ সম্পূৰ্ণ আক্ৰমণৰ পিছত এইটোৱেই আটাইতকৈ বৃহৎ ড্ৰ’ন আক্ৰমণ হিচাপে চিহ্নিত হৈছে।
ইউক্ৰেইনৰ বায়ুসেনাৰ মুখপাত্ৰ ইউৰি ইহনাটে নিশ্চিত কৰিছে যে দেওবাৰৰ এই আক্ৰমণত ৰাছিয়াই ৮০৫খন ড্ৰ’ন আৰু ১৩টা বিভিন্ন ধৰণৰ ক্ষেপণাস্ত্ৰ ব্যৱহাৰ কৰিছিল। ইউক্ৰেইনৰ প্ৰতিৰক্ষা বাহিনীয়ে ৭৪৭খন ড্ৰ’ন আৰু চাৰিটা ক্ষেপণাস্ত্ৰ ধ্বংস কৰিবলৈ সক্ষম হৈছিল যদিও ৩৭টা স্থানত ৯টা ক্ষেপণাস্ত্ৰ আৰু ৫৬টা ড্ৰ’নৰ আঘাত ৰেকৰ্ড কৰা হৈছে। ধ্বংস কৰা ড্ৰ’ন আৰু ক্ষেপণাস্ত্ৰৰ ধ্বংসাৱশেষ ৮টা স্থানত পৰিছে, যাৰ ফলত কিয়েভৰ শ্বিয়াটোশ্বিনস্কি আৰু ডাৰ্নিটস্কি জিলাত বহুতো আৱাসিক অট্টালিকা ক্ষতিগ্ৰস্ত হৈছে। কিয়েভৰ মেয়ৰ ভিটালি ক্লিচ্কোৱে জনোৱা মতে, এই আক্ৰমণত এজন শিশু, এগৰাকী যুৱতী আৰু এগৰাকী বৃদ্ধাৰ মৃত্যু হৈছে। কিয়েভৰ চৰকাৰী মন্ত্ৰীসভাৰ মুখ্য কাৰ্যালয়ৰ ছাদৰ পৰা ধোঁৱা ওলোৱা দেখা গৈছে, যদিও এইটো প্ৰত্যক্ষ আক্ৰমণৰ ফল নে ধ্বংসাৱশেষৰ ফল স্পষ্ট হোৱা নাই।
ইউক্ৰেইনৰ প্ৰধানমন্ত্ৰী ইউলিয়া শ্বিৰিডেংকোৱে কয়, “প্ৰথমবাৰৰ বাবে শত্ৰুৰ আক্ৰমণত চৰকাৰী ভৱনৰ ছাদ আৰু ওপৰৰ তলাৰ ক্ষতি হৈছে। আমি ভৱনসমূহ পুনৰ নিৰ্মাণ কৰিম, কিন্তু হেৰুৱা জীৱন ঘূৰাই আনিব নোৱাৰি।” তেওঁ বিশ্ব সম্প্ৰদায়ক ৰাছিয়াৰ তেল আৰু গেছৰ ওপৰত কঠোৰ নিষেধাজ্ঞা আৰোপ কৰি হেঁচা বৃদ্ধি কৰাৰ আহ্বান জনাইছে। ইউক্ৰেইনৰ ৰাষ্ট্ৰপতি ভলোদিমিৰ জেলেনস্কিয়ে এই আক্ৰমণক “যুদ্ধৰ দীৰ্ঘায়নৰ ইচ্ছাকৃত অপৰাধ” বুলি অভিহিত কৰি বায়ু প্ৰতিৰক্ষা ব্যৱস্থা শক্তিশালী কৰাৰ দাবী জনাইছে। ইউৰোপীয় নেতাসকলে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ ওপৰত শান্তি পুনৰুদ্ধাৰৰ বাবে হেঁচা বৃদ্ধি কৰাৰ সময়তে এই আক্ৰমণ সংঘটিত হৈছে। ইয়াৰ পৰা এটা কথা স্পষ্ট হৈ পৰিছে যে এই আক্ৰমণে শান্তি আলোচনাৰ সম্ভাৱনা ম্লান কৰি তুলিছে।
