নৱৰাত্ৰি উৎসৱৰ লগত সংগতি ৰাখি অহা ২২ ছেপ্টেম্বৰৰ পৰা আৰম্ভ হ’বলগীয়া জিএছটি সংস্কাৰৰ কথা ঘোষণা কৰিছে প্ৰধানমন্ত্ৰী নৰেন্দ্ৰ মোদীয়ে।
ভাৰতৰ কৰ ব্যৱস্থা অধিক সৰল কৰা, অত্যাৱশ্যকীয় সামগ্ৰীৰ খৰচ হ্ৰাস কৰা আৰু নাগৰিকসকলৰ বাবে সঞ্চয় বৃদ্ধি কৰা। অৰ্থনৈতিক বৃদ্ধি ত্বৰান্বিত কৰাৰ লগতে উৎসৱমুখৰ বজাৰত পৰিয়ালসমূহৰ ভাৰ হ্ৰাস কৰাৰ লক্ষ্যৰে এই নতুন পদক্ষেপ গ্ৰহণ কৰা হৈছে বুলি উল্লেখ কৰৰে প্ৰধানমন্ত্ৰী মোদীয়ে।
প্ৰধানমন্ত্ৰীয়ে উল্লেখ কৰে, এই সংস্কাৰে বিশেষকৈ যুৱ সমাজ, কৃষক, মহিলা, দোকানী, উদ্যোগী আৰু নিম্ন-মধ্যবিত্তীয় গোটসমূহক সহায় কৰিব। ক্ৰয় ক্ষমতা বৃদ্ধি কৰাৰ উদ্দেশ্যে খাদ্য, ঔষধ, স্বাস্থ্য সেৱা, ঘৰ, বাহন, আৰু ইলেক্ট্ৰনিক্ছৰ দৰে দৈনন্দিন সামগ্ৰীৰ ওপৰত জিএছটিৰ হাৰ হ্ৰাস কৰা হ’ব।
আয়কৰ ৰেহাইৰ লগতে এই পদক্ষেপসমূহে বছৰি দুলাখ কোটি টকাৰো অধিক নাগৰিকসকলৰ ৰাহি হ’ব বুলি অনুমান কৰা হৈছে।
উল্লেখ্য যে ২০১৭ চনত জিএছটি প্ৰৱৰ্তনৰ পিছত, যিয়ে একাধিক কৰ একত্ৰিত কৰি ব্যৱসায়িক কাৰ্য্যকলাপ সহজ কৰিছিল, নতুন সংস্কাৰসমূহে এম এছ এম ই (MSME) আৰু থলুৱা সামগ্ৰীৰ সমৰ্থনৰ জৰিয়তে আত্মনিৰ্ভৰশীলতা অধিক মজবুত কৰিব বুলি আশা প্ৰকাশ কৰিছে প্ৰধানমন্ত্ৰী মোদীয়ে।
‘মেক ইন ইণ্ডিয়া’ পদক্ষেপৰ অধীনত স্থানীয় উৎপাদনক উৎসাহিত কৰি চৰকাৰে ভাৰতৰ অৰ্থনীতিৰ ভেঁটি শক্তিশালী কৰা, সামগ্ৰীৰ মান উন্নত কৰা আৰু বিশ্ববজাৰত প্ৰতিযোগিতামূলক ক্ষমতা বৃদ্ধি কৰাৰ দিশে আগবাঢ়িছে বুলি মতপোষণ কৰিছে।
