যোৱা ২৭ ছেপ্টেম্বৰত তামিনাডুৰ কাৰুৰত অনুষ্ঠিত দলীয় সমাৱেশৰ সময়ত পদপিষ্ট হৈ মৃত্যু হোৱা লোকসকলৰ পৰিয়ালবৰ্গলৈ ২০ লাখ টকাৰ সাহাৰ্য ঘোষণা কৰিছে তামিলাগা ভেট্ৰি কাঝাগামৰ সভাপতি বিজয় থালাপথীয়ে।
দেওবাৰে ছ’চিয়েল মিডিয়াত এটা পোষ্টযোগে শোকসন্তপ্ত পৰিয়াললৈ সমবেদনা জ্ঞাপন কৰি বিজয়ে কয় যে মৃতকৰ পৰিয়ালক ২০ লাখ টকা আৰু আঘাতপ্ৰাপ্ত লোকক ২ লাখ টকা প্ৰদান কৰা হ’ব।
বিজয়ে লিখে, ‘আপোনালোক যি ক্ষতিৰ সন্মুখীন হৈছে তাৰ বাবে এয়া বৃহৎ পৰিমাণৰ ধন নহয়। মই জানো আপোনালোকৰ লোকচানৰ ঋণ মই শুজিব নোৱাৰিম। ই এক অপূৰণীয় ক্ষতি। অৱশ্যে এই কঠিন সময়ত আপোনালোকৰ কাষত থিয় হৈ দুখৰ অংশীদাৰ হোৱাটো মোৰ কৰ্তব্য।’
বিজয়ে আহতসকলৰ আশু আৰোগ্যৰ বাবে প্ৰাৰ্থনা কৰাৰ লগতে চিকিৎসাধীন হৈ থকাসকলক তেওঁৰ দলৰ লোকসকলে সকলো ধৰণৰ সহায় আগবঢ়াব বুলি আশ্বাস দিয়ে।
উল্লেখ্য যে, নিৰ্বাচনৰ বাবে প্ৰচাৰ চলাই থকা তামিল অভিনেতা বিজয়ে আয়োজন কৰা সমাৱেশত শনিবাৰে হোৱা বিশৃংখলৰ ফলত কমেও ৩৯ জন লোক নিহত হোৱাৰ লগতে ৫০ জনৰো অধিক আহত হয় বুলি তামিলনাডুৰ মুখ্যমন্ত্ৰীয়ে জানিবলৈ দিয়ে।
ইয়াৰ পূৰ্বে ৰাজ্যখনৰ সাংসদ সেনথিল বালাজীয়ে সাংবাদিকৰ আগত কয় যে ৫৮ জন লোকক চিকিৎসালয়ত ভৰ্তি কৰা হৈছে।
তিনি দশক ধৰি তামিল চিনেমাৰ অন্যতম উল্লেখযোগ্য অভিনেতা বিজয়ে ২০২৪ চনত তামিলনাডুৰ শাসকীয় দল ডি এম কে আৰু প্ৰধানমন্ত্ৰী নৰেন্দ্ৰ মোদীৰ ভাৰতীয় জনতা পাৰ্টি দুয়োটাকে লক্ষ্য কৰি নিজৰ ৰাজনৈতিক দল তামিলাগা ভেট্ৰি কাঝাগম আৰম্ভ কৰিছে।
২০২৬ চনৰ আৰম্ভণিতে অনুষ্ঠিত হ’বলগীয়া ৰাজ্যিক নিৰ্বাচনৰ পূৰ্বেই তেওঁ প্ৰচাৰ ইতিমধ্যে আৰম্ভ কৰিছে।
ৰেলীৰ সময়ত দেখা গৈছে যে বিজয়ে গাড়ীৰ ওপৰৰ পৰা পানীৰ বটল অচেতন হৈ পৰা সমৰ্থকলৈ দলিয়াই দিছিল আৰু ভিৰ নিয়ন্ত্ৰণহীন হৈ পৰাত আৰক্ষীৰ সহায়ৰ আহ্বান জনাইছিল।
সংবাদ মাধ্যমৰ বাতৰি অনুসৰি নিকটৱৰ্তী জিলা তিৰুচিৰাপল্লী আৰু চেলেমৰ পৰা কমেও ৪৪ গৰাকী চিকিৎসকক কাৰুৰলৈ প্ৰেৰণ কৰা হৈছে।
ইপিনে তামিলনাডু চৰকাৰে এই সমগ্ৰ ঘটনাৰ তদন্ত কৰি চৰকাৰক প্রতিবেদন দাখিল কৰিবলৈ অৱসৰপ্ৰাপ্ত ন্যায়াধীশ অৰুণা জগদীশনৰ নেতৃত্বত এখন সমিতি গঠন কৰি দিছে।
স্মৰ্তব্য যে, বিজয়ৰ সমাৱেশত এইধৰণৰ ঘটনা এইটোৱেই প্ৰথম নহয়। যোৱা বছৰৰ অক্টোবৰ মাহত বিজয়ৰ ৰাজনৈতিক দলৰ প্ৰথমখন সমাবেশৰ পাছত সংবাদ মাধ্যমে কমেও ৬ জনৰ মৃত্যুৰ বাতৰি প্ৰকাশ কৰিছিল।
